Be Woman Asia فورۋمى ساياساتتان تىس جوبا بولىپ قالا بەرەدى. بۇل تۋرالى فورۋمنىڭ ۇيىمداستىرۋ كوميتەتى الەۋمەتتىك جەلىلەردە تالقىلانعان جەكەلەگەن پىكىرلەرگە قاتىستى رەسمي مالىمدەمە جاسادى، دەپ حابارلايدى Dalanews.kz.
«كەيبىر سپيكەردىڭ ايتقان پىكىرى فورۋمنىڭ، ۇيىمداستىرۋشىلار مەن قاتىسۋشىلاردىڭ ۇستانىمىن بىلدىرمەيدى. Be Woman Asia – ساياساتتان تىس الاڭ. ءبىزدىڭ باستى ميسسيامىز – ورتالىق ازيا ايەلدەرىنىڭ دامۋ جانە ىنتىماقتاستىق پلاتفورماسىن قۇرۋ»، – دەلىنگەن حابارلامادا.
بيىلعى فورۋمعا 3000 قاتىسۋشى، 100 سپيكەر جانە 50 مەنتور قوسىلعان. ۇيىمداستىرۋشىلاردىڭ ايتۋىنشا، ءاربىر سپيكەرمەن الدىن الا بريفينگ وتكىزىلىپ، كەلىسىمشارت جاسالادى. قۇجاتتا قازاقستان زاڭناماسىن بۇزاتىن نەمەسە فورۋم بەدەلىنە نۇقسان كەلتىرەتىن سوزدەر مەن ارەكەتتەرگە جول بەرمەۋ مىندەتى بەكىتىلگەن.
«فورۋم تىكەلەي ەفيردە، اشىق فورماتتا وتەدى. وكىنىشكە قاراي، ءبىر سپيكەردىڭ ءسوزى رەگلامەنتتەن شىعىپ كەتتى. بۇل Be Woman Asia قۇندىلىقتارىنا جانە جوبانىڭ ميسسياسىنا قايشى كەلەدى. ءبىز فورۋمنىڭ ساياسيلانۋىنا قارسىمىز، باستى ماقساتىمىز – ءوزارا قۇرمەت، ىنتىماقتاستىق جانە ديالوگ»، – دەپ اتاپ ءوتتى ۇيىمداستىرۋشىلار.
فورۋمدى ۇيىمداستىرۋ كوميتەتى الداعى ۋاقىتتا مودەراسيا مەن رەگلامەنتتى باقىلاۋدى كۇشەيتىپ، سپيكەرلەرمەن ءتۇسىندىرۋ جۇمىستارىن ارتتىراتىنىن حابارلادى.
«جەكەلەگەن قاتىسۋشىنىڭ پىكىرىن فورۋمدى ۇيىمداستىرعان جۇزدەگەن ادام مەن سەرىكتەستەردىڭ ەڭبەگىمەن بايلانىستىرماۋدى سۇرايمىز. ءبىزدىڭ ماقساتىمىز – ءبولىنۋ ەمەس، بىرىگۋ»، – دەلىنگەن مالىمدەمەدە.
