قازاقستاننىڭ BAYTAQ جاسىلدار پارتياسىنىڭ ءتوراعاسى ازاماتحان امىرتايەۆ ەلدە اەس سالۋ ماسەلەسىنە بايلانىستى قازاقستاندىقتارعا ۇندەۋ جاسادى، دەپ حابارلايدى Dalanews.kz.
امىرتايەۆ ۇندەۋدى Youtube ارناسىندا جاريالاپ، بۇل باستامانى قولدايتىنىن جەتكىزدى.
"قازىرگى تاڭدا ەلىمىزدە اتوم ەلەكتر ستانسياسىن سالۋ جونىندە تالقىلاۋ ءجۇرىپ جاتىر. ارينە، ءارتۇرلى وي-پىكىر ايتىلۋدا. وسىعان بايلانىستى ءبىز BAYTAQ جاسىلدار پارتياسىنىڭ ماقساتى – ەلىمىزدە تازا اۋانى، تازا جەردى، تازا سۋدى قامتاماسىز ەتۋ، ەكولوگيالىق تازا ءوندىرىستى قالىپتاستىرۋ. وسى باعىتتا ءبىزدىڭ پارتيامىز جۇمىس ىستەپ جاتىر. سول سەبەپتى اەس سالۋ ماسەلەسىندە ويىمىزدى اشىق ايتىپ، سىزگە شىندىقتى سىزگە جەتكىزۋىمىز كەرەك.
الەمدە تازا جاسىل ەنەرگيا كوزى – اتوم ەنەرگياسى بولىپ سانالادى. وتكەن جىلى دۋبايدا كليماتقا بايلانىستى ۇلكەن سامميت ءوتتى. سول سامميتكە ءبىز قاتىستىق. دامىعان ەلدەر – ەۋروپا ەلدەرى، اقش، وڭتۇستىك كورەيا، جاپونيا، ەكونوميكاسى مىقتى دامىعان تاعى دا باسقا ەلدەر ءبىر داۋىسپەن “ءححى عاسىردا اتوم ەنەرگياسى – ەڭ باستى ەنەرگيا” دەپ ايتىپ جاتىر. سەبەبى كليماتتى تۇراقتى ۇستاپ قالۋ، قورشاعان ورتانى قورعاۋ – ونى تەك اەس قانا قامتاماسىز ەتە الادى دەگەن ويدى ايتتى"، – دەيدى ول.
ازاماتحان امىرتايەۆتىڭ سوزىنشە، اەس ەنەرگياسى ەكولوگيالىق تازا ەنەرگيا، ال كومىر وتىنى ەنەرگياسىنىڭ اۋاعا شىعاراتىن قالدىعى ۇلكەن ەكەنىن اتاپ ءوتتى.
"تەمىرتاۋ، بالقاش، الماتى، استانا سياقتى قالالاردا دەمالاتىن اۋا جوق. ءبىز اتوم ەلەكتر ستانسياسىنىڭ ەنەرگياسى تازا، جاسىل ەنەرگيا دەپ سانايمىز. سول سەبەپتى حالىققا وسىنى جەتكىزگىمىز كەلەدى. حالىق وسىنى ءتۇسىنۋى كەرەك. اەس – عىلىمنىڭ جەتىستىگى. بۇل عىلىمدى دامىتۋىمىز كەرەك. اتوم جلەكتر ستانسياسى ارقىلى وسى باعىتاعى بارلىق عىلىمي ينستيتۋتتاردى دامىتۋىمىز كەرەك. الەمدەگى ۋران شىعاراتىن ەڭ ۇلكەن مەملەكەتپىز دەيمىز. ءبىراق ونى ءبىز شيكىزات رەتىندە عانا ساتىپ جاتىرمىز. ونى وڭدەپ، ەنەرگيا الىپ، سول ەنەرگيانى جاقىن ەلدەرگە ەكسپورتقا شىعارساق بيۋدجەتكە قانشاما ءتۇسىم بولادى.
بۇل شىندىقتى حالىققا جەتكىزۋ – ءبىزدىڭ پارتيامىزدىڭ بورىشى. بۇل ەنەرگيا كوزى بىزگە جاقىن. كۇزدە رەفەرەندۋم وتەدى. سول رەفەرەندۋمدە حالقىمىز دۇرىس تاڭداۋ جاساۋى كەرەك. وسى باعىتتا ءاربىر ءسوزىمىزدى، دالەل، دايەكتەرىمىزدى حالىققا جەتكىزۋگە دايىنبىز"، – دەيدى امىرتايەۆ.
