سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتەن جۋرناليستەر جامبىل وبلىسىنىڭ اكىمى ەربول قاراشوكەيەۆ سىنالعان الەۋمەتتىك جەلىدەگى جازباعا نە سەبەپتى لايك باسقانىن سۇرادى، - دەپ حابارلايدى Dalanews.kz.
مينيستر نە دەپ اقتالدى؟
"قاراشوكەيەۆتىڭ جۇمىسىنا كوڭىلىڭىز تولماي ما؟ وعان تەرىس پىكىردەسىز بە؟" – دەپ سۇراعاندا، مينيستر بۇل ارەكەتىن ەسىنە تۇسىرە المايتىنىن ايتتى.
"لايك باسقانىم ەسىمدە جوق. الەۋمەتتىك جەلىنى قاراپ وتىرعان كەزدە باسىلىپ كەتكەن شىعار. "ا تاك" تەرىس كوزقاراسىم جوق"، – دەدى نۇرجىگىتوۆ.
"جامبىل وبلىسىمەن جاقسى تانىس". شەندىلەردىڭ بۇعان دەيىنگى قىزمەتى
ايتا كەتەيىك، نۇرجان نۇرجىگىتوۆ بۇعان دەيىن جامبىل وبلىسىنىڭ اكىمى قىزمەتىن اتقارعان.
ول 2022-2023 جىلدارى ايماقتى باسقاردى، ال 2023 جىلى سۋ رەسۋرستارى جانە يرريگاسيا ءمينيسترى بولىپ تاعايىندالدى.
ال ەربول قاراشوكەيەۆ ءوز كەزەگىندە قازاقستاننىڭ اۋىل شارۋاشىلىعى ءمينيسترى بولىپ قىزمەت ەتتى.
2021-2023 جىلدارى مينيستر بولعان ول 2023 جىلى جامبىل وبلىسىنىڭ اكىمى لاۋازىمىنا كەلدى.
لايكقا رەاكسيا
ءمينيستردىڭ كۇتپەگەن "لايكى" قوعامدا ءارتۇرلى پىكىر تۋدىردى. كەيبىرەۋلەر مۇنى قاراپايىم تەحنيكالىق قاتە دەپ ەسەپتەسە، ەندى بىرەۋلەرى بۇل نۇرجىگىتوۆتىڭ قاراشوكەيەۆتىڭ جۇمىسىنا دەگەن كوزقاراسىن ءبىلدىرۋى مۇمكىن ەكەنىن العا تارتىپ وتىر.
مەملەكەتتىك قىزمەتكەرلەردىڭ الەۋمەتتىك جەلىدەگى ءار ارەكەتى ءجيى نازارعا ىلىگەتىندىكتەن، ولاردىڭ كەز كەلگەن قادامى قوعامدا ۇلكەن تالقىعا تۇسەتىنى بەلگىلى.
