سالتاناتتى ءىس-شارانى اشقان «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك تاۋەلسىزدىكتىڭ 30 جىلىنداعى ەلىمىزدىڭ جەتىستىكتەرىن زەردەلەۋگە، سول ارقىلى جاس قالامگەرلەرگە جول اشۋعا باعىتتالعان «ۇلى دالا» بايقاۋىنىڭ ماڭىزى ەرەكشە ەكەنىن اتاپ ءوتتى.
![](/uploads/images/20240127193347325.jpg)
«30-جىلدىق دامۋدى جەتى اۋىز سوزبەن تۇيىندەپ، جاس ۇرپاققا «ەلدىكتىڭ جەتى تۇعىرىن» انىقتاپ بەرگەن ەلباسى، «Nur Otan» پارتياسىنىڭ ءتوراعاسى نۇرسۇلتان ءابىش ۇلى نازاربايەۆتىڭ «ۇلتتىق مادەنيەت – حالىقتىڭ رۋحاني تىرەگى» دەپ اتاپ كورسەتۋى تەگىن ەمەس. كەز كەلگەن مەملەكەتتىڭ وركەندەۋى – سول قوعامنىڭ رۋحاني-مادەني دەڭگەيىنە بايلانىستى. ەلباسى ايتقانداي، ءبىز الەمدەگى 200-گە تارتا ۇلتتى تەك ۇلتتىق مادەنيەتىمىزبەن، ادەبيەتىمىزبەن، رۋحانياتىمىزبەن عانا تاڭقالدىرا الامىز. وسى ورايدا «Nur Otan» پارتياسى قازاقتىڭ ونەرى مەن مادەنيەتىن بارىنشا قولداپ، جان-جاقتى قامقورلىق جاساپ كەلەدى»، - دەدى باۋىرجان بايبەك.
![](/uploads/images/20240127193347692.jpg)
ونىڭ ايتۋىنشا، پارتيانىڭ 2025 جىلعا دەيىنگى سايلاۋالدى باعدارلاماسى اياسىندا ەلىمىزدە 259 مادەنيەت وشاعىن سالۋ، 1241 مادەني نىساندى جوندەۋ، 150 نىساندا عىلىمي رەستاۆراسيا جۇمىستارى جوسپارلانسا، بيىلدىڭ وزىندە 200-گە جۋىق مادەنيەت نىسانىنا جوندەۋ جۇرگىزىلگەن. سونداي-اق، ول وسى جىلدىڭ تاعى ءبىر جاڭالىعى رەتىندە بارلىق مادەني-ادەبي شارالاردى كەشەندى تۇردە اتقارۋ ءۇشىن «ۇلتتىق مۇرا» پارتيالىق جوباسى بەكىتىلگەنىن جەتكىزدى. ونىڭ اياسىندا ايتىس، ءمۇشايرا، جىر-تەرمە، شىعارماشىلىق بايقاۋ سياقتى 250-دەي ءىس-شارا وتكىزۋ جوسپارلانعان. ال جىل باسىنان بەرى پارتيانىڭ قولداۋىمەن 49 اقىندار ايتىسى وتكىزىلدى.
![](/uploads/images/20240127193347985.jpg)
پارتيا ءتوراعاسىنىڭ ءبىرىنشى ورىنباسارى «Nur Otan» جانىنان قۇرىلعان «Miras» كەڭەستەرىنىڭ جۇمىسىنا توقتالدى. بيىل كەڭەس مۇشەلەرى وتاندىق كينەماتوگرافيانى دامىتۋ، مادەني وشاقتاردى قالپىنا كەلتىرۋ، تاريحي مۇرالاردى ساقتاۋ سياقتى تاقىرىپتار اياسىندا كوپتەگەن وزەكتى ماسەلەلەردى كوتەرگەن.
![](/uploads/images/20240127193348332.jpg)
باۋىرجان بايبەك پارتيا وتكىزگەن پرايمەريزگە 350-دەن اسا قالامگەر، پۋبليسيست، ايتىسكەر، جۋرناليست قاتىسقانىن ايتا كەلە، ەلدىڭ دامۋىنا، قوعامنىڭ وسۋىنە باعىتتالعان ەڭبەكتەرى مەن ازاماتتىق بەلسەندىلىكتەرى ءۇشىن بارشا قالامگەر قاۋىمعا ريزاشىلىعىن ءبىلدىردى.
![](/uploads/images/20240127193348644.jpg)
«ۇلى دالا» بايقاۋىنا 2021 جىلعى 1 قازان مەن 30 قاراشا ارالىعىندا ەلىمىزدىڭ تۇكپىر-تۇكپىرىندەگى 18 بەن 40 جاس ارالىعىنداعى قالامگەرلەردەن باس-اياعى 400-گە تارتا شىعارما كەلىپ ءتۇستى. ونىڭ ىشىندە ەرەجە تالاپتارىنا ساي دەپ تانىلعان 287 شىعارما ىرىكتەلىپ، aikyn.kz سايتىندا جاريالاندى.
بايقاۋ كوميسسياسى بىرلەسكەن شەشىم ارقىلى «پروزا»، «پوەزيا»، «دراماتۋرگيا»، «كوركەم فيلم مەن تەلەسەريال سەناريى»، «بالالارعا ارنالعان شىعارما» اتتى بەس اتالىم بويىنشا بارلىعى 16 جۇلدەلى ورىن يەگەرىن انىقتادى.
بايقاۋ كوميسسياسىنىڭ ءتوراعاسى، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، جازۋشى الىبەك اسقار 287 شىعارمانىڭ 173ء-شى – پوەزيا، 52ء-سى – پروزا، 43ء-ى – بالالارعا ارنالعان شىعارما، 10-ى – دراماتۋرگيا، 9-ى – كوركەم فيلم مەن تەلەسەريال سەناريى جانرى بويىنشا جازىلعانىن ايتتى.
«وسى شىعارمالاردىڭ بارلىعىن ءاربىر جانر بويىنشا ءبولىپ الىپ، كوميسسيا مۇشەلەرى جەكە-جەكە قاراپ شىقتىق. بىرنەشە رەت باس قوسىپ، تالقىلادىق. تالانتتار وتە كوپ. العاشىندا بارلىق جانرعا 3 ورىننان بەلگىلەگەنىمىزبەن، سوڭعى جينالىستا پارتيانىڭ باسشىلىعىنا «پوەزيا» مەن «پروزا» نوميناسياسىنا تاعى ەكى ورىننان قوسۋعا ءوتىنىش جاسادىق. ولار وسى ەكى جانردىڭ ءارقايسىنا تاعى ەكى ارنايى سىيلىق قوسىپ بەردى. وسى ورايدا، رۋحانياتىمىزدى قولداعان «Nur Otan» پارتياسىنا العىسىمدى بىلدىرەمىن»، - دەدى الىبەك اسقار.
سونىمەن، «پروزا» نوميناسياسى بويىنشا ءبىرىنشى ورىندى – جازۋشى قانات ءابىلقايىر، ەكىنشى ورىندى – IT مامان، مەدياساۋات جانە كيبەرقاۋىپسىزدىك بويىنشا مەدياترەنەر مەيىرجان جىلقىباي، ءۇشىنشى ورىندى – اقىن، اۋدارماشى، جازۋشى ارمان ادىلبەك يەلەندى. وسى نوميناسياداعى ورالحان بوكەي اتىنداعى ارنايى سىيلىق ل.ن.گۋميليەۆ اتىنداعى ەۇۋ-نىڭ وقىتۋشىسى الماز مىرزاحمەتكە بۇيىرسا، بەردىبەك سوقپاقبايەۆ اتىنداعى ارنايى سىيلىقتى شەت تىلدەر جانە ىسكەرلىك كارەرا ۋنيۆەرسيتەتىنىڭ ءمۇعالىمى ەلميرا نازيروۆا جەڭىپ الدى.
«پوەزيا» نوميناسياسىندا ءبىرىنشى ورىنعا جامبىل وبلىستىق «AR-AI» گازەتىنىڭ «مادەنيەت جانە الەۋمەت» ءبولىمىنىڭ رەداكتورى نۇرجان ءقادىرالى، ەكىنشى ورىنعا الماتى وبلىسىنىڭ كوكقاينار اۋىلىنداعى №44 ورتا مەكتەپتىڭ ءمۇعالىمى تولەگەن مەللات، ءۇشىنشى ورىنعا شىعىس قازاقستان وبلىسىنىڭ «اياگوز جاڭالىقتارى» اۋداندىق گازەتىنىڭ باس رەداكتورى ەرمەك دايىربايەۆ لايىقتى دەپ تانىلدى. م.ماقاتايەۆ اتىنداعى ارنايى سىيلىقتى «ورال ءوڭىرى» باتىس قازاقستان وبلىستىق قوعامدىق-ساياسي گازەتىنىڭ ءتىلشىسى مارلەن عيلىمحان، ال ج.جابايەۆ اتىنداعى ارنايى سىيلىقتى رەسپۋبليكالىق «Egemen Qazaqstan» گازەتىنىڭ ءتىلشىسى راۋان قابيدولدين يەلەندى.
«دراماتۋرگيا» نوميناسياسىندا ءۇشىنشى ورىنعا ورال قالاسىنىڭ ميچۋرين مەكتەبى بالاباقشا-بوبەكجاي كەشەنىنىڭ ءمۇعالىمى ايتولقىن بالمۋلدينا لايىقتى دەپ تانىلدى.
«كوركەم فيلم مەن تەلەسەريال سەناريى» نوميناسياسى بويىنشا ەكىنشى ورىندى نۇر-سۇلتان قالاسى باۋىرجان مومىش ۇلى اتىنداعى №53 مەكتەپ-ليسەيدىڭ ءمۇعالىمى جاقسىلىق مۇراتبەك يەلەنسە، ءۇشىنشى ورىندى جازۋشى، سەناريست زاۋرە تورەحان جەڭىپ الدى.
«بالالارعا ارنالعان شىعارما» نوميناسياسى بويىنشا ءبىرىنشى ورىن – «Abai TV» تەلەارناسىنىڭ قىزمەتكەرى ولجاس قاسىمعا، ەكىنشى ورىن – ءال-فارابي اتىنداعى ءقۇۋ-نىڭ «قازاق ۋنيۆەرسيتەتى» گازەتىنىڭ ءتىلشىسى نۇربەك نۇرجانۇلىنا، ءۇشىنشى ورىن «Egemen Qazaqstan» گازەتىنىڭ ءبولىم مەڭگەرۋشىسى ميراس اسانعا بۇيىردى.
سالتاناتتى شارادا «پوەزيا» نوميناسياسىندا ءبىرىنشى ورىنعا لايىقتى دەپ تانىلعان نۇرجان ءقادىرالى ءوز لەبىزىن ءبىلدىردى.
«تاۋەلسىزدىكتىڭ قالاي كەلگەنى اعا بۋىن وكىلدەرىنە جاقسى بەلگىلى. ال ءبىز سياقتى تاۋەلسىزدىكتىڭ قۇرداستارى مەن ەل ەگەمەندىگىن العاننان كەيىن دۇنيەگە كەلگەن بالالار ءۇشىن تاۋەلسىزدىك – ول اناداي ءقادىرلى، اكەدەي اسىل، باۋىرداي ىستىق، ىنىدەي ىزگى، قارىنداستاي اياۋلى، وسىناۋ باق-بەرەكەمىزدىڭ بويتۇمارى. ەلباسى قاسيەتتى قارا شاڭىراق قازاقستاننىڭ كەلەشەگىندە ءبىز سياقتى جاس بۋىنعا ۇلكەن سەنىم ارتتى. سول سەنىمنەن شىعا بەرەيىك. تاۋەلسىزدىك دەگەن ءبىر كۇندىك مەرەكە ەمەس. تاۋەلسىزدىكتىڭ ءاربىر كۇنى مەرەكە!»،- دەدى ول.
ءوز كەزەگىندە بەردىبەك سوقپاقبايەۆ اتىنداعى ارنايى سىيلىقتىڭ يەگەرى اتانعان ەلميرا نازيروۆا قازاقستاندىقتاردى تاۋەلسىزدىك مەرەكەسىمەن قۇتتىقتاي كەلە، «ەگەمەندىك پەن ەلباسى ەگىز ۇعىم دەپ سانايمىن. سەبەبى، قازىرگى تاڭدا قازاقستان بەيبىتسۇيگىش، تولەرانتتى ەل رەتىندە تانىلدى. ودان بولەك، ىشكى ساياساتتا، جاستاردى، جاس انالاردى قولدايتىن بىردەن-بىر مەملەكەتتەردىڭ ءبىرىمىز»، - دەدى.
ەسكە سالا كەتەيىك، بايقاۋدا ءبىرىنشى ورىن جۇلدەسى ءۇشىن – 1 000 000 تەڭگە، ەكىنشى ورىنعا – 750 000 تەڭگە، ءۇشىنشى ورىن مەن ارنايى سىيلىققا – 500 000 تەڭگەدەن جۇلدە بەرىلدى.