بايان ماقسات قىزى 31 ارنانىڭ “ايتا بەرسىن” باعدارلاماسىنا سۇحبات بەردى، دەپ حابارلايدى Stan.kz اقپاراتتىق اگەنتتىگى.
– ءيا، مەن بۇل فيلمنەن كوپ اقشا تاپقىم كەلەدى، سوندىقتان دا ماعان پيار كەرەك، – دەپ كۇلگەن بايان قالجىڭداپ جاتقانىن ايتتى. – ەگەر مەن راسىندا تەك اقشانى ويلايتىن بولسام، جىلىنا 2 كينوكارتينادان تۇسىرەتىن ەدىم. ءتىپتى، 3-4 تۇسىرۋگە دە بولادى. ءبىراق ءبىز ۇلكەن ەكرانعا 5 جىل بويى دايىندالدىق. سوڭعى رەت “وستوروجنو، كوروۆا” ءفيلمىن ۇسىندىق. سودان بەرى ماعان ەشقانداي شابىت كەلمەدى، يدەيا بولمادى. نارىققا تەك اقشا تابۋ ءۇشىن كەلگىم كەلمەدى. بۇل كارتيناعا بارىمدى سالدىم، – دەيدى ماقسات قىزى.
اتالعان كينوكارتينادا بايان ماقسات قىزىنىڭ كۇيەۋى تۇرسىنعالي الاگوزوۆ، كەشYou توبىنىڭ ەكس-انشىسى كامشات جولدىبايەۆا، قازىرگى ءانشىسى ەليزات بەرىكوۆا، “الاۋ” توبىنىڭ سوليستەرى بوي كورسەتكەن. پروديۋسەر فيلمگە تامىر-تانىستاردى عانا ءتۇسىرۋىنىڭ سەبەبىن ءتۇسىندىردى.
– كەز كەلگەن ءرولدى الىپ شىعا الاتىن ەليزات باردا، باسقا قىزدى ىزدەپ قايتەمىن؟ جاسىراتىنى جوق ەليزاتتىڭ دا، “الاۋ” توبى جىگىتتەرىنىڭ ورنىنا دا كاستينگ بولعان جوق. سەبەبى مەن ولارعا سەندىم. ولار ارتيستەر، كامەرادان، ساحنادان، كورەرمەننەن قورىقپايدى. مەن ۇنەمى تەك ءوز بالالارىمدى تاڭدايمىن. مەن امەريكانى اشىپ جاتقان جوقپىن. بىرىنشىدەن، بۇل جەردە ارزان شىعادى دەگەن ءسوز ەمەس، ول مەنىڭ ءوز جوبالارىما قۇيعان ينۆەستيسيام. مەنىڭ بارلىق ارتىستەرىم تەك فيلم ارقىلى ناعىز جۇلدىزعا اينالعان. ءوز اقشامدى ءوز ارتىستەرىمە قۇياتىنداي مۇمكىندىك تۇرعاندا، باسقا ادامدى شاقىرىپ، وعان اقشا تولەۋدىڭ نە قاجەتى بار؟ بۇل قالىپتى نارسە، – دەپ ءتۇسىندىردى ماقسات قىزى.
