نۇرسۇلتان نازاربايەۆ قالا تۇرعىندارىنىڭ ءال-اۋقاتىن ارتتىرۋ ءۇشىن ءتيىستى شارالار قابىلداۋ، جاڭا جۇمىس ورىندارىن اشۋ، قۇرىلىس جۇمىستارى مەن الەۋمەتتىك ماڭىزدى نىسانداردى اشۋ ءىسىن كەستەگە سايكەس جۇرگىزۋ قاجەتتىگىنە نازار اۋداردى.
سونىمەن قاتار، ەلباسى قازاقستان تاۋەلسىزدىگىنىڭ 25 جىلدىعىن مەرەكەلەۋ جونىندەگى ءىس-شارالارعا ساپالى دايىندالىپ، وتكىزۋدىڭ ماڭىزدىلىعىن اتاپ ءوتتى.
– الماتى – ەلىمىزدەگى ەڭ ءىرى قالا. رەسپۋبليكا بويىنشا اتقارىلاتىن بارلىق جۇمىس ونىڭ دامۋىنا اسەر ەتەدى ءارى تۇرعىندارىنا كورىنىپ تۇرادى. بيىل قالانىڭ 1000 جىلدىعى مەرەكەلەنەدى، كەلەسى جىلى – قىسقى ۋنيۆەرسيادا-2017 وتكىزىلەدى. بۇلار – ءىرى مەملەكەتتىك ءىس-شارالار. ولاردى ىسكە اسىرۋ ءۇشىن وراسان جۇمىس اتقارۋ قاجەت. سونداي-اق قالانىڭ كۇزگى-قىسقى كەزەڭىنە دايىندىقتى بۇگىننەن باستاۋ كەرەك. وتكەن كەزدەسۋدە مەن ءبىرقاتار تاپسىرما بەرگەن بولاتىنمىن، ولاردىڭ مۇلتىكسىز ورىندالۋىن باقىلاۋ قاجەت، – دەدى مەملەكەت باسشىسى.
ب.بايبەك نۇرسۇلتان نازاربايەۆتىڭ بۇعان دەيىن بەرىلگەن تاپسىرمالارىنىڭ ورىندالۋ بارىسى تۋرالى باياندادى.
– قازىرگى كەزدە قايتا قارجىلاندىرىلعان يپوتەكالىق قارىزدار كولەمى 45%-كە ءوستى. مەملەكەتتىك باعدارلامالاردى ىسكە اسىرۋ اياسىندا 15 مىڭ جاڭا جۇمىس ورنىن اشۋعا قاراجات ءبولىندى. بۇدان بولەك، مەملەكەت-جەكەمەنشىك سەرىكتەستىگىن دامىتۋ جونىندە بيزنەسپەن تىعىز جۇمىس جۇرگىزىلۋدە. بۇگىندە جالپى قۇنى 40 ملرد تەڭگەنى قۇرايتىن مەموراندۋمدارعا قول قويىلدى. سونىڭ اياسىندا بىرنەشە الەۋمەتتىك نىساندار اشۋ جوسپارلانىپ وتىر، – دەدى الماتى قالاسىنىڭ اكىمى.
