بۇل تۋرالى بقو كاسىپكەرلىك باسقارماسىنىڭ باسپا ءسوز قىزمەتى حابارلادى.
دۋمان ءۇش جىلدان بەرى ورالداعى جيھاز زاۋىتىندا وپەراتور بولىپ ەڭبەك ەتىپ ءجۇر. ارناۋلى ءبىلىم الماعان. كاسىپورىنعا كەلگەننەن كەيىن تاجىريبە جيناقتاپ، ءقازىر كاسىبي مامان بولدى. زاۋىتتا جۇمىسشىلار دا، تۇتىنۋشىلار دا كوپ. سوندىقتان قاۋىپسىزدىك باستى نازاردا. دۋمان ەلدە دەرت دەندەگەن ۋاقىتتا بەيجاي قالماي، ۆاكسينا سالدىردى. ءقازىر بۇرىنعىداي قورقىنىش جوق ەكەنىن ايتادى.
اۋىرعان جوقپىن. جاقسى قابىلدادىم. ەڭ ءبىرىنشى ءوزىڭنىڭ قاۋىپسىزدىگىڭ ءۇشىن عوي. سوسىن ورتاڭداعى ادامداردىڭ قاۋىپسىزدىگى ءۇشىن. الماعان ادامدارعا الۋعا كەڭەس بەرەمىن، - دەدى دۋمان ناعييەۆ.
بقو-دا ەڭ ۇلكەن جيھاز زاۋىتى جۇمىس ىستەيدى. مۇندا مىڭعا جۋىق ادام ەڭبەك ەتەدى. ءوندىرىس ورنىندا شىعارىلعان تاۋارلارعا سۇرانىس جوعارى. رەسپۋبليكانىڭ بارلىق ايماعىمەن قاتار، رەسەي، ارمەنيا، جۇڭگو، تۇركيا ەلدەرىنە دە ەكسپورتتالادى. ىشكى جانە سىرتقى نارىقتا قىزۋ جۇمىس ءجۇرىپ جاتقاندىقتان، ءاربىر ەڭبەككەردىڭ ءرولى مەن دەنساۋلىعى ماڭىزدى. ولار كۇن سايىن جۇزدەگەن بوگدە اداممەن بايلانىستا بولادى. سوندىقتان ۇجىمنىڭ شامامەن 95 پايىزى ىندەتكە قارسى ەكپە سالدىرىپ ۇلگەرگەن. بۇل كورسەتكىش – جەرگىلىكتى كاسىپورىندار اراسىنداعى جوعارى ناتيجە.
مەن ادامداردى جاپپاي ۆاكسينالاۋ دۇرىس دەپ ويلايمىن. قاتەرلى دەرتتى قوعام بولىپ جەڭۋىمىز كەرەك. ءبىزدىڭ ۇجىمدا باسىندا ءبىرازى جۇرەكسىنگەنى راس. مەديسينالىق قىزمەتكەرلەر كاسىپورىنعا كەلىپ، جۇمىسشىلارمەن كەزدەسۋلەر وتكىزدى. ءتۇسىندىرۋ جۇمىستارىنان سوڭ ءوز ەركىمەن ەكپە سالدىرعاندار ۇلەسى كۇرت ارتتى. ءبىزدىڭ فابريكادا وسىعان دەيىن ەشكىم ىندەت جۇقتىرعان جوق. دەگەنمەن بارلىعى ساقتىق ءۇشىن وسىنداي شەشىم قابىلداپ جاتىر، - دەدى كاسىپورىننىڭ باس ديرەكتورى ميحايل پشەنيچنىي.
نان ونىمدەرى كومبيناتىندا دا ۆاكسينالاۋ ناۋقانى قارقىندى. ءوز ەركىمەن ەكپە سالدىرعانداردىڭ ءبىرى دينارا كارىموۆا دەرتكە قاتىستى ۇرەي مەن كۇماننەن ارىلعانىن جەتكىزدى. تاجىريبەلى مامان كاسىپورىندا 11 جىلدان بەرى قىزمەت اتقارىپ كەلەدى. ول قامباداعى بيداي مەن وندىرىلگەن ۇننىڭ ساپاسىنا جاۋاپتى. ال ءىرى كامبيناتتىڭ نان ونىمدەرى جۇزدەگەن دۇكەننىڭ سورەسى مەن مىڭداعان شاڭىراقتىڭ داستارحانىندا تۇرادى. تيىسىنشە ءوندىرىس ورنىندا سانيتارلىق-ەپيدەميولوگيالىق تالاپتاردى ەسكەرمەۋگە مۇلدە بولمايدى.
ءوزىمنىڭ، جانۇيامنىڭ، ارىپتەستەرىمنىڭ جانە بارلىق تۇتىنۋشىنىڭ دەنساۋلىعىن ويلادىم. نان ونىمدەرى كۇندەلىكتى تۇتىناتىن ەڭ قاجەتتى تاعام. ال ونى ءبىز وندىرەتىن بولعاندىقتان، بارىنشا ساق بولۋىمىز كەرەك، - دەپ اتاپ ءوتتى كاسىپورىننىڭ زەرتحانا مامانى.
بۇل كومبيناتتا 225 ادام ەڭبەك ەتەدى. تاۋلىگىنە 20 توننا ماكارون، 260 توننا ۇن وندىرىلەدى. ونىمدەر جەرگىلىكتى نارىققا جانە رەسەي، وزبەكستان ەلدەرىنە شىعارىلادى. كاسىپورىن ايماقتا العاشقىلاردىڭ ءبىرى بولىپ ۆاكسينالاۋ ناۋقانىنا قولداۋ كورسەتكەن ەدى. بۇگىندە ەكپە العانداردىڭ ۇلەسى 90 پروسەنتتەن استى.
كاسىپورىن جۇمىسشىلارىنىڭ 195ء-ى ۆاكسينا سالدىردى. ال قالعان ادامدار دەنساۋلىعىنا بايلانىستى سالدىرا المادى. پاندەميا كەزىندە ءوندىرىس قۋاتى تومەندەدى. تابىس كولەمى دە ازايدى. ال داعدارىستان شىعىپ، جۇمىستى ودان ءارى جانداندىرۋ ءۇشىن ەڭبەك كۇشى مەن ولاردىڭ دەنساۋلىعىنا باسىم باعىت بەرىلدى. ءقازىر ۇجىمدىق يممۋنيتەت قالىپتاستىرىپ، تابىستى ەڭبەك ەتىپ جاتىرمىز، - دەدى كادر ءبولىمىنىڭ مامانى.
ايماقتا ءىرى كاسىپورىندار جەتەرلىك. ءاربىر زاۋىتتا كەمىندە جۇزدەگەن ادام تابىس تاۋىپ ءجۇر. ەڭبەك ۇجىمدارى دەرتكە قارسى قوعام بولىپ جۇمىلۋدى ءجون كورىپ، جاپپاي ۇلەس قوسىپ جاتىر.
