قر پرەمەر-مينيسترٸ باقىتجان ساعىنتاەۆتٸڭ نازارىنا!
جۇمىس بابىمەن استاناداعى مەملەكەتتٸك ورگانداردا, مينيسترلٸكتەردە, ەكٸمشٸلٸكتەردە جيٸ بولامىن. كەيدە جۇمىس اياعىنا دەيٸن, ودان دا ۇزاق قالاتىن كەزٸمٸز بار. مەنٸ تاڭ قالدىراتىنى سونداعى شەنەۋنٸكتەردٸڭ جۇمىستا كەشكٸ 20.00 – 21.00-گە دەيٸن, تٸپتٸ ودان دا ۇزاق جۇمىستا وتىراتىنى. «بۇل قالاي?» دەسەڭ, «باستىق وتىرسا بٸز دە وتىرامىز, رۇقساتسىز كەتۋگە بولمايدى» دەيدٸ.
يە, ٷيگە قايتۋ ٷشٸن باستىعى باستىعىنىڭ, ول مينيستردٸڭ ورىنباسارىنىڭ رۇقساتىن كٷتٸپ وتىرعانى. وبلىس ەكٸمشٸلٸكتەرٸنٸڭ دە تەرەزەسٸندەگٸ جارىقتارى دا بٸرازعا دەيٸن وڭايشىلىقپەن ٶشپەيدٸ.
«ارتىق ٸستەگەن ۋاقىت ٷشٸن اقشا قوسا ما?». «قايدان?! باستىقتار بٸزگە «دو شەستي چاسوۆ تى رابوتال دليا سەبيا, ا پوسلە شەستي تى دولجەن رابوتات دليا پراۆيتەلستۆا» دەپ ٷيرەتەدٸ» دەيدٸ اتىن جارييا ەتۋدٸ قالامايتىن قىزمەتكەرلەر.
كەشكٸ التىدان كەيٸن بايعۇستاردىڭ جٸپسٸز بايلانىپ وتىرعانى. ٷيلەنگەندەرٸ بالاسىن بالاباقشادان الۋدى بٸر بٸرٸنە تاپسىرىپ جاتقانى.
قاپتاعان تۇرمىسقا شىقپاعان قىزدار, ٷيلەنبەگەن جٸگٸتتەر. «ٶي, اينالايىندار, ٶمٸر ٶتٸپ بارادى, ٷيلەنبەيسٸڭدەر مە?» دەيمٸز. «وي, اعاي, جۇمىستان تٷنگٸ توعىز, وندا شىعامىز. تانىسۋعا, قىدىرۋعا ۋاقىت قايدا? تاڭەرتەڭ 08.50-دە جۇمىستا بولۋ كەرەك. ەلەكتروندىق كەرتٸشكەمەن كٸرگٸزەدٸ. كەشٸكسەڭ جازا تارتاسىڭ, جالاقىڭ ازايىپ قالۋى كەدٸك. سوندىقتان جەكە ٶمٸرٸمٸزگە ۋاقىت قالمايدى!» دەپ اعىنان جارىلادى كەيبٸر ٸنٸ-قارىنداستارىمىز.
ٸس جٷزٸندە ولار 11-12 ساعات جۇمىس ٸستەيدٸ. ارتىق ٸستەگەن ساعاتتارىن ٶتەپ جاتقان ەشكٸم جوق. تٸپتٸ سەنبٸ, جەكسەنبٸ كٷندەرٸ امالسىز جۇمىسقا شىعاتىندارى بار.
سوندا «ەڭبەك كودەسٸ» كٸم ٷشٸن جازىلعان? ەگەر ٷكٸمەت ورىنداماسا, مينيسترلٸكتەر, ەكٸمشٸلٸكتەر ورىنداماسا ول كودەستٸڭ كٸمگە كەرەگٸ بار?
سەگٸز ساعات جۇمىس مٸندەتتٸ. قىزمەتكەرلەردٸ قاناۋعا نەگە جول بەرٸلەدٸ? جٸپسٸز بايلانعان جەردە جٶندٸ نەتيجە بولا ما?
سوندىقتان كەشكٸ ساعات التىدان كەيٸن قىزمەتكەرلەر ەشكٸمنٸڭ رۇقساتىنسىز ٷيلەرٸنە قايتا بەرۋٸ كەرەك. شەنەۋنٸكتەر حالىقتان زاڭعا باعىنۋدى تالاپ ەتەردەن بۇرىن تەرتٸپكە ٶزدەرٸ باعىنۋى كەرەك دەپ ويلايمىن!
مارات توقاشباەۆ, جۋرناليست
(حات اۆتوردىڭ فەيسبۋكتاعى پاراقشاسىنان الىندى)
