QR Premer-Mınıstri Baqytjan Saǵyntaevtiń nazaryna!
Jumys babymen Astanadaǵy memlekettik organdarda, mınıstrlikterde, ákimshilikterde jıi bolamyn. Keıde jumys aıaǵyna deıin, odan da uzaq qalatyn kezimiz bar. Meni tań qaldyratyny sondaǵy sheneýnikterdiń jumysta keshki 20.00 – 21.00-ge deıin, tipti odan da uzaq jumysta otyratyny. «Bul qalaı?» deseń, «Bastyq otyrsa biz de otyramyz, ruqsatsyz ketýge bolmaıdy» deıdi.
Iá, úıge qaıtý úshin bastyǵy bastyǵynyń, ol mınıstrdiń orynbasarynyń ruqsatyn kútip otyrǵany. Oblys ákimshilikteriniń de terezesindegi jaryqtary da birazǵa deıin ońaıshylyqpen óshpeıdi.
«Artyq istegen ýaqyt úshin aqsha qosa ma?». «Qaıdan?! Bastyqtar bizge «Do shestı chasov ty rabotal dlá sebá, a posle shestı ty doljen rabotat dlá Pravıtelstva» dep úıretedi» deıdi atyn jarıa etýdi qalamaıtyn qyzmetkerler.
Keshki altydan keıin baıǵustardyń jipsiz baılanyp otyrǵany. Úılengenderi balasyn balabaqshadan alýdy bir birine tapsyryp jatqany.
Qaptaǵan turmysqa shyqpaǵan qyzdar, úılenbegen jigitter. «Óı, aınalaıyndar, ómir ótip barady, úılenbeısińder me?» deımiz. «Oı, aǵaı, jumystan túngi toǵyz, onda shyǵamyz. Tanysýǵa, qydyrýǵa ýaqyt qaıda? Tańerteń 08.50-de jumysta bolý kerek. Elektrondyq kártishkemen kirgizedi. Keshikseń jaza tartasyń, jalaqyń azaıyp qalýy kádik. Sondyqtan jeke ómirimizge ýaqyt qalmaıdy!» dep aǵynan jarylady keıbir ini-qaryndastarymyz.
İs júzinde olar 11-12 saǵat jumys isteıdi. Artyq istegen saǵattaryn ótep jatqan eshkim joq. Tipti senbi, jeksenbi kúnderi amalsyz jumysqa shyǵatyndary bar.
Sonda «Eńbek kodesi» kim úshin jazylǵan? Eger Úkimet oryndamasa, mınıstrlikter, ákimshilikter oryndamasa ol kodestiń kimge keregi bar?
Segiz saǵat jumys mindetti. Qyzmetkerlerdi qanaýǵa nege jol beriledi? Jipsiz baılanǵan jerde jóndi nátıje bola ma?
Eger sheneýnikterdiń tań atqannan tún jarymǵa deıin istegeninen ekonomıka gúldenip keter bolsa onda Qazaqstan otyzdyq túgili alǵashqy ondyqqa kirmes pe edi? Alaıda statderekter ekonomıkanyń keri ketip bara jatqanyn aıdan anyq kórsetip tur ǵoı. Eger Úkimet óz jumysyn tıimdi uıymdastyra alsa sharýany altyǵa deıin de tyndyrýǵa bolady.
Sondyqtan keshki saǵat altydan keıin qyzmetkerler eshkimniń ruqsatynsyz úılerine qaıta berýi kerek. Sheneýnikter halyqtan zańǵa baǵynýdy talap eterden buryn tártipke ózderi baǵynýy kerek dep oılaımyn!
Marat Toqashbaev, jýrnalıs
(hat avtordyń Feısbýktaǵy paraqshasynan alyndy)
