جيىندى تۇركىستان وبلىسى اكىمىنىڭ ورىنباسارى ساكەن قالقامانوۆ جۇرگىزىپ وتىردى. كەزدەسۋدە ەل بىرلىگىن كۇشەيتۋ، ءدىنارالىق قارىم-قاتىناستاردى نىعايتۋ جانە رۋحاني الەمدەگى ماسەلەلەر تالقىلاندى.
رۋحاني جۇزدەسۋدە قازاقستان مۇسىلماندارى ءدىني باسقارماسىنىڭ تۇركىستان وبلىسى بويىنشا وكىل يمامى ەركەبۇلان قاراقۇلوۆ، «شىمكەنت ەپارحياسىنىڭ تۇركىستان قالاسىنداعى سۆياتو-نيكولسكيي پريحودى» جەرگىلىكتى پراۆوسلاۆيەلىك ءدىني بىرلەستىگىنىڭ جەتەكشىسى ۆيتاليي سموليانوۆ جانە باسقا دا ءدىن وكىلدەرى ءسوز سويلەدى.
وبلىس اكىمىنىڭ ورىنباسارى ساكەن قالقامانوۆ وبلىستاعى ءدىني كونفەسسيالاردىڭ ءوزارا ىنتىماق-بىرلىگى مەن قوعامداعى ءرولىن ءسوز ەتتى.
– تاۋەلسىز قازاقستاننىڭ 30 جىل ىشىندە قول جەتكىزگەن ماڭىزدى جەتىستىكتەرىنىڭ ءبىرى – قازىرگى زامانعى قازاق قوعامىندا ۇلتارالىق جانە ءدىنارالىق كەلىسىمگە نەگىزدەلگەن الەۋمەتتىك تۇراقتىلىق. الەمدىك جانە ءداستۇرلى دىندەر ليدەرلەرىنىڭ سەزى ەلباسىنىڭ باستاماسىمەن قازاقستاننىڭ استاناسى نۇر-سۇلتان قالاسىندا تۇراقتى ءوتىپ ءجۇر. ءدال ءقازىر ەلىمىزدەگى ءدىن سالاسىنداعى ماسەلەلەر دۇرىس شەشىمىن تاۋىپ قانا قويماي، دۇرىس باعىتتا دامىپ كەلە جاتىر دەپ ايتا الامىز، – دەدى ول.
جيىن سوڭىندا ءدىني كونفەسسيا جەتەكشىلەرىنە مەرەكەگە وراي العىس حاتتار مەن سىيلىقتار تاپسىرىلدى.
بۇگىندە تۇركىستان وبلىسى اۋماعىندا 6 ءدىني كونفەسسياعا ەنەتىن جالپى 784 ءدىني بىرلەستىك جۇمىس اتقارىپ كەلەدى. ولاردىڭ قاتارىندا يسلامدىق ەمەس باعىتتاعى 30 جەرگىلىكتى ءدىني بىرلەستىكتەر مەن ونىڭ 2 فيليالى بار. سونىمەن بىرگە يسلامدىق باعىتتاعى، ياعني، قمدب-نىڭ فيليالدارى بولىپ تابىلاتىن 752 مەشىت ەلگە قىزمەت ەتىپ جاتىر.
