2024 جىلدىڭ ءبىرىنشى توقسانىنداعى ستاتيستيكاعا سۇيەنسەك، باشقۇرتستاننان قازاقستانعا تاسىمالداناتىن قىمىز ءونىمى ەكى ەسە ارتقان، دەپ حابارلايدى Dalanews.kz.
RBC باسىلىمىنىڭ مالىمدەۋىنشە، باشقۇرتستان قىمىزىنىڭ باستى تۇتىنۋشىسى – قازاقستان. قاڭتار-ناۋرىز ايلارىندا باشقۇرت وندىرۋشىلەرى قازاقستانعا 2،5 مىڭ تونناعا جۋىق قىمىز ءونىمى مەن قۇرعاق ءسۇت جونەلتكەن. بۇل وتكەن جىلدىڭ وسى كەزەڭىمەن سالىستىرعاندا 1،8 ەسە كوپ، ياعني 1،3 مىڭ توننانى قۇرايدى.
"ءسۇت ونىمدەرىنىڭ بارلىق 464 پارتياسى قازاقستانعا جىبەرىلمەس بۇرىن ونى روسسەلحوزنادزور دەپارتامەنتى ماماندارى تەكسەرەدى جانە وڭدەيدى. باشقۇرتستاننىڭ ءسۇت ونىمدەرى ەۋرازيالىق ەكونوميكالىق كەڭەس ستاندارتتارىنا سايكەس كەلەدى"، – دەلىنگەن حابارلامادا.
ربك ۋفا حابارلاۋىنشا، 2024 جىلدان باستاپ ەكسپورتتاۋشىلارعا ءسۇت ونىمدەرىن تاسىمالداۋ شىعىنى 100% وتەلە باستاعان. بۇل كەلىسىم فەدەرالدى دەڭگەيدە قابىلدانعان. سەبەبى بۇعان دەيىن ءسۇت ونىمدەرىن ەكسپورتتاۋعا كەتكەن شىعىننىڭ 25 پايىزىن مەملەكەت وتەپ كەلگەن بولاتىن.
ءسۇت ونىمدەرىن ەكسپورتتاۋشىلارعا وتەماقى تولەۋ تەتىگى 2017 جىلى قۇرىلعان. سۋبسيديا الۋشىلار رەسەي فەدەراسياسىنىڭ اۋىل شارۋاشىلىعى مينيسترلىگىمەن كونكۋرستىق نەگىزدە تاڭدالادى-مىس. ولار جونەلتۋ نۇكتەسىنەن سوڭعى الۋشىعا دەيىنگى بارلىق كولىك قۇرالدارىمەن لوگيستيكالىق شىعىنداردى وتەيتىنىن ايتادى. 2023 جىلى وتەماقىنىڭ جالپى سوماسى 11 ميلليارد ءرۋبلدى قۇراعان.
ايتا كەتەيىك، 2023 جىلدىڭ قاڭتار-قاراشا ايلارىندا باشقۇرتستاننىڭ قازاقستانمەن سىرتقى ساۋدا اينالىمى 440 ملن دوللاردى قۇرادى. بۇل 2022 جىلدىڭ سايكەس كەزەڭىمەن سالىستىرعاندا 3،1%-عا ارتىق. وسى كەزەڭدە ەكسپورتتىق قۇرامداس ەكى ەسە ارتىپ، 6،1%-دى قۇرادى. باشقۇرتستاننان قازاقستانعا جەتكىزىلگەن تاۋار كولەمى 365 ميلليون دوللاردان استى.
ءوز كەزەگىندە بۇل اقپارات قازاقستاندىقتاردى تاڭدانىسىن تۋعىزدى. ءبىرى باشقۇرت قىمىزىن ماقتاپ جاتسا، ەكىنشىسى قازاقتىڭ ۇلتتىق سۋسىنىنىڭ وزگە ەلدەن كەلەتىنىن سىناپ تاستادى. ماسەلەن، "قازاقستاندا ودان دا كوپ ساۋىلادى، ساتىلادى. تەك ول ساۋدا كولەڭكەلى نارىقتا جۇرەدى"، "ءبىز وسىنشالىقتى كوپ تۇتىنامىز با؟"، "باشقۇرتستان قىمىزعا، ال نەمىستەر شۇباتقا پاتەنت العان. قازاقستاننىڭ بۇل ونىمدەردى ساتۋعا قۇقىعى جوق" دەگەن پىكىرلەر تولاستاپ جازىلعان.
ەسكە سالايىق، جاقىندا ۇلتتىق ستاتيستيكا بيۋروسى ناۋرىز مەرەكەسى قارساڭىندا ۇلتتىق سۋسىندار ءوندىرىسىنىڭ كورسەتكىشىن جاريالاعان بولاتىن.
بيۋرونىڭ اقپاراتىنا سۇيەنسەك، قازاقستاندا قىمىز 2023 جىل ىشىندە قىمىز ءوندىرىسى 236 تونناعا ارتىپ، شۇبات ءوندىرىسى 61 تونناعا كەمىگەن.
الايدا ەلدە شۇبات ءوندىرىسى 2% تومەندەپ، 3003 توننانى قۇرادى. بۇل الدىڭعى جىلمەن سالىستىرعاندا 61 تونناعا از.
وڭىرلەر اراسىندا ءسۇت ونىمدىلىگى بويىنشا تۇركىستان وبلىسى العاشقى ورىندا تۇر. بيە ءسۇتىنىڭ جالپى كولەمىنىڭ تورتتەن ءبىر بولىگىنە جۋىعى (24،4%) وسى وڭتۇستىك ءوڭىردىڭ شارۋا قوجالىقتارى مەن جەكە قوسالقى شارۋاشىلىقتارىندا الىنادى. قاراعاندى وبلىسىندا دا كورسەتكىش جوعارى: 21،7%.
