ماقتاارال اۋدانىنىڭ اكىمى باقىت اسانوۆ ەڭبەكشى جانە ءيىرجار اۋلىدىق وكرۋگتەرىنە قاراستى ەلدى مەكەندەردى ارالاپ، شارۋا قوجالىقتاردىڭ احۋالىمەن تانىستى.

ەڭبەكشى اۋلىدىق وكرۋگىنە قاراستى 5 ەلدى مەكەندە 5983 تۇرعىن بار. 856 شارۋا قوجالىق 5328 گەكتار ەگىستىك القاپتى يگەرىپ وتىر. سونداي-اق، 13 شارۋا قوجالىق مال بورداقىلاۋمەن، 4 شارۋا قوجالىق شاعىن جانۇيالىق ءسۇت فەرماسىمەن اينالىسۋدا. وكرۋگتە 6 مەكتەپ، 9 بالاباقشا، 1 سۆا، 4 فاپ، 1 كىتاپحانا، 12 ساۋدا نۇكتەسى، 1 جانار جاعارماي قۇيۋ بەكەتى، 1 ماقتا ءجۇن ءتۇتۋ سەحى، 1 ديىرمەن، 1 پوچتا بولىمشەسى تۇرعىندارعا قىزمەت كورسەتۋدە.

ەڭبەكشىنىڭ تۇرعىندارى نەگىزىنەن اۋىز سۋ، كوشەگە اسفالت توسەۋ ماسەلەلەرىن كوتەردى. سونداي-اق، اۋدان اكىمى نۇرلىتاڭ ەلدى مەكەنىندەگى اپاتتى جاعدايداعى كوپىردى ارنايى بارىپ كورىپ، ماسەلەنى شەشۋدى كەلەسى جىلدىڭ جوسپارىنا ەنگىزەتىنىن ايتتى.

مۇنان سوڭ ءوڭىر باسشىسى ءيىرجار اۋلىدىق وكرۋگىنە ايالدادى. تۇرعىندارىنىڭ سانى 10 مىڭنان اساتى وكرۋگتە 9 ەلدى مەكەن بار. ءيىرجارلىقتار دا مال شارۋاشىلىعىن دامىتۋدا ىلگەرىلەپ كەلەدى. وكرۋگتە تۇرعىندار 4720 ءىرى قارا، 1860 ۋاق مالدار، 422 جىلقى، 5615 قۇستى باعىپ وتىر. سونداي-اق، 7439،2 گەكتار ەگىستىك القاپتى شارۋالار يگەرگەن.

ءيىرجار اۋىلدىق وكرۋگىندە 6 مەكتەپ، 2 سۆا، 4 فاپ، 1 مادەنيەت ءۇيى، 1 كىتاپحانا، 3 پوچتا بولىمشەسى، 1 كووپەراتيۆ، 12 ساۋدا نۇكتەلەرى حالىققا قىزمەت كورسەتۋدە. وكرۋگتە جاڭا مەكتەپ عيماراتتارىن سالۋ قارقىندى ءجۇرىپ جاتىر. ءبىلىم كۇنى قارساڭىندا وبلىس اكىمى ج.تۇيمەبايەۆ وسىنداعى ناۋرىز اۋىلىندا ن.بەكەجانوۆ جالپى ورتا مەكتەبىن اشىپ بەرگەن بولاتىن.

ءيىرجارلىقتار دا نەگىزىنەن اۋىزسۋ، كوشەگە اسفالت توسەۋ ماسەلەلەرىن كوتەردى. سونداي-اق، پۋيد-2 باعدارلاماسى بويىنشا تىك درەناجدار مەن كوللەكتورلىق جۇيەلەردى تازالاۋدى تەزىرەك قولعا الۋ كەرەكتىگىن جەتكىزدى.

 

 

ماقتاارال اۋدانى اكىمىنىڭ باسپا ءسوز قىزمەتى