پسيحولوگيادا باقىلاۋ زەرتتەۋ ءادىسى بار. بۇل ءادىس بويىنشا، ءار ءتۇرلى جەكە تۇلعانىڭ ىس-ارەكەتى مەن قىلىقتارىن قابىلداۋدىڭ نەگىزىندە ماقساتتى زەرتتەۋ جۇرەدى. ەڭ قىزىعى، باقىلاۋ جۇرگىزىلگەن كەزدە، ادام باقىلاۋ جۇرگىزىلىپ جاتقانىن بىلمەۋى كەرەك. ەگەر سەزگەن جاعدايدا شىنايىلىق جوعالادى.

باقىلاۋدىڭ ساياسي ناۋقانداعى ورنى ەرەكشە. دەگەنمەن، سايلاۋداعى باقىلاۋدا باقىلاۋشى سايلاۋشى مەن سايلاۋدى ۇيىمداستىرىپ وتىرعان سايلاۋ ۋچاسكەسىنىڭ مۇشەلەرىنە ەش كەدەرگى كەلتىرمەي بايقاپ قانا وتىرۋى ءتيىس. بۇل اكسيوما.

ويتكەنى، سايلاۋ مەملەكەتتىك ساياساتتىڭ دەموكراتيالىق مىزعىماس دامۋ مەحانيزمدەرىنىڭ جالعىز قۇرالى. سوندىقتان، باقىلاۋشىنىڭ ءرولى وسى ساياساتتىڭ قورعانى ءحام قاراۋىلى بولۋى ءتيىس.

جالپى بايقاۋشىنىڭ ءرولى سايلاۋ تۋرالى زاڭمەن رەتتەلگەن. ەگەر زاڭنىڭ سۋبەكتىسى رەتىندە قاراساق، بايقاۋشى سايلاۋدىڭ ءوز تارتىبىندە، زاڭنىڭ بۇلجىماي بۇزىلماۋىن قاداعالايدى.

ەگەر ءتارتىپ بۇزىلسا، باقىلاۋشى ءتيىستى زاڭ بۇزۋشىلىقتى ەسكەرتىپ، تىپتەن بولماسا اكتىگە تىركەپ، كۋاگەرلەردىڭ قولىمەن قۋاتتاپ، ءتيىستى زاڭدى قاداعالۋشى قۇزىرلى مەكەمەلەرگە جولدايدى.

البەتتە، يدەالدى جاعدايدا، سايلاۋ ادىلدىگى وسىلاي ءجۇرۋى كەرەك. ناتيجەسىندە، دالەلدەرى انىقتالىپ، زاڭنىڭ بەلگە باسۋى كورىنگەنى بايقالسا، سوت شەشىمىمەن سايلاۋ جۇرگەن ۋچاسكەنىڭ ناتيجەسى جوققا شىعارىلادى. ال، زاڭسىز ارەكەتكە بارعاندار وزدەرىنىڭ قىلمىستىق جاۋاپكەرشىلىكتەرىن الماسا دا، اكىمشىلىك جاۋاپتارىنا تارتىلۋى بەك مۇمكىن.

ايتپاقشى، قىلمىستىق جاۋاپكەرشىلىككە تارتىلۋ پراكتيكاسى، ۋكرايناداعى سايلاۋدا كييەۆتە 2007 جىلى 17 سايلاۋ ۋچاسكەسىنىڭ ءتوراعالارىنىڭ سوتتالۋىمەن اياقتالعان ەدى. توقەتەرىندە، ول جاقتا سايلاۋداعى زاڭسىزدىقتار توقتالدى.

ەستەرىڭىزدە بولسا، بىزدە دە سوڭعى رەت، مۇنداي جاعدايلار 1999 جىلدارى ورىن الدى. اسىرەسە، قۇرمانعازى №16، جامبىل №24، اباي №53 وكرۋگتەرىنىڭ سايلاۋى جارامسىز دەپ تانىلىپ، اتىراۋ، جامبىل، وڭتۇستىك قازاقستان وبلىسىنىڭ كوميسسيا مۇشەلەرى جاۋاپكەرشىلىككە تارتىلعان بولاتىن. سالدارىنان 47 وكرۋگتە قايتا سايلاۋ وتكىزىلدى.

ال، 2004 جىلى 67 ءبىر مانداتتىق وكرۋگتەن 513 ادام سىنعا ءتۇستى. 22 وكرۋگتە قايتادان سايلاۋ ءوتتى.

ارينە، جوعارىدا اتالعان وقيعالاردا باقىلاۋشىنىڭ قىزمەتى زور. تاۋەلسىزدىك جىلدارى، ءۇشىنشى رەت جۇرەتىن بيىلعى جەكە مانداتپەن تۇسەتىن ارالاس سايلاۋ كەزىندە دە، مۇنداي قوعامدىق تىڭ باقىلاۋ وتە جوعارى بولماق. سەبەبى، بەلگىلى دەموكراتيالىق كەڭ مۇمكىندىكتەردە جەكە ازاماتتاردىڭ باسەكەلەسۋى كۇشەيەدى. سوندىقتان، باقىلاۋشىلىق جاۋاپكەرشىلىگىنىڭ مەملەكەتتىڭ الدىنداعى ماڭىزدى ساياسي قادامدارىندا، تۇسىنە بىلگەنگە ۇلكەن رولگە يە.

الداعى 19-ناۋرىزداعى سايلاۋدا وتاندىق تاۋەلسىز باقىلاۋشىلاردان قۇرالعان بىرنەشە ۇيىم مەنمۇندالاپ، قاتارىن سايلاۋدان-سايلاۋعا ارتتىرىپ، وسى كۇندەرى باقىلاۋشىلارىن وقىتىپ، سايلاۋ كۇنىنە ساقاداي ساي بولۋعا تالپىنۋدا.

سولاردىڭ ىشىندە، اۋقىمدى بايقاۋشى سانىمەن سايلاۋدا كورىنگەن «Baqyla» تاۋەلسىز باقىلاۋشىلار قوزعالىسى، ءۇش جارىم باقىلاۋشىسىمەن ارالاسپاق. ولاردان قالىسپاي، ەكىنشى رەت سايلاۋدى باقىلاۋعا رەسپۋبليكالىق دەڭگەيدە «داۋىس» قوعامدىق بايقاۋشىلار كواليسياسى دا ەكى مىڭنان استام بايقاۋشىسىمەن كىرسپەك.

بۇل جەردە باقىلاۋشىلاردىڭ كوپ بولعانى دۇرىس، ەگەر ەلىمىزدەگى 12 مىڭنان استام سايلاۋ ۋچاسكەلەرى بار دەسەك، سولاردىڭ ءبارىن قامتۋ مۇمكىن ەمەس جاعداي. ءبىراق، باقىلاۋشىلىق ۇردىسىندەگى قادامدار جامان ەمەس. بۇل دا وزىنشە ءبىر دەموكراتياىق تاربيە جۇمىسى، سەبەبى، بايقاۋشىلاردىڭ قاتارى سەكسەن پايىزى جاستاردان قۇرالىپ وتىر.

كوش جۇرە تۇزەلەتىن ساياسي ناۋقاننىڭ باستاماسىندا، كەلەشەككە ءادىل سايلاۋلارعا ءبىر تابان جاقىنداۋ دەپ قابىلداعان ءجون. قالاي دەسەك تە، باقىلاۋشىلىقتان وزگە بالاما قۇرالدار ازىرشە، دەموكراتيالىق قوعامدا ويلاپ تابىلمادى.

ماقسات جاقاۋ، ساياساتتانۋشى.