ق ر ۇلتتىق بانكى مەن ۇلتتىق تولەم كورپوراسياسى بانكارالىق QR تولەمدەرىن ەنگىزۋ بويىنشا پيلوتتىق جوبانى ىسكە قوستى. العاشقى ترانزاكسيا 15 قاراشادا الماتىدا وتكەن قازاقستان قارجىگەرلەرىنىڭ كونگرەسى اياسىندا ەكىنشى دەڭگەيلى ەكى بانكتىڭ قاتىسۋىمەن جاسالدى، دەپ حابارلايدى Dalanews.kz.
بانكارالىق QR تولەم قىزمەتى ازاماتتارعا QR تولەمدەرىن جىلدام جانە ىڭعايلى جۇرگىزۋگە مۇمكىندىك بەرەتىن ۇلتتىق سيفرلىق قارجىلىق ينفراقۇرىلىمنىڭ (NDFI) قۇرامداس بولىكتەرىنىڭ ءبىرى بولىپ سانالادى.
بۇل جاڭاشىلدىق بانكارالىق QR تولەمدەرىن ەنگىزۋ كاسىپكەرلىك سۋبەكتىلەرىنە ءارتۇرلى بانكتەردىڭ بىرنەشە تەرمينالدارىن ورناتۋ قۇنىن تومەندەتۋگە، ال ازاماتتارعا QR-كود ارقىلى ەلدەگى كەز كەلگەن بانكتىڭ تەرمينالى ارقىلى تولەم جاساۋعا مۇمكىندىك بەرەدى. ءوز كەزەگىندە بانكتەر NDFI ينفراقۇرىلىمىنا قاتىسۋ اياسىندا بانكارالىق ترانزاكسيالاردى وڭدەۋ قۇنىن تومەندەتۋ جانە كليەنتتەرگە تولەم قىزمەتتەرىن كەڭەيتۋ ەسەبىنەن شىعىنداردى وڭتايلاندىرۋعا مۇمكىندىك الادى.
قازىرگى ۋاقىتتا بانكارالىق QR تولەم جۇيەسىنىڭ فۋنكسيونالدىعى قامتاماسىز ەتىلىپ، قاتىسۋشى بانكتەردى كەزەڭ-كەزەڭىمەن قوسۋ جۇمىستارى جۇرگىزىلىپ جاتىر. جوبانىڭ كەڭىنەن قولدانىسى 2025 جىلى بولادى دەپ جوسپارلانعان.
بۇعان دەيىن ق ر ۇلتتىق بانكى ۇلتتىق ۆاليۋتا – تەڭگە كۇنىنىڭ قۇرمەتىنە وراي 2025 جىلدىڭ I توقسانىندا جاڭا "سيفرلىق ينۆەستيسيالىق مونەتا" جوباسىن ىسكە قوسۋ جوسپارىمەن بولىسكەن.
قارجىگەرلەر كونگرەسىندە سويلەگەن سوزىندە ۇلتتىق بانك ءتوراعاسى تمۋر سۇلەيمەنوۆ قازاقستان ورتالىق ازيا ايماعىنداعى ەڭ ۇزدىك، ۇلگى الارلىق سيفرلىق ورتالىق بانك قۇرۋعا بەت العانىن، ونىڭ ىشىندە سيفرلىق تەڭگە پلاتفورماسى، Open API & Open Banking پلاتفورماسى مەن ۇلتتىق تولەم جۇيەلەرى سياقتى جوبالار بارىن ايتقان بولاتىن.
