قاداعالاۋ ورگانى بانكتەردىڭ ازاماتتاردان نەسيەلەرى مەن قارىزدارى بويىنشا ارتىق اقشا قاراجاتىن ۇستاپ قالۋ فاكتىلەرىن انىقتادى.
ەڭبەك كودەكسىندە (115-باپ) جانە "قازاقستان رەسپۋبليكاسىندا زەينەتاقىمەن قامسىزداندىرۋ تۋرالى" زاڭدا (23-باپ) تيەسىلى جالاقى مەن زەينەتاقى سوماسىنىڭ 50%-ىنان استامىن ءوندىرىپ الۋعا تىيىم سالىنعان.
"الايدا بانكتەر (Kaspi Bank، ەۋرازيالىق بانك، قازاقستان حالىق بانكى، حوۋم كرەديت ەند فينانس بانك اق) ازاماتتاردىڭ شوتتارىنداعى اقشالاي قاراجاتتارىن بەكىتىلگەن كولەمنەن اسىرا اقشا ۇستاپ وتىرعان.
مىسالى، "Kaspi Bank" اق وسكەمەن قالاسى تۇرعىنىنىڭ ەڭبەكاقى الۋعا ارنالعان بانكتىك شوتى بويىنشا "قازاقستان حالىق بانكى" اق-عا تولەم تالابىن قويعان. وسى تالاپ تۇسكەنگە دەيىن جۇمىس بەرۋشى اليمەنت تولەمدەرى ءۇشىن ەڭبەكاقىسىنىڭ جارتىسىن ۇستاعان بولاتىن. ناتيجەسىندە، بارلىق ۇستالىنعان سومالاردان كەيىن ونىڭ ەسەپ-ايىرىسۋ شوتىندا نەبارى 16 مىڭ تەڭگە (25%) قالعان.
سوت شەشىمىمەن تالاپكەردىڭ پايداسىنا ارتىق ۇستالعان سوما ءوندىرىلىپ الىندى، ءبىراق ول ءۇشىن سوت داۋلارىنا توعىز اي ۋاقىت كەتتى"، دەلىنگەن ق ر باس پروكۋراتۋراسى حابارلاماسىندا.
وسىنداي فاكتىلەر اقتوبە، قاراعاندى، جامبىل، قوستاناي جانە سولتۇستىك قازاقستان وبلىستارىندا دا انىقتالعانى اتاپ وتىلەدى.
قۇزىرلى ۆەدومستۆا بۇل پروبلەما بانكتەردىڭ اقشالاي قاراجاتتىڭ بانكتىك شوتقا تۇسكەنگە دەيىن جۇرگىزىلگەن اتقارۋشىلىق ءىس جۇرگىزۋ بويىنشا ۇستاۋلاردان حاباردار بولماۋىنىڭ سالدارىنان ورىن الىپ جاتقانىن ناقتىلايدى.
"وسىنداي ارەكەتتەردىڭ ناتيجەسىندە قارىز الۋشىلار وزدەرىنىڭ جالعىز تابىس كوزىنەن زاڭسىز ايىرىلعان، بۇل حالىقتىڭ نارازىلىعىن تۋدىرۋدا"، دەلىنگەن رەسمي حابارلامادا.
باس پروكۋراتۋرانىڭ ۇسىنىسى بويىنشا قارجى نارىعىن رەتتەۋ جانە دامىتۋ اگەنتتىگى اتالعان پروبلەمانى كەلەسى شارالاردى قابىلداۋ ارقىلى شەشتى:
- كليەنتتىڭ ءوتىنىشى نەگىزىندە بانكتەردىڭ جانە سوت ورىنداۋشىلارىنىڭ ارتىق تولەنگەن سومانى 5 جۇمىس كۇنى ىشىندە قايتارۋ الگوريتمى قولدانىسقا ەنگىزىلدى؛
- قازاقستان بانكتەرىنىڭ بازاسى اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسىمەن ينتەگراسيالاندى.
بۇل بانكتەرگە بارلىق كرەديتورلاردىڭ ەڭبەكاقى نەمەسە زەينەتاقىدان جالپى ۇستالىنعان سومالاردىڭ زاڭدا بەلگىلەنگەن 50%-دان اسپاۋى ءۇشىن ولاردىڭ كليەنتىنەن قانداي شەگەرىمدەر جاسالعانىن كورۋگە مۇمكىندىك بەرەدى.
زاڭسىز ءوندىرىپ الۋ فاكتىلەرى ورىن العان جاعدايدا ازاماتتار قارجى نارىعىن رەتتەۋ جانە دامىتۋ اگەنتتىگىنە، ونىڭ اۋماقتىق بولىمشەلەرىنە نەمەسە پروكۋراتۋراعا شاعىممەن جۇگىنۋگە قۇقىلى، دەپ سەندىرەدى اگەنتتىك.
