ول 2021 جىلدىڭ 20 قىركۇيەگىندە سوت ورىنداۋشىسىن، ەكى پوليسيا قىزمەتكەرىن، جالپى العاندا بەس ادامدى اتىپ ولتىرگەن. ءىستى الماتى قالالىق سوتى قاراپ جاتىر. بۇگىن سوتتالۋشى سوتتاعى سوڭعى ءسوزىن ايتتى، ول نەبارى 2 مينۋت 48 سەكۋندقا سوزىلدى.
ەڭ الدىمەن سوتتالۋشى ءوزىنىڭ ادۆوكاتتارى نيكولاي حارچەنكو مەن ەكاتەرينا بەزلاتنيەۆاعا تەرگەۋ مەن سوت بارىسىنداعى ەڭبەگى ءۇشىن العىس ايتتى. سونداي-اق تەرگەۋ ءبىرجاقتى جۇرگىزىلدى دەگەن ايىپ تاقتى.
"ءبىزدىڭ ەلدە بارلىعى كرەديت الۋ ارقىلى جاسالادى. ول ازداي بانكتەر ادامدى تونايدى. بانكتىڭ ىشىندە الاياقتار وتىرادى، ولار دا ادامنىڭ اقشاسىن توناۋمەن اينالىسادى. وعان ءبىر دالەل – تۇرعانوۆتىڭ (دۋجنوۆتىڭ قولىنان قازا تاپقان ءۇيدىڭ جاڭا يەسى) 72 اۋكسيونعا جانە كەپىلگە قويىلعان مۇلىك ساۋداسىنا قاتىسۋى، مەنىڭ ءۇيىمدى لاشىق باعاسىنا ساتىپ الۋى. ارينە، تەرگەۋ تاراپىنان بۇعان قاتىستى ەشقانداي سۇراق تۋىندامادى. ءقازىر قازاقستان ازاماتتارى اراسىندا ماتەريالدىق جاعىنان الشاقتىق بار جانە ادىلەتتىلىك سۇرايتىندار كوپ"، - دەدى دۋجنوۆ سوڭعى سوزىندە.
ول سوڭىنا دەيىن وتباسىن ۇيدەن شىعارمايتىنىنا سەنىمدى بولعانىن، سونداي-اق قايتىس بولعان ادامداردى جەك كورۋ سەزىمى بولماعانىن، ءقازىر دە جەك كورمەيتىنىن ايتتى.
"سەبەبى ولار ەلدى قۇرتاتىن جۇيەنىڭ بولىگى. ۋچاسكەلىك پوليسەيلەر ۇيدەن كوشىرۋگە كەلمەستەن بىرنەشە كۇن بۇرىن مەنىڭ وتباسىمدى سوت ورىنداۋشىلارىنان قورعايتىنىن ايتتى. الايدا ابەنوۆ (قايتىس بولعان سوت ورىنداۋشىسى) بەرگەن سىياقى ءۇشىن جوسپارىن وزگەرتتى. ونىڭ ۇستىنە ۋچاسكەلىك ينسپەكتوردىڭ ءبىرى اۋىسىمنان كەيىن دەمالۋى كەرەك ەدى، ياعني ۇيىندە بولۋى كەرەك ەدى"، - دەدى سوتتالۋشى.
ول ايىپتاۋشى تاراپتى زاڭدى وزىنە ىڭعايلى تۇردە قولداندى دەپ ايىپتادى.
"الەمدە سۋيسيد سانى بويىنشا قازاقستان ءۇشىنشى ورىندا تۇر. بۇل وسىنداي زاڭ قىزمەتكەرلەرىنىڭ "ەڭبەگى". مەنىڭ وتباسىم كوپتەگەن زاڭسىز شەشىمنىڭ كەسىرىنەن قيىن جاعدايدا قالدى. ءبىراق مەن ءارقاشان وتباسىمدى جانە قاجەت بولعان جاعدايدا ەلىمدى قورعاۋعا دايىنمىن. وسى وقيعادان كەيىن قازاقستان پرەزيدەنتى ۇيدەن شىعارۋعا موراتوريي ەنگىزىپ، وتانداستارىمنىڭ ءومىرىن ۋلاعان كوپتەگەن زاڭنىڭ كۇشىن جويعانىنا قۋانىشتىمىن. ءبىزدىڭ ەلدە بيلىكتى دەوليگارحيزاسيالاۋ پروسەسى باستالعانىنا قۋانىشتىمىن"، - دەدى يگور دۋجنوۆ.
سوتتالۋشى بەس ادامدى اتىپ ولتىرگەنىن "قازاقستان حالقىنىڭ يگىلىگى ءۇشىن ءىس" دەپ اتادى.
[perfectpullquote align="full" bordertop="false" cite="" link="" color="" class="" size=""]"مەنىڭ بوستاندىققا شىعۋىم ءۇشىن كۇرەس ءالى جالعاسادى. ءسوزسىز جەڭىپ شىعامىز"، - دەپ تۇيىندەدى دۋجنوۆ.
يگور دۋجنوۆتىڭ ءىسى بويىنشا ۇكىم 26 ساۋىردە ساعات 15.00-دە جاريالانادى.[/perfectpullquote]
ايتا كەتەرى، بۇعان دەيىن مەملەكەتتىك ايىپتاۋشى مەن جابىرلەنۋشى تاراپ ءجارىسسوز بارىسىندا يگور دۋجنوۆتى ءومىر بويىنا باس بوستاندىعىنان ايىرۋدى سۇرادى.
2021 جىلدىڭ 20 قىركۇيەگى كەشكە الماتى تۇرعىنى يگور دۋجنوۆ وتباسىن ۇيدەن شىعارۋعا كەلگەن ادامدارعا وق اتتى. بەس ادام قايتىس بولدى: ەكى پوليسەي، ءبىر سوت ورىنداۋشىسى، ءۇيدىڭ جاڭا يەسى مەن ونىڭ وكىلى.
كۇدىكتىنىڭ وتباسىنا تيەسىلى تۇرعىن ءۇي ونىڭ الدىندا بانككە قارىز بويىنشا ءۇشىنشى تاراپقا ساتىلعان. ءۇيدىڭ بۇرىنعى يەسى سوت شەشىمىمەن كەلىسپەي، ءۇيدى بوساتقىسى كەلمەگەن.
سوتتا دۋجنوۆ ادامداردىڭ ولىمىنە بايلانىستى وكىنەتىنىن ايتتى. ول مۇنداي جاعدايعا "زاڭسىزدىق پەن سوت وزبىرلىعى، سوت ورىنداۋشىسىنىڭ زاڭسىز ارەكەتتەرى" سەبەپ بولعانىن ايتتى.
بۇعان دەيىن الدىن الا سوت وتىرىسىندا باس پروكۋراتۋرا دۋجنوۆ قىلمىستى جوسپارلاعان، ول كارابيندى وقتاپ، گاراجعا جاسىرعان دەپ مالىمدەدى.
باس پروكۋراتۋرانىڭ قىلمىستىق قۋدالاۋ قىزمەتىنىڭ اعا پروكۋرورى شىڭعىسحان پۇسىرمانوۆتىڭ ايتۋىنشا، سوت ورىنداۋشىسى، ءۇيدىڭ جاڭا يەسى، ادۆوكاتتىڭ كومەكشىسى اۋلاعا كىرگەن كەزدە دۋجنوۆ قارۋىن الۋعا بارعان.
تەرگەۋ دۋجنوۆتىڭ اۋلاسىنا كىرگەن ادامداردى قابىرعاعا قاز-قاتار تۇرعىزىپ، بىرىنەن سوڭ ءبىرىن اتقانىن انىقتادى. سودان كەيىن ول كوشەگە شىعىپ، سول جەردە تۇرعان پوليسيا قىزمەتكەرلەرىنە وق جاۋدىرعان. ءبىراق ولار كولىكتىڭ ارتىنا جاسىرىنىپ ۇلگەرگەن، ولاردىڭ ءبىرى وق جاۋدىرعان ادامنىڭ قارۋىن تارتىپ الدى.
جالپى العاندا دۋجنوۆ كارابيننەن 10 رەت وق اتقان، ونىڭ ىشىندە توعىزىن سەگىز سەكۋندتا اتتى.
