بالقاش قالاسىندا جەرگىلىكتى تۇرعىن مادينا دوسىمبەكوۆا "قازاقمىس" كومپانياسىنىڭ قىزمەتكەرىن سەگىز جاسار ۇلىن اياۋسىز ۇرىپ-سوعىپ، ازاپتادى دەپ ايىپتادى، دەپ حابارلايدى Dalanews.kz.
ايەلدىڭ ايتۋىنشا، بالاعا جاسالعان ارەكەت جاي عانا زورلىق-زومبىلىق ەمەس، اسا قاتىگەزدىكپەن جاسالعان ازاپتاۋ بولىپ تابىلادى.
"مەنىڭ سەگىز جاسار ۇلىمدى اياۋسىز سوققىعا جىعىپ، ازاپتادى. بۇل جاي عانا كۇش كورسەتۋ ەمەس، ناعىز قيناۋ ارەكەتى بولدى: بالامنىڭ ساۋساقتارىن سىندىرعان، باسىنان ۇرعان، دەنەسىن كۇيدىرگەن. مۇنىڭ ءبارىن ەرەسەك ەر ادام – "قازاقمىس" اق-نىڭ قىزمەتكەرى جاساعان"، – دەيدى اناسى الەۋمەتتىك جەلىدە جاريالاعان بەينەۇندەۋىندە.
مادينا دوسىمبەكوۆانىڭ سوزىنشە، بۇل ءىستى كۇدىكتىنىڭ پوليسيا، اۋرۋحانا جانە باسقا دا مەملەكەتتىك ورگاندارداعى بايلانىستارى ارقىلى جابۋعا تىرىسىپ جاتىر. سوندىقتان ول ادىلدىك ورناۋى ءۇشىن ءىستىڭ قوعام نازارىنان تىس قالماۋىن تالاپ ەتۋدە.
قاراعاندى وبلىسى پوليسيا دەپارتامەنتى بالانى ازاپتاۋ فاكتىسى بويىنشا قىلمىستىق ءىس قوزعالعانىن راستادى. ءقازىر تەرگەۋ جۇمىستارى باستالىپ، سوت-مەديسينالىق ساراپتامالار تاعايىندالعان.
"قازاقمىس" كومپانياسى ءوز تاراپىنان جاعدايعا الاڭداۋشىلىق ءبىلدىرىپ، تەرگەۋ امالدارىنا تولىق قولداۋ كورسەتەتىندەرىن مالىمدەدى.
"كومپانيا كەز كەلگەن زورلىق-زومبىلىق ارەكەتتەرىن قاتاڭ ايىپتايدى جانە مۇنداي جاعدايلارعا جول بەرۋگە بولمايدى دەپ ەسەپتەيدى. ەگەر قىزمەتكەرىمىزدىڭ كىناسى دالەلدەنسە، ول زاڭ اياسىندا ءتيىستى جازاسىن الادى"، – دەلىنگەن باسپا ءسوز قىزمەتىنىڭ مالىمدەمەسىندە.
ەسكە سالا كەتەيىك، بۇگىن سونداي-اق اتىراۋداعى جەكەمەنشىك بالاباقشادا ءۇش جاسار قىز اۋىر جاراقات العانى تۋرالى بەلگىلى بولدى. قىزدىڭ اتا-اناسىنىڭ ايتۋىنشا، بالاباقشا قىزمەتكەرلەرى ولارعا باقىلاۋ كامەراسىنداعى ۆيدەوجازبانى كورسەتپەگەن.
