سوڭعى 3 جىلدا وبلىستا بالىق اۋلاۋ كولەمى 40 پايىزعا وسسە، سونىڭ ىشىندە، كىشى ارال تەڭىزى بويىنشا بالىق اۋلاۋ 33،6 پايىزعا ۇلعايعان. بۇگىنگى تاڭدا، وبلىستا بالىق شارۋاشىلىعىنا ماڭىزى بار كىشى ارال تەڭىزى، سىرداريا وزەنى مەن جەرگىلىكتى ماڭىزدى 179 كول بار. سول كىشى ارال تەڭىزىنىڭ 18 ۋچاسكەسى مەن 149 كول تابيعات پايدالانۋشىلارعا ۇزاق مەرزىمدى پايدالانۋعا بەكىتىلىپ بەرىلگەننەن كەيىن، سىر وڭىرىندە بالىق وڭدەۋ سالاسى قارقىندى دامي باستاعان. ارال، قازالى اۋداندارىندا جىلدىق قۋاتتىلىعى 11 مىڭ توننادان استام 8 بالىق وڭدەۋ زاۋىتتارى جۇمىس ىستەۋدە. شىعارىلىپ جاتقان نەگىزگى ونىمدەر بالىق فيلەسى، ىستالعان، مۇزداتىلعان، قاتىرىلعان بالىق، بالىق ۇنى.
2013 جىلدىڭ سوڭىندا بۇرىنعى «اتامەكەن بالىق وڭدەۋ» زاۋىتى جەرگىلىكتى كاسىپكەرگە جالعا بەرىلىپ، «ارال بالىق وڭدەۋ زاۋىتى» بولىپ قايتا قۇرىلعان بولاتىن. كاسىپورىن اكىمشىلىگى حالىقارالىق ساپا ستاندارتى مەن ەۋروكود الۋ باعىتىندا شارالار جۇرگىزىپ، ءبىراز جۇمىستار اتقارعان. كاسىپورىن بالىق ونىمدەرى نەگىزىنەن ەلىمىزدە الماتى، اقتوبە، اتىراۋ وبلىستارى مەن رەسەي، گرۋزيا مەملەكەتتەرىنە جىبەرىلۋدە. سونىمەن قاتار، اۆستريا، گەرمانيا، پولشا مەملەكەتتەرىمەن كەلىسىمدەر جاسالۋدا. وسىلاي بالىق ونىمدەرىنىڭ ەكسپورتىنىڭ كولەمى ارتىپ كەلەدى. ايتالىق، 2014 جىلى قۇنى 3،1 ملن. دوللار بولاتىن 500 توننادان استام بالىق ونىمدەرى گرۋزيا، دانيا، پولشا، اۆستريا، گەرمانيا مەملەكەتتەرىنە ەكسپورتتالعان. تاۋارلى بالىق شارۋاشىلىقتارىن دامىتۋ وبلىستا وتكەن جىلدان باستاپ قولعا الىنعانى بەلگىلى. سوڭعى 2 جىلدا 9 شارۋاشىلىققا تاۋارلى بالىق شارۋاشىلىعى ستاتۋسى بەرىلدى. الداعى 2-3 جىلدا ولاردىڭ سانىن 20-عا جەتكىزۋ شارالارى جۇرگىزىلمەكشى. وسىعان بايلانىستى، ارال ءوڭىرىنىڭ بالىقشىلىق كاسىبىن ودان ءارى جەتىلدىرۋ ماقساتىندا، وبلىس اكىمدىگى قىزىلوردا وبلىسىندا بالىق شارۋاشىلىعىن دامىتۋدىڭ 2015-2017 جىلدارعا ارنالعان جول كارتاسىن بەكىتتى.
