Sońǵy 3 jylda oblysta balyq aýlaý kólemi 40 paiyzǵa ósse, sonyń ishinde, kishi Aral teńizi boiynsha balyq aýlaý 33,6 paiyzǵa ulǵaiǵan. Búgingi tańda, oblysta balyq sharýashylyǵyna mańyzy bar Kishi Aral teńizi, Syrdariia ózeni men jergilikti mańyzdy 179 kól bar. Sol Kishi Aral teńiziniń 18 ýchaskesi men 149 kól tabiǵat paidalanýshylarǵa uzaq merzimdi paidalanýǵa bekitilip berilgennen keiin, Syr óńirinde balyq óńdeý salasy qarqyndy dami bastaǵan. Aral, Qazaly aýdandarynda jyldyq qýattylyǵy 11 myń tonnadan astam 8 balyq óńdeý zaýyttary jumys isteýde. Shyǵarylyp jatqan negizgi ónimder balyq filesi, ystalǵan, muzdatylǵan, qatyrylǵan balyq, balyq uny.
2013 jyldyń sońynda burynǵy «Atameken balyq óńdeý» zaýyty jergilikti kásipkerge jalǵa berilip, «Aral balyq óńdeý zaýyty» bolyp qaita qurylǵan bolatyn. Kásiporyn ákimshiligi halyqaralyq sapa standarty men eýrokod alý baǵytynda sharalar júrgizip, biraz jumystar atqarǵan. Kásiporyn balyq ónimderi negizinen elimizde Almaty, Aqtóbe, Atyraý oblystary men Resei, Grýziia memleketterine jiberilýde. Sonymen qatar, Avstriia, Germaniia, Polsha memleketterimen kelisimder jasalýda. Osylai balyq ónimderiniń eksportynyń kólemi artyp keledi. Aitalyq, 2014 jyly quny 3,1 mln. dollar bolatyn 500 tonnadan astam balyq ónimderi Grýziia, Daniia, Polsha, Avstriia, Germaniia memleketterine eksporttalǵan. Taýarly balyq sharýashylyqtaryn damytý oblysta ótken jyldan bastap qolǵa alynǵany belgili. Sońǵy 2 jylda 9 sharýashylyqqa taýarly balyq sharýashylyǵy statýsy berildi. Aldaǵy 2-3 jylda olardyń sanyn 20-ǵa jetkizý sharalary júrgizilmekshi. Osyǵan bailanysty, Aral óńiriniń balyqshylyq kásibin odan ári jetildirý maqsatynda, oblys ákimdigi Qyzylorda oblysynda balyq sharýashylyǵyn damytýdyń 2015-2017 jyldarǵa arnalǵan Jol kartasyn bekitti.
