جازعى دەمالىس كەزىندە اتا-انالار بالالارىن دەمالدىرىپ، جاڭا وقۋ جىلىنا پسيحولوگيالىق تۇرعىدان دايىنداۋعا تىرىسادى. ال بولاشاق ءبىرىنشى سىنىپ وقۋشىلارى ءۇشىن بۇل — ۇلكەن ءارى جاۋاپتى قادام. سوندىقتان دا ولاردىڭ مەكتەپكە بەيىمدەلۋىن بارىنشا جەڭىلدەتىپ، باستاپقى مۇمكىندىكتەرىن تەڭەستىرۋ – ماڭىزدى مىندەتتەردىڭ ءبىرى. وسى ماقساتتا ەلىمىزدە ەكىنشى جىل قاتارىنان «بالاقايلار مەكتەبى» اتتى قىسقا مەرزىمدى مەكتەپالدى دايارلىق باعدارلاماسى جۇزەگە اسىرىلۋدا، دەپ حابارلايدى Dalanews.kz.
باعدارلاما ق ر وقۋ-اعارتۋ مينيسترلىگىنىڭ باستاماسىمەن ازىرلەنىپ، مەملەكەتتىك جالپىعا مىندەتتى مەكتەپكە دەيىنگى تاربيە مەن ءبىلىم بەرۋ ستاندارتىنا سايكەس قۇرىلدى. ونىڭ نەگىزگى ماقساتى – مەكتەپكە دەيىنگى ءبىلىم بەرۋ مەن باستاۋىش مەكتەپ اراسىنداعى ساباقتاستىقتى قامتاماسىز ەتە وتىرىپ، بالالاردى وقۋ پروسەسىنە دايىنداۋ.
شامامەن 90 مىڭ بالا قامتىلادى
مينيسترلىكتىڭ مالىمەتىنشە، 2025 جىلدىڭ جازعى ماۋسىمىندا «بالاقايلار مەكتەبىندە» شامامەن 90 مىڭ بالا قامتىلماق. ءقازىردىڭ وزىندە ەكى اي ىشىندە 25 مىڭنان استام بالا قىسقا مەرزىمدى دايىندىق كۋرستارىنان ءوتتى. ال تامىز ايىندا قوسىمشا 5،3 مىڭ توپ قۇرىلىپ، 65،2 مىڭ بالانى قامتۋ جوسپارلانىپ وتىر.
باعدارلامانىڭ مازمۇنى بالانىڭ فيزيكالىق، كوممۋنيكاتيۆتىك، زياتكەرلىك، شىعارماشىلىق جانە الەۋمەتتىك-ەموسيونالدىق داعدىلارىن دامىتۋعا باعىتتالعان. ساباقتار كۇن سايىن 30 مينۋتتان، 10 مينۋتتىق ۇزىلىستەرمەن وتەدى. ولاردى بىلىكتى باستاۋىش سىنىپ مۇعالىمدەرى نەمەسە مەكتەپالدى دايارلىق پەداگوگتەرى جۇرگىزەدى.
مەكتەپكە دەيىنگى بىلىمگە قولجەتىمدىلىك
بۇل باستاما – اسىرەسە بالاباقشاعا بارماعان بالالار ءۇشىن ۇلكەن مۇمكىندىك. وقۋ-اعارتۋ مينيسترلىگى بۇل باعدارلاما ارقىلى مەكتەپكە دەيىنگى بىلىمگە قولجەتىمدىلىكتى ارتتىرىپ، ءبىرىنشى سىنىپ تابالدىرىعىن العاش اتتايتىن بۇلدىرشىندەردىڭ وقۋ پروسەسىنە وڭ كوزقاراسپەن بەيىمدەلۋىن كوزدەيدى.
استاناداعى №71 مەكتەپ-ليسەيدە وسى باعدارلاما اياسىنداعى ساباقتار قىزۋ ءوتىپ جاتىر. ەكىنشى كۇننىڭ تاقىرىبى – «مەنىڭ وتباسىم» بولدى. بالالار ءوز وتباسىلارى تۋرالى اڭگىمەلەپ، اتا-اناسى مەن باۋىرلارى جايىندا ايتىپ بەردى. پلاستيلينمەن جۇمىس جاساپ، وتباسى مۇشەلەرىن بەينەلەپ، رولدىك ويىندار وينادى.
«ۇلىم بالاباقشاعا بارماعان ەدى. ال مەكتەپكە دەگەن العاشقى اسەرى قورقىنىشپەن ەمەس، قۋانىشپەن باستالسا ەكەن دەگەن تىلەگىم بولدى. “بالاقايلار مەكتەبى” سوعان سەبەپ بولدى. ءار كۇن ۇيگە كەلگەن سايىن ءوز اسەرلەرىمەن ءبولىسىپ وتىرادى، مۇعالىمىنە باۋىر باسىپ قالدى. ەڭ باستىسى – بالام مەكتەپكە بارۋعا ءوزى ىنتىق. بۇل — مەن ءۇشىن ەڭ ۇلكەن جەڭىس»، – دەيدى اتا-انا ايسۇلۋ مارات قىزى.
كىشكەنتاي بالا ءۇشىن مەكتەپ – ۇلكەن ءومىردىڭ باستاماسى. «بالاقايلار مەكتەبى» باعدارلاماسى سول ومىرگە العاشقى قادامدى سەنىمدى ءارى ءساتتى جاساۋىنا جول اشادى. وسىنداي باستامالار ارقىلى ءبىلىم بەرۋ جۇيەسى تەك اكادەميالىق بىلىممەن شەكتەلمەي، بالانىڭ پسيحولوگيالىق، ەموسيونالدىق بەيىمدەلۋىنە دە باسا نازار اۋدارىپ وتىرعانى قۋانتادى. شىن مانىندە، كىشكەنتاي قادامدار – ۇلكەن ءبىلىم جولىنا اپارادى.
