سوت Air Astana-نى جاۋاپقا تارتتى. بۇل تۋرالى زاڭگەر دانيلحان شاعاتايەۆ مالىمدەدى، دەپ حابارلايدى Dalanews.kz.

وقيعا 2024 جىلى جەلتوقساندا بولعان. بەس بالا Air Astana اۋەكومپانياسىنىڭ قىزمەتكەرلەرىمەن بىرگە تۇركياعا كەتكەن. ءبىراق 10 جاستاعى بالا كەلگەن بويدا ءتولقۇجاتىن تاپپاي قالعان. ۋاقىتشا قۇجات جاسالعانشا، بالا ەكى كۇن بويى دەپورتاسيا بولمەسىندە جالعىز وتىرعان. سودان كەيىن اۋەكومپانيا كامەلەتكە تولماعاندارعا قىزمەت كورسەتۋگە بالانى زاڭدى وكىلدەن قابىلداۋ، رەيس كەزىندە ونىڭ قاۋىپسىزدىگىن قامتاماسىز ەتۋ جانە كەلگەن كەزدە زاڭدى وكىلگە تاپسىرۋ كىرەتىنىن، ال قۇجاتتار مەن جەكە زاتتارىن باقىلاۋ جولاۋشىعا جۇكتەلەتىنىن مالىمدەگەن.

بالانىڭ اناسى Air Astana ۇستىنەن سوتقا شاعىم ءتۇسىردى.

ادۆوكات دانيلحان شاعاتايەۆ سوتتا كامەلەتكە تولماعاندار جاۋاپكەرشىلىككە تارتىلمايتىندىقتان، جولاۋشىنىڭ ءوزى جاۋاپتى دەگەن اۋە كومپانياسىنىڭ مالىمدەمەسىنە قارسىلىق بىلدىرگەن.

"بالالاردى اۋەكومپانيا قىزمەتكەرلەرىنە بەرۋ جانە ۇشاققا وتىرعىزۋ كەزىندە بارلىق قاجەت قۇجات بولعانى انىقتالدى. سوتتا ءبىرقاتار كۋاگەر، سونىڭ ىشىندە تۇركيادا جولسەرىكتەر مەن جەرۇستى قىزمەت كورسەتۋ قىزمەتكەرلەرىنەن دە جاۋاپ الىندى. ناتيجەسىندە سوت اۋەكومپانيانىڭ بالانىڭ قۇجاتتارىن تەكسەرۋ جونىندەگى ءوز مىندەتتەرىن دۇرىس ورىنداماعانىن انىقتادى"، – دەدى ادۆوكات.

دانيلحان شاعاتايەۆتىڭ ايتۋىنشا، سوت جاڭا اۋە بيلەتتەرىن ساتىپ الۋ، جاڭا ءتولقۇجات راسىمدەۋ ءۇشىن ماتەريالدىق شىعىندى وتەۋ، سونداي-اق، 2 ميلليون تەڭگە كولەمىندە مورالدىق شىعىندى وتەۋ تۋرالى شەشىم شىعاردى. شەشىم زاڭدى كۇشىنە ەنگەن جوق.