بالانا باسقا قالانىڭ اۋەجايىندا قالدىرىپ كەتكەن Air Astana اۋە كومپانياسى ورالدىق تۇرعىنعا وتەماقىسىن تولەدى، دەپ حابارلايدى Dalanews.kz.
كومپانيا جازيرا مۋسينانىڭ قىزىن استانا اۋەجايىندا جالعىز قالدىرىپ كەتكەنى ءۇشىن وتەماقى رەتىندە 5 ملن تەڭگە تولەدى. بۇعان دەيىن كومپانيا سوت ارقىلى وتەماقى كولەمىن ازايتۋعا تىرىسقان ەدى.
ەسكە سالايىق، 12 جاستاعى وقۋشىنى اۋەجايدا جالعىز قالدىرعان Air Astana سوتتا تاعى جەڭىلگەن بولاتىن.
13 قاڭتاردا Air Astana كومپانياسىنىڭ ءوتىنىشىن قاراۋ اياقتالدى. تاسىمالداۋشى «ۇشاقتا ورىن جەتپەگەن» قىزدىڭ اناسىنا بەرىلەتىن مورالدىق وتەماقىنى بەس ميلليون تەڭگەدەن 1،5 ميلليون تەڭگەگە دەيىن ازايتۋدى سۇرادى.
ادۆوكات دانيلحان شاعاتايەۆتىڭ سوزىنشە، اپەللياسيالىق سوت شەشىمدى وزگەرىسسىز قالدىرعان. بۇل تۋرالى ادۆوكات الەۋمەتتىك جەلىدەگى پاراقشاسىندا جازدى. سوت ۇكىمى بويىنشا، كومپانيا زەرەنىڭ اناسىنا ماتەريالدىق وتەماقى رەتىندە بەس ميلليون تەڭگە تولەۋى كەرەك.
بۇل Air Astana-نىڭ ەنشىلەس كومپانياسى FlyArystan-عا قاتىستى وقيعا. كومپانيا قىزمەتكەرلەرى كامەلەتكە تولماعان جولاۋشىنى استانا اۋەجايىندا جالعىز قالدىرىپ كەتكەن بولاتىن.
زەرە جانە زاۋرە ەسىمدى ەگىزدەر بىلتىر 20 شىلدەدە اقش-تان ورال قالاسىنا استانا ارقىلى ۇشىپ جەتپەك بولعان. رەيسكە تىركەۋ كەزىندە FlyArystan قىزمەتكەرلەرى ولاردىڭ تەك بىرەۋىن تىركەپ، زەرەنى جالعىز قالدىرىپ كەتكەن.
قىزمەتكەرلەر بۇل ماسەلەنى شەشە الماي، بالا استانا اۋەجايىندا جالعىز قالىپ قويدى. وسىلايشا زەرە تەك كەلەسى كۇنى ۇشىپ كەتكەن.
