ونىڭ ايتۋىنشا، ءقازىر ەلىمىزدە بالالاردى ۆاكسينالاۋعا بولاتىن ەكپە ءتۇرى جوق.
ءبىزدىڭ بالالارىمىزدىڭ ۆاكسينا الۋىنا مۇمكىندىك بەرۋىمىز كەرەك. ازىرگە ناقتى كۇندى اتاي المايمىز. ءقازىردىڭ وزىندە كوپتەگەن اتا-انالار حابارلاسىپ، بالالارىنا ۆاكسينا ەگۋدى سۇراۋدا، وكىنىشكە وراي، ازىرگە قازاقستاندا مۇنداي ۆاكسينالار جوق. مۇمكىندىك پايدا بولعاننان كەيىن ءبىز وسى نەگىزدەگى قولجەتىمدىلىكتى قامتاماسىز ەتەمىز، - دەدى دەنساۋلىق ساقتاۋ ءمينيسترى وكق-دا وتكەن بريفينگىدە.
ءمينيستردىڭ ايتۋىنشا، بالالارعا ەكپە سالۋ اتا-انانىڭ تاڭداۋى بويىنشا ەرىكتى جۇرگىزىلەدى.
بالالارعا ارنالعان Pfizer ۆاكسيناسىنا كەلەتىن بولساق، ونداي جاعداي تۋىنداسا، بالالارعا ۆاكسينا تەك اتا-اناسىنىڭ كەلىسىمى بويىنشا سالىنادى، - دەدى ول.
جۋرناليستەر سۇراقتى تاعى ناقتىلاي ءتۇستى: مەكتەپ بارۋ ءۇشىن بالالارعا مىندەتتى ۆاكسينالاۋ ەنگىزىلەدى مە؟
تاعى دا قايتالاپ ايتامىن، بىزدە ەكپە تەك اتا-انانىڭ كەلىسىمى بويىنشا سالىنادى، - دەدى سوي.
مينيسترلىك مالىمەتىنشە جىل باسىنان بەرى 34 مىڭ بالا كوروناۆيرۋس ينفەكسياسىن جۇقتىرعان. ءقازىر 558 بالا ستاسيوناردا ەم الىپ جاتىر، 13 جاڭا تۋعان نارەستە كوروناۆيرۋس ينفەكسياسىنا بايلانىستى باقىلاۋعا الىنعان.
وسى شارادا دەنساۋلىق ساقتاۋ ۆيسە-مينيسترى اجار عينايات بالالاردىڭ كوروناۆيرۋس ينفەكسياسىنا ءجيى شالدىعا باستاعانىن اتاپ ءوتتى.
"اۋىر حالدە ءتورت بالا جاتىر: نۇر-سۇلتان، اقمولا، قىزىلوردا جانە جامبىل وبلىستارىندا. ولاردىڭ جاعدايى مۇقيات باقىلاۋعا الىنعان"، - دەدى اجار عينايات.
جىل باسىنان بەرى بالالار اراسىندا ەكى ءولىم تىركەلدى: سولتۇستىك قازاقستان وبلىسىندا جانە نۇر-سۇلتان قالاسىندا.
