"بالالار 5 جىل بويى قۇلدىقتا بولعان". زاكييەۆا ۇلىتاۋداعى سۇمدىق جايت تۋرالى ايتتى

قاراكوز امانتاي 19 اقپ. 2024 13:02 1424

ۇلىتاۋ وبلىسىندا جەتىم بالالار 5 جىل بويى قۇلدىقتا بولعان. ولاردىڭ فەرمادا قارا جۇمىسقا جەگىلگەنى بەلگىلى بولدى. بۇل تۋرالى ق ر بالا قۇقىقتارى جونىندەگى ۋاكىل دينارا زاكييەۆا Instagram-داعى پاراقشاسىندا جازدى، دەپ حابارلايدى Dalanews.kz.

شەنەۋىنىك ۇلىتاۋ وبلىسى اكىمى بەرىك ءابدىعالي ۇلى، پروكۋراتۋرا، ىىم-مەن ءىستىڭ ءمان-جايىن انىقتاۋ ءۇشىن قاجەتتى شارالاردى جۇرگىزگەن.

"اقپاننىڭ باسىندا وبلىستىق پروكۋراتۋرا مەن قامقورشىلىقتىڭ ءموبيلدى توپتارىنىڭ تەكسەرىسى ناتيجەسىندە ءبىر وتباسىنان شىققان ءۇش بالا – 1 قىز جانە 2 ۇل بارى انىقتالدى. پاتروناتتىق تاربيەگە العان وتباسى ولاردى بالالار ۇيىنەن 2018 جىلى العان. بۇل ۋاقىتتا بالالار 14، 12 جانە 8 جاستا بولعان. بالالاردىڭ ۇلكەنىن قالاعا 20 كم قاشىقتىقتاعى ءوز فەرماسىندا ەركىنەن تىس ۇستاپ، مال باعۋعا ماجبۇرلەگەن. فەرمادا ەكى تابىن جىلقى مەن 18 سيىر بار"، - دەپ جازدى زاكييەۆا.

ونىڭ حابارلاۋىنشا، فەرماعا ارنايى بارعان كوميسسيا مۇشەلەرى بالالاردىڭ جاعدايىن كورىپ، جاعالارىن ۇستاعان.

"ولاردىڭ دەنەلەرى كوگەرگەن ءارى تىرتىققا تولى بولدى. سونىمەن قاتار جۇدەۋ، شارشاڭقى، اش، كىر-قوجالاق، كيىمدەرىنىڭ البا-جۇلباسى شىققان. بالالاردى قامقورلىعىنا العان اتا-انا ولاردى وسىلاي ازاپتاپ كەلگەن. ەڭ سوراقىسى قامقورشى 5 جىل بويى بالالارعا جاردەماقى الىپ كەلگەن. ۇلكەن قىز كوللەدجدى ءتامامداعان. الايدا ءىس جۇزىندە ساباققا مۇلدە بارماعان. ورتانشى ۇل كوللەدجدە وقيدى. قۇقىق قورعاۋ ورگانى ءبىلىم مەكەمەسىن تەكسەرسە، اتا-اناسى تاراپىنان ۇنەمى بالالاردىڭ اۋىرعانى تۋرالى انىقتامالار ۇسىنىپ وتىرعان ەكەن. قامقورشى قىزدى جۇمىس ىستەمەسەڭ، نە شاعىمدانساڭ، باۋىرلارىڭدى كورمەيسىڭ دەپ قورقىتقان"، - دەيدى بالا قۇقىقتارى جونىندەگى ۋاكىل.

بەلگىلى بولعانداي، بۇل قامقورشى جاقىندا پاتروناتقا الۋعا بولاتىن باسقا دا بالالار جايلى سۇراستىرعان ەكەن. زاكييەۆانىڭ ايتۋىنشا، بۇل ماسەلە بويىنشا قىلمىستىق ءىس تىركەلىپ، ساراپتاما جۇرگىزىلىپ جاتىر ەكەن.

"ءقازىر بالالار بىرگە ءارى ءقاۋىپسىز جەردە. ءتيىستى پسيحولوگيالىق كومەك كورسەتىلىپ جاتىر. وبلىس اكىمى بالالارعا قولايلى جاعداي جاساپ، كومەك كورسەتۋدى، بالالاردىڭ قايدا تۇراتىنىن، قايدا وقيتىنىن جەكە باقىلاۋىنا الدى. باسىنان باستاپ بالالاردىڭ قاسىندا بولعان وڭىرلىك ۋاكىل گۇلميرا الپىسبايقىزىنا جانە ءماسليحات دەپۋتاتى ەركەبۇلان بودىقوۆقا العىس ايتامىن"، - دەپ ءسوزىن قورىتىندىلادى دينارا زاكييەۆا.

سوڭعى مالىمەتتەرگە سۇيەنسەك،قۇلدىقتا بولعان بالالاردىڭ وگەي اناسى ۇستالىپ، ۋاقىتشا ۇستاۋ يزولياتورىنا قامالعان. 3 بالانى اسىراپ الىپ، قارا جۇمىسقا جەككەندەردىڭ ۇستىنەن قىلمىستىق ءىس قوزعالدى. 


ۇسىنىلعان
سوڭعى جاڭالىقتار
x