Azerbaijan Airlines اقتاۋ ماڭىنداعى ۇشاق اپاتىنان قازا تاپقانداردىڭ وتباسىلارىنا وتەماقى تولەيدى. وتەماقى جەرگىلىكتى بيۋدجەتتەن قاراستىرىلىپ وتىرعان سومامەن سالىستىرعاندا ەكى ەسە كوپ، دەپ جازادى Dalanews.kz.
"ءازىربايجان اۆياجەلىسى" ااق باقىلاۋ كەڭەسىنىڭ شەشىمى بويىنشا 2024 جىلعى 25 جەلتوقساندا J2-8243 - باكۋ-گروزنىي باعىتىنا قاتىناعان Embraer 190 ۇشاعىنىڭ قازاقستان رەسپۋبليكاسىنىڭ تەرريتورياسىندا اپاتقا ۇشىراۋى سالدارىنان زارداپ شەككەن ءاربىر ادامعا 20 000 مانات (6 ملن تەڭگە)، سونداي-اق، ءاربىر قازا تاپقان ادامنىڭ وتباسىلارىنا 40 000 مانات (12 ملن تەڭگە) وتەماقى تولەنەتىن بولادى"، دەلىنگەن اۆياكومپانيانىڭ Telegram ارناسىندا جاريالانعان حابارلاماسىندا.
سونىمەن قاتار، بارلىق جولاۋشى ءازىربايجان رەسپۋبليكاسىنىڭ زاڭناماسىنا جانە حالىقارالىق وزىق تاجىريبەگە سايكەس ساقتاندىرۋ تولەمدەرىن الاتىنى دا ناقتىلانادى.
ايتا كەتسەك، 25 جەلتوقساندا تۇسكە قاراي اقتاۋ ماڭىندا "باكۋ-گروزنىي" باعىتىنا قاتىناعان Azerbaijan Airlines اۋە كومپانياسىنا تيەسىلى ۇشاق اپاتقا ۇشىرادى. ۇشاق اپاتىنان 29 ادام امان قالدى، 38 ادام قازا تاپتى. قازاقستان كولىك مينيسترلىگىنىڭ كەلتىرگەن الدىن الا دەرەكتەرى بويىنشا بورتتا ءازىربايجاننىڭ 37 ازاماتى، قازاقستاننىڭ التى ازاماتى، قىرعىزستاننىڭ ءۇش ازاماتى جانە رەسەيدىڭ 16 ازاماتى بولعان. بارلىعى 67 ادام، ونىڭ ىشىندە بەسەۋى ەكيپاج مۇشەلەرى. قازاقستان كولىك مينيسترلىگى اۆياسيالىق وقيعانى تەرگەۋ جونىندەگى كوميسسيا قۇرىلدى. كوميسسيا رەسەي مەن ءازىربايجاننىڭ قۇقىق قورعاۋ ورگاندارى اۋە اپاتىن تەرگەۋگە جىبەرىلەتىنىن ايتتى.
سونداي-اق كەشە، 26 جەلتوقساندا اقتاۋدا وتكەن باسپا ءسوز ءماسليحاتىندا ەڭبەك جانە الەۋمەتتىك قورعاۋ ۆيسە-مينيسترى ءاقمادي سارباسوۆ اۋە اپاتىنان قازا تاپقان قازاقستاندىقتاردىڭ وتباسىنا قانداي كومەك كورسەتىلەتىنىن جەتكىزدى. ءمينيستردىڭ ايتۋىنشا، رەسپۋبليكالىق بيۋدجەتتەن كەپىلدەندىرىلگەن تولەم بارلىق وتباسىعا بەرىلەدى.ناقتىراق ايتقاندا، اسىراۋشىسىنان ايىرىلعاندارعا 138 مىڭ تەڭگە كولەمىندە جاردەماقى تولەنەدى. سونىمەن قاتار مەملەكەتتىك الەۋمەتتىك ساقتاندىرۋ قورى ارقىلى 257 مىڭ تەڭگە تولەنەدى. ال ءبىر رەتتىك تولەم مولشەرى 5 ميلليون تەڭگە بولادى.
