بەلگىلى اقىن اينۇر تۇرسىنبايەۆانىڭ قىزى استاناداعى «بايتەرەك» مونۋمەنتىنىڭ الدىندا جاياۋ جۇرگىنشىنى قاعىپ كەتتى. 

بۇل تۋرالى today.kz حابارلايدى.

وقيعا 30-شى تامىزدا بولعان. ءقازىر اتالعان جول-كولىك وقيعاسىنا قاتىستى تەرگەۋ جۇمىستارى ءجۇرىپ جاتىر.

Land Rover كولىگىن تىزگىندەگەن 18 جاسار ايدانا كوپبوسىنوۆا 28 جاسار ءمىرجان قاسىمعالييەۆ ەسىمدى ازاماتتى قاعىپ كەتكەن. زارداپ شەككەن ادام سول ساتتە جاياۋ جۇرگىنشىلەرگە ارنالعان جولاقپەن ءوتىپ بارا جاتىپتى.

قاسىمعالييەۆتىڭ اپايى مەرەي ەسكەندىروۆانىڭ ايتۋىنشا، ءمىرجان ءالى اۋرۋحانادا جاتىر. ونىڭ باسسۇيەگى جاراقاتتانىپ، ميىنا زاقىم كەلگەن.

«وعان ءۇش اي بويى تۇرۋعا بولمايدى. باسى اينالادى. كۇنىنە بەس مينۋت وتىرۋعا عانا رۇقسات بەرگەن. جاقىندا مەنىڭ ءىنىمدى قاعىپ كەتكەن قىزدىڭ اناسى حابارلاستى. بىزگە كومەك رەتىندە ەكى ميلليون تەڭگە دايىنداپ قويعانىن ايتتى. الايدا مۇنىڭ ءبارى ءسوز جۇزىندە قالدى. ونىڭ ءسوز ساپتاۋى ۇناعان جوق. مەن ءوز كەزەگىمدە اتالعان سومانىڭ از ەكەنىن، ونىڭ باۋىرىمنىڭ ەم-دومىنا جەتپەيتىنىن ايتتىم» دەيدى مەرەي ەسكەندىروۆا.

زارداپ شەككەن ءمىرجان قاسىمعالييەۆتىڭ تۋىسقاندارى ءىستى سوتقا دەيىن جەتكىزبەك.

«ول زاڭ الدىندا جاۋاپ بەرۋى ءتيىس. ءبىراق، ءبىز قاتتى الاڭداۋلىمىز. وقيعانىڭ كۋاگەرى بولعان ادام مىنە، ەكى اپتا بولدى تەلەفونىن كوتەرمەيدى» دەپ وتىر ەسكەندىروۆا.

ءوز كەزەگىندە اتالعان جاعدايعا قاتىستى اينۇر تۇرسىنبايەۆانىڭ ءوزى پىكىر ءبىلدىرىپتى.

«ءبىز كومەكتەسكىمىز كەلىپ وتىر. ءبىراق ولار باس تارتۋدا. قىزىم ادام قاعىپ كەتكەندە بىردەن جەدەل جاردەم شاقىردى. كۇنبە كۇن اۋرۋحاناعا باردىق. ءبىراق كەيىن زارداپ شەككەن جىگىتتىڭ تۋىسقاندارى ءبىزدى ىشكە كىرگىزبەي قويدى. جىگىتتىڭ تۋىسقاندارى بىزدەن ۇلكەن وتەماقى تالاپ ەتۋدە. ولار بىزدەن 30 مىڭ دوللار سۇراپ وتىر. بىزدە مۇنداي قاراجات جوق…ءبىز كومەكتەسۋدەن باس تارتپادىق. كۇتۋشى جالدايىق دەسەك، كەلىسپەيدى. اقىلى پالاتاعا اۋىستىرعىمىز كەلگەن، ودان دا باس تارتتى. قىزىم اۋرۋحاناعا بارعاندا شەشەسى كىرگىزبەي قويدى. ءىستى زاڭ جۇزىندە شەشەتىن بولامىز، بۇدان وزگە امال جوق» – دەيدى اينۇر تۇرسىنبايەۆا.

ءقازىر اتالعان جول كولىك وقيعاسىنا بايلانىستى تەرگەۋ جۇمىستارى جۇرۋدە.