Bul týraly today.kz habarlaidy.
Oqiǵa 30-shy tamyzda bolǵan. Qazir atalǵan jol-kólik oqiǵasyna qatysty tergeý jumystary júrip jatyr.
Land Rover kóligin tizgindegen 18 jasar Aidana Kópbosynova 28 jasar Mirjan Qasymǵaliev esimdi azamatty qaǵyp ketken. Zardap shekken adam sol sátte jaiaý júrginshilerge arnalǵan jolaqpen ótip bara jatypty.
Qasymǵalievtyń apaiy Merei Eskendirovanyń aitýynsha, Mirjan áli aýrýhanada jatyr. Onyń bassúiegi jaraqattanyp, miyna zaqym kelgen.
«Oǵan úsh ai boiy turýǵa bolmaidy. Basy ainalady. Kúnine bes minýt otyrýǵa ǵana ruqsat bergen. Jaqynda meniń inimdi qaǵyp ketken qyzdyń anasy habarlasty. Bizge kómek retinde eki million teńge daiyndap qoiǵanyn aitty. Alaida munyń bári sóz júzinde qaldy. Onyń sóz saptaýy unaǵan joq. Men óz kezegimde atalǵan somanyń az ekenin, onyń baýyrymnyń em-domyna jetpeitinin aittym» deidi Merei Eskendirova.
Zardap shekken Mirjan Qasymǵalievtyń týysqandary isti sotqa deiin jetkizbek.
«Ol zań aldynda jaýap berýi tiis. Biraq, biz qatty alańdaýlymyz. Oqiǵanyń kýágeri bolǵan adam mine, eki apta boldy telefonyn kótermeidi» dep otyr Eskendirova.
Óz kezeginde atalǵan jaǵdaiǵa qatysty Ainur Tursynbaevanyń ózi pikir bildiripti.
«Biz kómekteskimiz kelip otyr. Biraq olar bas tartýda. Qyzym adam qaǵyp ketkende birden jedel járdem shaqyrdy. Kúnbe kún aýrýhanaǵa bardyq. Biraq keiin zardap shekken jigittiń týysqandary bizdi ishke kirgizbei qoidy. Jigittiń týysqandary bizden úlken ótemaqy talap etýde. Olar bizden 30 myń dollar surap otyr. Bizde mundai qarajat joq…Biz kómektesýden bas tartpadyq. Kútýshi jaldaiyq desek, kelispeidi. Aqyly palataǵa aýystyrǵymyz kelgen, odan da bas tartty. Qyzym aýrýhanaǵa barǵanda sheshesi kirgizbei qoidy. Isti zań júzinde sheshetin bolamyz, budan ózge amal joq» – deidi Ainur Tursynbaeva.
Qazir atalǵan jol kólik oqiǵasyna bailanysty tergeý jumystary júrýde.
