مەكتەپ مۇعالىمدەرى بۇل جاعدايعا نارازىلىق ءبىلدىرىپ، "ushtobeqz" رەسمي پاراقشاسىنا جازعان. بۇل تۋرالى Dalanews.kz Azattyq Rýhy باسىلىمىنا سىلتەپ حابارلايدى.
ءاتى-جونىن اتاماۋدى وتىنگەن قىزمەتكەر "ديرەكتور پەداگوگتەردىڭ كاسىبي مىندەتىنە كىرمەيتىن جۇمىستاردى ىستەتىپ، اقشا جينادى" دەيدى.
"دارحان جۇماحان ۇلى كارانتين كەزىندە، مەكتەپتىڭ كۇردەلى جۇمىسى بىتپەگەنىنە قاراماستان مۇعالىمدەردى مەكتەپتىڭ دالىزدەرى مەن كابينەتتەرىن جۋىپ-شايۋعا شاقىردى. ول مەكتەپكە مۇعالىمدەرگە كىرۋگە رۇقسات جوق. سەبەبى مەكتەپ كۇردەلى جوندەۋدەن كەيىن ارنايى كوميسسيامەن قابىلداپ الىنعان جوق.
سونىمەن قاتار مەكتەپتىڭ بارلىق ستەندتەرىنە اقشا ءبولىندى دەپ جينالىستا ايتقان بولاتىن، ءبىراق مۇعالىمدەر مەن دەنە شىنىقتىرۋ ءپانى مۇعالىمدەرىنەن ستەندكە دەپ اقشا جيناپ الدى. مۇعالىمدەر بار شىندىقتى ايتۋعا قورقادى. ويتكەنى جۇمىسىنان ايىرىلىپ قالامىن با دەپ ويلايدى.
بۇل ديرەكتور ەشقانداي پەداگوگيكالىق مادەنيەتتى بىلمەيدى. مۇعالىمدەرمەن قارىم-قاتىناس دۇرىس ورناتا المايدى. جۇمىسقا ديپلومى جوق مۇعالىمدەردى قابىلدادى. ءوزى جۇمىسقا قابىلداعان دەنە شىنىقتىرۋ ءپانىنىڭ مۇعالىمدەرى جارتى جىلدان استام جۇمىسقا كەلگەن جوق. بۇل ديرەكتوردىڭ زاڭسىز ارەكەتتەرى كوپ"،- دەدى پەداگوگ.
الماتى وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتى بۇل ىسكە قاتىستى تۇسىندىرمە بەردى.
"اعىمداعى جىلدىڭ 23 تامىزىندا الماتى وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىندە قازاقستان رەسپۋبليكاسىنىڭ "پەداگوگ مارتەبەسى تۋرالى" زاڭى تالاپتارىنىڭ پەداگوگتەردى كاسىپتىك مىندەتتەرىمەن بايلانىستى ەمەس جۇمىس تۇرلەرىنە تارتۋ جاعىنان بۇزىلۋ فاكتىسى قارالدى. قارالۋ ناتيجەسى بويىنشا قاراتال اۋدانى پۋشكين اتىنداعى ورتا مەكتەبىنىڭ باسشىسى جۇماحان ۇلى دارحان قازاقستان رەسپۋبليكاسى "اكىمشىلىك قۇقىقبۇزۋشىلىق تۋرالى" كودەكسىنىڭ 409-بابىنىڭ 7-3 بولىگى 1-تارماعى بويىنشا اكىمشىلىك قۇقىقبۇزۋشىلىق جاساعانى ءۇشىن كىنالى دەپ تانىلدى"، - دەدى دەپارتامەنتتىڭ باسپا ءسوز قىزمەتى.
مەكتەپ باسشىسىنىڭ تەك “سوگىسپەن” عانا قۇتىلىپ كەتكەنىنە مۇعالىمدەر نارازى ەكەنىن ايتتى.
"ديرەكتورعا بار بولعانى سوگىس بەرگەن. نەگە مۇنداي ءىستى جاۋاپتى ورگاندار دۇرىستاپ تەكسەرمەيدى؟! ول كىسىنىڭ زاڭ بۇزۋشىلىق ارەكەتتەرى جەتىپ ارتىلادى. بىزدەگى ءاربىر پەداگوگ ءاتى-جونىمىزدى اشىپ ايتۋعا قورقامىز، ەرتەڭ جۇمىسىمىزدان ايىرىلىپ قالساق، بالا-شاعامىزدى كىم اسىرايدى؟! ونسىزدا وسى شۋدان كەيىن ديرەكتور مەكتەپكە كەلىپ، وكپەسىن ايتىپ رەنجىدى. بىزدەگى ءبىلىم باسقارماسىنان بىر-ەكى ادام كەلدى دە، ءبارىن جىلى جاۋىپ قويا سالدى. ءبىز ادىلەتتىلىكتىڭ ورنايتىنىنا سەنبەيتىن بولدىق"،- دەدى نارازى مۇعالىمدەردىڭ اتىنان سويلەپ تۇرمىن دەگەن ۇستاز.
