قازاقستان رەسپۋبليكاسى اۋىل شارۋاشىلىعى ءمينيسترى ايداربەك ساپاروۆ تۇركىستان وبلىسىنا جۇمىس ساپارىمەن كەلىپ، شەگىرتكە زيانكەسىنە قارسى جۇرگىزىلىپ جاتقان كۇرەس بارىسىن باقىلادى،- دەپ حابارلايدى Dalanews.kz
مينيستر ارىس قالاسى، قوجاتوعاي اۋىلىنا بارىپ، ارنايى شتاب مۇشەلەرىمەن بىرگە ارىس وڭىرىندە شەگىرتكەگە قارسى جۇرگىزىلىپ جاتقان قورعاۋ شارالارىمەن تانىستى. وڭدەلگەن اۋماقتاردى ارالاپ، جاۋاپتى مەردىگەرلەر مەن ق ر اشم اگروونەركاسىپتىك كەشەندەگى مەملەكەتتىك ينسپەكسيا كوميتەتىنىڭ تۇركىستان وبلىستىق اۋماقتىق ينسپەكسياسىنىڭ باسشىلىعىمەن كەزدەستى.
– پرەپاراتتار جەتكىلىكتى، تەحنيكا، سونىڭ ىشىندە دروندار بار. باقىلاۋدى كۇشەيتىڭىزدەر. بارلىق وڭدەۋ جۇمىستارى ساپالى ءارى ۋاقىتىلى ورىندالۋى ءتيىس. شەگىرتكە قاناتتانىپ ۇلگەرمەۋى كەرەك، – دەدى ايداربەك ساپاروۆ.
بولجامعا سايكەس، 2025 جىلى تۇركىستان وبلىسىندا ءۇيىرلى شەگىرتكەلەردىڭ تارالۋى 372 مىڭ گەكتار اۋماقتى قامتۋى مۇمكىن. اۋىل شارۋاشىلىعىنا كەلەتىن زالالدى بولدىرماۋ ماقساتىندا وڭىردە حيميالىق وڭدەۋ جۇمىستارى قارقىندى جۇرگىزىلۋدە. بۇگىنگى تاڭدا 352،4 مىڭ گەكتار جەر وڭدەلدى.
3 ساۋىردەن باستاپ ارىس قالاسىندا ورنالاسقان باس شتابتا جۇمىستار كۇندەلىكتى ۇيلەستىرىلۋدە. شەگىرتكە زيانكەسى قونىستانعان 9 اۋدانداعى جايىلىم جەر القاپتارىنىڭ 15 مىڭ گەكتاردان بولىنگەن كارتاسى ازىرلەنىپ، جالپى 65 اۋماقتا جۇمىسشى توپ جاساقتالدى.
العاشقى انىقتالعان دەرناسىل ساتىسىندا حيميالىق وڭدەۋ جۇرگىزىلدى. دەرناسىل ساتىسىندا اسپالى بۇرىككىشپەن وڭدەۋدىڭ تيىمدىلىگى انىقتالىپ، جوسپارلانعان 475 بۇرىككىشكە قوسىمشا 434 دانا بۇرىككىش الىنىپ، جالپى 909 اسپالى بۇرىككىشپەن (ارىس – 420، سارىاعاش – 205، كەلەس – 230، شاردارا – 44، ورداباسى – 10) جۇمىستار جۇرگىزىلۋدە. شەگىرتكەنىڭ 2-3 جاس كەزەڭىندە حيميالىق وڭدەۋگە «تيامەترين» جانە «كاراتە» سۇيىق پرەپاراتتارى قولدانىلسا، 4 جاس كەزەڭىنەن باستاپ «اسەت 200» ۇنتاق تۇرىندەگى پرەپارات جۇمسالۋدا. ناۋقانعا 2730 ادام قاتىسۋدا، ونىڭ 1590-ى – انىقتاۋشى. القاپتار 273 جەر ءۇستى بۇركۋ تەحنيكالارىمەن، 54،2 مىڭ گەكتار اۋە ارقىلى 4 «ان-2» ۇشاعىمەن جانە كولىك بارا المايتىن ايماقتار 7 درونمەن وڭدەلدى. ۇزدىكسىز جۇمىس ىستەۋ 48 سۋ تاسيتىن اۆتوكولىك قىزمەت ەتۋدە. بۇدان بولەك، 50 مىڭ گا اۋماق (ارىس – 32 مىڭ گا، سارىاعاش – 18 مىڭ گا) اقمولا وبلىسىنىڭ «اگرو ليۋكس» ءجشس-نىڭ 3 گازوگەنەراتورىمەن وڭدەلدى.
جوسپارلارعان اۋماق وڭدەلىپ، اۋىل شارۋاشىلىعى داقىلدارىنىڭ زاقىمدالۋى مەن زيانكەستەردىڭ باسقا وڭىرلەرگە تارالۋىنا توسقاۋىل قويىلدى.
