وسى جىلدىڭ 2 ناۋرىزىنان باستاپ ينفليۋەنسەرلەر (بلوگەرلەر) كوممەرسيالىق نەمەسە شارتتىق نەگىزدە ورنالاستىراتىن ونلاين-جارنامانى تاڭبالاۋعا ءتيىس. بۇل تۋرالى مادەنيەت جانە اقپارات ءمينيسترى ايدا بالايەۆا Facebook-تەگى پاراقشاسىندا جازدى، دەپ حابارلايدى Dalanews.kz.
"بىلتىر 10 شىلدەدە مەملەكەت باسشىسى "ونلاين-پلاتفورمالار جانە ونلاين-جارناما تۋرالى" زاڭعا قول قويدى. زاڭ جوباسى قازاقستاندا ءقاۋىپسىز ونلاين ورتا قۇرۋعا باعىتتالعان. قۇجاتتاعى كورسەتىلگەن نەگىزگى قۇقىقتىق تەتىكتەردىڭ ءبىرى – جەلىدەگى جارنامانى تاڭبالاۋ مىندەتتەمەسى. ءبىز زەرتتەگەن حالىقارالىق تاجىريبە كورسەتكەندەي، جەتەكشى ەلدەر ونلاين-جارنامانىڭ ماڭىزدى ءرولىن جانە ونى ونلاين-پلاتفورمالاردا كورسەتۋ تەتىكتەرىنە ەرەكشە نازار اۋدارادى. سونىمەن قاتار ونلاين-جارنامانىڭ اشىقتىعىن ارتتىرۋعا باعىتتالعان تالاپتاردى كوزدەيدى"، دەلىنگەن جازبادا.
وسى رەتتە مينيستر "ادىلەت" پورتالىندا جەلىدەگى جارنامانى تاڭبالاۋ ەرەجەلەرىن بەلگىلەيتىن بۇيرىق جاريالانعانىن جازدى. ول ەرەجە 2 ناۋرىزدان باستاپ كۇشىنە ەنەدى.
"ەرەجەلەر بيزنەسكە اسەر ەتۋ ءۇشىن وڭ باعالانعانىن جانە تولىعىمەن قازاقستاننىڭ ونلاين سەگمەنتىندە كەڭ تارالعان قازىرگى تاجىريبەگە نەگىزدەلگەنىن اتاپ ءوتۋ قاجەت. وسى ەرەجەلەردى قالىپتاستىرۋ كەزىندە كوممەرسيالىق نەگىزدە ورنالاستىرىلعان كونتەنتتى ءوز بەتىنشە بەلگىلەيتىن مەديا-سۋبەكتىلەر تاجىريبەسىنە سۇيەندىك. ءبىز ءوز كەزەگىمىزدە وسى ترەندتى قازاقستان رەسپۋبليكاسىنىڭ بۇكىل ينتەرنەت كەڭىستىگىنە تاراتۋ ءجون دەپ ەسەپتەيمىز"، دەپ جازدى ايدا بالايەۆا.
وسى ەرەجەگە سايكەس ينفليۋەنسەرلەر (بلوگەرلەر) كوممەرسيالىق نەمەسە شارتتىق نەگىزدە ورنالاستىراتىن ونلاين-جارنامانى تاڭبالاۋعا ءتيىس. ولار جاريالانىمنىڭ باسىندا نەمەسە سوڭىندا ونلاين ورتادا بەلسەندى قولدانىلاتىن تومەندەگىدەي تۇجىرىمداردىڭ ءبىرىن كورسەتۋ كەرەك:
- «جارناما»؛
- «جارنامالىق ماتەريال»؛
- «سەرىكتەستىك ماتەريال»؛
- «دەمەۋشىلىك ماتەريال»؛
- «جارناما قۇقىعىندا»؛
- «دەمەۋشىمەن تولەنگەن»؛
- «PR قۇقىعىندا»؛
الەۋمەتتىك جارنامانى (قايىرىمدىلىق جانە كوممەرسيالىق ەمەس سيپاتتاعى باسقا دا قوعامدىق پايدالى ماقساتتارعا قول جەتكىزۋگە باعىتتالعان) جانە جەدەل حابار الماسۋ قىزمەتتەرىندە (مەسسەندجەرلەر) ورنالاستىرىلاتىن جارنامانى بەلگىلەۋدىڭ قاجەتى جوق.
