مەملەكەتتىك باعدارلاما اياسىندا بوي كوتەرگەن وتباسىلىق جاتاقحانانىڭ قۇرىلىسى وتكەن جىلى باستالعان ەدى. اراعا سالعان از ۋاقىتتا قالانىڭ جاس ۇستازدارى، دارىگەرلەرى مەن مادەنيەت جانە سپورت سالاسىنىڭ قىزمەتكەرلەرى جەكە باسپانالارىنا قول جەتكىزدى. ايتا كەتۋ كەرەك، جالدامالى تۇرعىن ءۇي بەس جىلعا دەيىن بەرىلەدى. ال قۇرىلىسقا جۇمسالعان 300 ملن تەڭگە جەرگىلىكتى قازىنادان بولىنگەن.
– جاڭا پاتەر – باقىتتى كۇندەردىڭ باستاۋى. ءبىزدىڭ تاماشا ەلىمىز، كەڭ-بايتاق جەرىمىز بار. وسى جىلدار قازاق ەلىنە، قازاقستاندىقتارعا التىن زامان بولاتىن كەز. تاريحقا التىن ارىپپەن جازىلاتىن ءبىزدىڭ ۇلى پرەزيدەنتىمىز، تاماشا حالقىمىز بار. التىن زامان تۋدى، وسىنى ءبىلۋىمىز كەرەك، قۇرمەتتى جەرلەستەر! سىزدەردىڭ بۇگىنگى قۋانىشپەن شىن جۇرەكتەن قۇتتىقتايمىن. بىرگە باقىتتى بولايىق! – دەدى وبلىس اكىمى دانيال احمەتوۆ.
ءوز كەزەگىندە جاستار اتىنان ءسوز العان اسەم نۇرمۇحامەتوۆا: «بۇگىن ەكى بولمەلى پاتەر الىپ، قۋانىپ جاتىرمىز. ءمۇعالىممىن. بىرنەشە جىل پاتەر جالداپ تۇردىق. ەندى، مىنە، مەملەكەتىمىزدىڭ جاستاردى قولداۋعا ارنالعان باعدارلاماسىنىڭ جەمىسى كورىپ وتىرمىز. كوپ راقمەت!»، – دەپ، العىسىن جەتكىزدى.
سونداي-اق بۇل كۇنى جەرگىلىكتى الەۋمەتتىك كومەك كورسەتۋ ورتالىعىنا وبلىس اكىمى ۋادە ەتكەن ينۆاكولىكتىڭ كىلتى تابىس ەتىلدى. ول ءۇشىن جەرگىلىكتى بيۋدجەتتەن 10 ميلليون تەڭگە بولىنگەن.
دانيال احمەتوۆ اياگوز اۋدانىنا جاساعان جۇمىس ساپارى بارىسىندا «نۇرلى جول» باعدارلاماسى بويىنشا ەكى مەكتەپتىڭ قۇرىلىسىمەن تانىستى. اتالعان باعدارلاما بويىنشا اۋداندا بيىل ءبىر مەكتەپ قولدانىسقا بەرىلسە، ەكىنشىسى كەلەر جىلى وقۋشىلارعا ەسىگىن ايقارا اشپاق. اۋدان ورتالىعىندا ورنالاسقان 600 ورىندىققا شاقتالعان مەكتەپ-ليسەيدىڭ قۇرىلىسى بىلتىر جەلتوقساندا باستالعان. قۇنى 1 ميلليارد تەڭگەدەن اساتىن نىساندى مەردىگەرلەر مەرزىمىنەن بۇرىن وتكىزگەلى وتىر. جاڭا مەكتەپ اشىلسا، قالاداعى ءۇش اۋسىمدا وقىتۋ ماسەلەسى شەشىلەدى. بۇگىندە اياگوزدە ءبىلىم بەرۋ مەكەمەلەرىندە 1800 بالاعا ورىن تاپشى. اتالعان كورسەتكىشتى ەسەلەمەس ءۇشىن كوكتەمدە 500 ورىندىق ارالاس باستاۋىش مەكتەبى اشىلعان ەدى.
– اياگوز – ەرەكشە اۋدان. مەكتەپ مۇعالىمدەرى تاماشا ءبىلىم كورسەتكىشتەرىن كورسەتىپ وتىر. وسى جىلى ەلىمىزدە 8 بالا ۇبت-دان 138 بالل السا، ونىڭ ەكەۋى اياگوزدىكى. باسقا اۋدان-قالالار ۇلگى الۋى كەرەك. الداعى تاڭدا ەكى مەكتەپ ىسكە قوسىلسا، اۋدانداعى وزەكتى ماسەلە – ءۇش اۋىسىم جاعدايىن ءبىرجاقتى ەتەمىز. سونداي-اق «تۋعان مەكتەپ» جوباسى باستالعانىن اتاپ وتكىم كەلەدى. ونىڭ اياسىندا وڭىردەگى بارلىق مەكتەپتەردى 3 ميللارد تەڭگەگە زامان تالابىنا ساي قۇرال-جابدىقتارمەن قامتۋدى جوسپارلاپ وتىرمىز، – دەدى شقو اكىمى دانيال احمەتوۆ.
كەلەر جىلى وڭتۇستىك اسكەريلەر قالاشىعىنداعى 600 ورىندىق مەكتەپ ىسكە قوسىلماق، سوندا اياگوزدە ءۇش اۋىسىمدا وقىتۋ تولىق جويىلادى.
