اياگوز اۋدانى اكىمدىگىنىڭ ءدىن سالاسىنداعى مەملەكەتتىك ساياساتتى جۇزەگە اسىرۋداعى ءدىني بىرلەستىكتەرمەن ءوزارا ءىس-قيمىل جونىندەگى جۇمىستاردى بارىنشا جۇرگىزىپ كەلەدى. اۋداندا قوعامدىق-ساياسي تۇراقتىلىقتىڭ ساقتالۋى ءۇشىن ءدىني بىرلەستىكتەرمەن قارىم-قاتىناستى نىعايتۋ ماقساتىندا اياگوز اۋدانىنىڭ اكىمى جانىنداعى ءدىني بىرلەستىكتەرمەن بايلانىس جونىندەگى كەڭەس 2002 جىلدان باستاپ جۇمىس ىستەيدى. كەڭەس وتىرىسىندا اۋداننىڭ وزەكتى ءدىني ماسەلەلەرى قاراستىرىلادى.
اياگوزدەگى ءدىن ماسەلەلەرى جونىندەگى اقپاراتتىق-ناسيحات توپتارى ناقتىلى جۇمىستار جۇرگىزۋدە. توپ قۇرامىندا ارنايى ماماندار، قوعامنىڭ كوشباسشىلارى، بەلسەندى جاستار، بارلىعى – 76 ادام ەنىپ وتىر. جىل باسىنان اقپاراتتىق-ناسيحات توبىنىڭ مۇشەلەرى 10151 ادام قامتىعان 121 كەزدەسۋ وتكىزگەن.
تۇرعىندارعا ءداستۇرلى يسلامدى ءتۇسىندىرۋ ماقساتىندا اۋدانعا رەسپۋبليكا، وبلىس كولەمىندە بەلگىلى ءدىنتانۋشىلار شىعىس قازاقستان وبلىسى، وسكەمەن ءوڭىرىنىڭ بۇرىنعى وكىل يمامى نۇرلان اسانوۆ، سەمەي قالاسى ورتالىق مەشىتىنىڭ نايب-يمامى باۋىرجان بالتابەكوۆ، رەسپۋبليكالىق اقپاراتتىق-ناسيحات توپ مۇشەسى، تەولوگ ارمان قۋانىشبايەۆ پەن نۇربول تاعايەۆ جانە سەمەي قالاسى ورتالىق مەشىتىنىڭ نايب-يمامى بەكزات باەشوۆ شاقىرىلدى.
مەديا-جوسپارعا سايكەس دىني-ەكسترەميزم مەن تەرروريزمگە قارسى ءىس-قيمىل جونىندەگى 2013-2017 جىلدارعا ارنالعان مەملەكەتتىك باعدارلامانىڭ ىسكە اسىرىلۋى تۋرالى جەرگىلىكتى بۇقارالىق اقپارات قۇرالدارىندا 37 ماقالا جاريالاندى. اۋدان بويىنشا ەكسترەميزمگە قارسى سيپاتتاعى 29 باننەر ورنالاستىردىق. سونىمەن قاتار، 3200 دانا تاراتپا ماتەريالدار شىعارىلىپ، اقپاراتتىق-ناسيحات توبىنىڭ جۇمىسىندا تاراتىلدى.
جاستاردىڭ الەۋمەتتىك جەلىلەرگە قىزىعۋشىلىعىن ەسكەرە وتىرىپ Facebook، ۆكونتاكتە الەۋمەتتىك جەلىلەرىندە ءدىني ەكسترەميزم كورىنىستەردىڭ الدىن الۋ ءۇشىن 104 ماتەريال ورنالاستىرىلدى. سونىمەن قاتار قالانىڭ ورتالىق الاڭىندا ورنالاسقان LED ەكران ارقىلى كۇنىنە 8 ءدىني بەينەروليكتەر كورسەتىلىپ، 30 اقپاراتتتىق ماتەريالدار ورنالاستىرىلعان.
اۋداننىڭ 22 مەشىتىندە مۋفتياتتىڭ بۇيرىعىمەن 18 يمام قىزمەت اتقارۋدا. قالعان 4 مەشىتتە ءدىني ساۋاتتىلىعى بار اۋىلدىڭ ۇلكەندەرىنە بەكىتىلگەن.
اعىمداعى جىلى اۋدانىمىزدىڭ باس يمامى مىسىر استاناسى كاير قالاسىندا ورنالاسقان ءال-اسھار ۋنيۆەرسيتەتىندە بىلىكتىلىگىن ارتتىرۋ كۋرسىنان ءوتتى. سونداي-اق، اۋىلدىق وكرۋگتەردىڭ 15 يمامى بىلىمدەرىن جەتىلدىرىپ، 3 يمام (مامىرسۋ، قوساعاش، ەمەلتاۋ) قازاقستان مۇسىلماندارى ءدىني باسقارماسىنىڭ يمامدار ءبىلىمىن جەتىلدىرۋ ينستيتۋتىن بىتىرگەنىن ايتۋعا ءتيىسپىز. 12 يمام سەمەي جانە اياگوز قالالىق مەشىتتەرىندە بىلىمدەرىن جەتىلدىردى. 2015 جىل «استانا» مەدرەسەسىن ءتامامداعان مامانداردىڭ ۇلەسىمەن اۋىلدىق وكرۋگتەردەگى بوس ورىندار تولىقتى.
كادر ماسەلەسىن شەشۋ ماقساتىندا «نۇر-مۇباراك» مىسىر يسلام مادەنيەتى ۋنيۆەرسيتەتىنىڭ ستۋدەنتتەرىمەن كەزدەسۋ جۇمىستارى جۇرگىزىلدى. بولاشاقتا ءدىن سالاسىندا قىزمەت اتقارۋ ءۇشىن بيىلعى جىلى اۋدانىمىزدان 7 جاس وقۋعا ءتۇستى. ولاردىڭ ەكەۋى «نۇر-مۇباراك» مىسىر يسلام مادەنيەتى ۋنيۆەرسيتەتىنە جانە بەسەۋى مەدرەسەلەرگە قابىلداندى.
اۋدان تۇرعىندارىنا ءتۇسىندىرۋ جۇمىستارىنىڭ تيىمدىلىگىن ارتتىرۋ ماقساتىندا اۋدان مەشىتتەرىنە 2 تەلەديدار جانە بەينەباقىلاۋ قۇرىلعىسى، سونىمەن قاتار، ونلاين رەجيمىندە اقپاراتتىق-ناسيحات جۇمىستارىن جۇرگىزۋگە 2 پروەكتور بەرىلدى. قازاقستان مۇسىلماندارى ءدىني باسقارماسىنىڭ فيليالىمەن بىرلەسە وتىرىپ ءدىني احۋالدى جاقسارتۋ ماقساتىندا جاڭا جۇمىس ادىستەرى قولدانىلۋدا. ورتالىق مەشىت جانىنان نايب-يمامنىڭ باستاۋىمەن بەلسەندى جاستاردان ارنايى توپ قۇرىلعان. بۇل توپتىڭ اۋدان اكىمدىگىنىڭ جاستار ورتالىعىمەن بىرلەسكەن جۇمىس جوسپارى دايىندالدى. مەشىت جانە ورتالىق جاستارىمەن كوپتەگەن ءىس-شارالار وتكىزۋدە. قىسقى ۋاقىتتا جاستار جالعىزباستى قارتتارعا قار تازالاۋعا، ءۇي جۇمىستارىنا كومەكتەسسە، كوكتەمدە قالانى اباتتاندىرۋ جانە كوگالداندىرۋ جۇمىستارىنا بەلسەنە ارالاستى.
مەملەكەتتىك مەيرامدار دا نازاردان تىس قالعان ەمەس. ۇلى جەڭىستىڭ 70 جىلدىعىنا وراي، سوعىس جانە تىل ارداگەرلەرىنە ءىس-شارالار جانە قايىرىمدىلىق اكسيالارى ۇيىمداستىرىلىپ، قۇرمەت كورسەتىلدى. ورازا ايت مەيرامى قارساڭىندا 1000-1500 ادام قامتىعان «تەگىن تاكسي»، «تەگىن اۆتوبۋس» اكسيالارى وتكىزىلىپ، 70-كە جۋىق جاعدايى تومەن وتباسىلارىنا ماتەريالدىق كومەك كورسەتىلدى.
جاستار توبى جاستاردىڭ اراسىنداعى دىنگە سەنۋشىلەردى جانە جاڭادان كەلگەندەردى جات اعىمداردىڭ كوزقاراستارىن جاقتاۋشىلاردىڭ قارماعىنا ىلىندىرمەۋدى جانە جاستاردىڭ داۋرىقپا سوزبەن ەمەس، ىسپەن اينالىساتىنىن
كورسەتىپ، ءداستۇرلى ەمەس ءدىني كوزقاراستى اشكەرەلەۋگە ۇندەيدى.
قازاق حاندىعىنىڭ 550 جىلدىعى، «ءدىن مەن ءداستۇر» جىلى، قۇربان مەيرامى اياسىندا يپپودرومدا «الامان بايگە» جانە ۇلتتىق سپورت تۇرلەرىنەن سايىستار ءوتتى. شىعىس قازاقستان وبلىسى ءدىن ىستەرى باسقارماسىنىڭ ۇيىمداستىرۋىمەن وتكەن «ماڭگىلىك ەل – يماندى ەل» شىعارمالار سايىسىندا اياگوز جاستارى جۇلدەلى 1-2 ورىندارعا يە بولدى.
ءدىني ادەبيەتتى جانە ءدىني مازمۇنداعى وزگە دە اقپاراتتىق ماتەريالداردى تاراتۋ ماسەلەسى رەتتەلگەن. ارنايى تۇراقتى ءۇش ءۇي-جايلاردى ورنالاستىرۋ كەلىسىلگەن.
جالپى اياگوز اۋدانى اكىمدىگىنىڭ ءدىن سالاسىنداعى مەملەكەتتىك ساياساتتى جۇزەگە اسىرۋداعى جۇمىسى وڭ باعالاۋعا بولادى. اكىمدىكتىڭ ءدىن سالاسىنداعى مەملەكەتتىك ساياساتتى جۇزەگە اسىرۋداعى ءدىني بىرلەستىكتەرمەن ءوزارا ءىس-قيمىلىن ودان ءارى بەلسەندى جالعاستىرىپ، ىس-تاجىريبەسىن وبلىستىڭ قالالارى مەن اۋداندارىندا پايدالانعان ءجون.
اياگوز اۋداندىق ىشكى ساياسات ءبولىمى
