احقو قارجىلىق قىزمەتتەر كورسەتۋدى رەتتەۋ كوميتەتى (AFSA) فياتتىق ۆاليۋتامەن قامتاماسىز ەتىلگەن ستەيبلكويندەردى شىعارۋعا العاش رەت ليسەنزيا بەردى. ليسەنزيا فياتتىق ستەيبلكوين ەميتەنتى رەتىندە سيفرلىق اكتيۆتەر سالاسىندا تولەم قىزمەتتەرىن كورسەتۋ بويىنشا رەتتەلەتىن قىزمەتتى جۇزەگە اسىرۋ ءۇشىن AnchorX.KZ Limited كومپانياسىنا بەرىلدى، دەپ حابارلايدى Dalanews.kz.
"AFSA-نىڭ ستەيبلكويندەر بويىنشا كەشەندى نورماتيۆتىك بازاسى شەڭبەرىندە قابىلدانعان بۇل رەتتەۋشى شەشىم قازاقستاندا سيفرلىق اكتيۆتەر ەكوجۇيەسىن دامىتۋداعى ماڭىزدى قادام بولدى. بۇل AFSA مەن احقو-نىڭ ناقتى ءارى تۇراقتى رەتتەۋ ساياساتى ارقىلى يننوۆاسيالاردى قولداۋعا دەگەن ۇمتىلىسىن كورسەتەدى، سونىمەن قاتار ليسەنزيالانعان قاتىسۋشىلار ءۇشىن بەلگىلەنگەن تالاپتارعا سايكەس سيفرلىق قارجىلىق قىزمەتتەردى ۇسىنۋ مۇمكىندىگىن كەڭەيتۋگە ىقپال ەتەدى. بۇل باستاما وڭىردەگى قارجى تەحنولوگيالارى مەن قارجى ينفراقۇرىلىمىن دامىتۋ جونىندەگى كەڭ ستراتەگيانىڭ بولىگى"، دەلىنگەن حابارلامادا.
ايتا كەتسەك، وسى ايدىڭ باسىندا "استانا" حالىقارالىق قارجى ورتالىعىنىڭ الاڭىندا سيفرلىق اكتيۆتەر قىزمەتىن كورسەتەتىن ليسەنزيالانعان پروۆايدەرلەردىڭ (كريپتوبيرجالاردىڭ) ءامياندارىنا بايلانعان "كريپتو-كارتا" جوباسىن جۇزەگە اسىرۋ تەتىگى ىسكە قوسىلعان بولاتىن.
