وبلىس اكىمى دانيال احمەتوۆ ءوز ينستاگرام پاراقشاسىندا ايماقتاعى ەپيدەميالوگيالىق جاعداي، دارىگەرلەردىڭ ۇستەماقىسى مەن پتر زەرتحانالار جەتىسپەۋشىلىگىن قالاي شەشۋ كەرەكتىگى تۋرالى مالىمدەمە جاساپ، ناقتى تاپسىرمالار جۇكتەدى.
- كوروناۆيرۋستى انىقتايتىن پتر-زەرتتەۋلەر ناتيجەلەرىنىڭ كەشىكتىرىلۋىنە بايلانىستى دارىگەرلەرگە تاتار ارىپتەستەرىنىڭ ۇلگىسى بويىنشا ارەكەت ەتۋدى، اتاپ ايتقاندا - كۇتۋگە ۋاقىتتى جوعالتپاي، كوۆيدتى بەلگىلەرى بار كەلۋشىلەرگە بىردەن رەنتگەن نەمەسە كومپيۋتەرلىك توموگرافيانى جاساۋدى تاپسىردىم.⠀
قۇتقارۋشىلار مەن مەديسينا قىزمەتكەرلەرىنىڭ ايتۋى بويىنشا، بۇل جەردە "التىن ساعات" ەرەجەسى جۇمىس ىستەيدى، ياعني ناۋقاستى تەز ارادا ەمدەۋدى باستاپ، ونىڭ اۋىر حالگە تۇسۋىنە جول بەرمەۋ. بۇگىنگى تاڭدا كوكپەكتى جانە تارباعاتاي اۋداندارىندا كۇردەلى ەپيدەميولوگيالىق جاعداي ساقتالۋدا. وعان ءۇش كۇنگە سەمەي دارىگەرلەرى مەن تاتارستاننان كەلگەن ماماندار اتتانادى.
اۋدان اۋرۋحانالارى بارلىق قاجەتتى جابدىقتارمەن جانە دارى-دارمەكتەرمەن قامتاماسىز ەتىلگەن. ⠀الەۋمەتتىك جەلىلەردە پايدا بولعان وتتەگىنىڭ جەتىسپەۋشىلىگى تۋرالى اقپارات شىندىققا ساي ەمەس. ال دارىگەرلەر وزدەرىن قورعاي بىلۋلەرى كەرەك. دارىگەرگە رەنجىپ، بۇكىل جۇيەگە الەۋمەتتىك جەلىلەردە كىر كەلتىرۋدە. بۇعان جول بەرمەۋ كەرەك، - دەدى ايماق باسشىسى.
دانيال احمەتوۆ ىندەتپەن كۇرەسىپ، ايانباي ەڭبەك ەتىپ جۇرگەن دارىگەرلەردىڭ ۇستەماقىسى تۋرالى دا ايتىپ ءوتتى.
- ۇستەمەاقىلارعا كەلەتىن بولساق، كوروناۆيرۋسپەن كۇرەستە الدىڭعى قاتاردا جۇرگەن شىعىسقازاقستاندىق دارىگەرلەردىڭ تولەمدەرى تاياۋ ارادا جۇزەگە اسىرىلادى. قوردىڭ اقشاسى مەديسينالىق مەكەمەلەر مەن ستاسيونارلاردىڭ شوتتارىنا اۋدارىلدى. ماۋسىم ايىندا بولعان پروۆيزورلىق، جۇقپالى جانە كارانتيندىك ستاسيونارلاردىڭ كوبەيۋىنە بايلانىستى كىدىرىس ورىن الدى. ءمامس قورى بيۋدجەتكە قوسىمشا تۇزەتۋلەر ەنگىزدى.
سونداي-اق، بۇگىن تاتارستانمەن دارى-دارمەك جەتكىزۋ تۋرالى كەلىسىمشارتقا قول قويىلعانىن اتاپ وتكىم كەلەدى. وسى قۇجاتقا سايكەس وبلىس جارتى جىلعا دارى-دارمەكتەرمەن قامتاماسىز ەتىلەدى. بۇدان باسقا، جاقىن ارادا تاعى ءۇش پتر-زەرتحانا ساتىپ الىنادى، - دەدى دانيال احمەتوۆ ءوز ينستاگرام پاراقشاسىندا. ⠀
سونداي-اق، شىعىس قازاقستان مەديسينالىق مەكەمەلەرىنىڭ باس دارىگەرلەرىنە ۇيدە كوروناۆيرۋستى قالاي ەمدەۋ كەرەكتىگى تۋرالى اقپاراتتى قامتيتىن قاراپايىم جانە تۇسىنىكتى جادىناما ازىرلەۋدى تاپسىردى. بۇل جەڭىل فورمانى دياگنوستيكالايتىن جانە ستاسيونارعا جاتۋدىڭ قاجەتى جوق پاسيەنتتەرگە ارنالعان قۇجات. مۇنداي تاجىريبە ەكىنشى تولقىن كەزىندە ءوزىن-وزى ەمدەۋدىڭ تەرىس ناتيجەلەرىن بولدىرماۋعا كومەكتەسەدى
