ارمەنيا، بەلارۋس پەن قىرعىزستاننان كونتراباندالىق جولمەن كولىك تاسىپ، قىرۋار پايدا تاۋىپ جۇرگەن ۇيىمداسقان توپ پرەزيدەنت توقايەۆ جاريالاعان اۆتوكولىكتەردى زاڭداستىرۋدىڭ ءبىر رەتتىك شاراسىن ودان ءارى ۇزارتۋ جولىندا ءتۇرلى ارەكەتتەر ۇيىمداستىرا باستادى، دەپ حابارلايدى Dalanews.kz DALA INSIDE تەلەگرام ارناسىنا سىلتەپ.

ارنا مالىمەتىنشە، بۇل كولەڭكەلى نارىق اينالىمى ميلليارد تەڭگەدەن اسىپ جىعىلادى جانە وسىدان ديۆيدەند كورەتىن الىپساتارلاردىڭ،  كونترابانداشىلاردىڭ، ساقتاندىرۋشىلاردىڭ ۇيىمداسقان توبى پايدا بولعان. كۇردەلى تىزبەكتەر ارقىلى شەتەلگە اقشا شىعارۋدىڭ سحەمالارى جۇمىس ىستەگەن.

“شارا بارىسىندا زاڭدى جانە قىلمىستىق ءىزى جوق كولىكتەر الدەقاشان زاڭداستىرىلدى. ەندى تەك تەكسەرۋدەن وتە الماعان كۇماندى جانە ۇرلانعان كولىك يەلەرى قالىپ وتىر. ولار مەديا توپتار مەن ءتۇرلى بلوگەرلەردى جالداپ، اقپاراتتىق شانتاجعا كوشە باستادى”، - دەيدى DALA INSIDE.

ۇرلانعان كولىكتەردى دە كىرگىزەيىك دەگەن يدەيا حالىقتان قولداۋ تابۋ ءۇشىن "ەۋرازيالىق وداق، ودكب-دان شىعايىق" دەگەن پوپۋليستىك ۇراندارمەن تۇزدىقتالۋدا. ونىڭ ارتىندا سوروستان گرانت الاتىن ۇكىمەتتىك ەمەس ۇيىمداردىڭ قۇلاعى قىلتيادى.