قابىلداۋعا كەلگەن ازاماتتاردىڭ قاتارىندا سەلينوگراد اۋداندىق ءماسليحاتتىڭ دەپۋتاتتارى، بەلسەندى ازاماتتار بولدى. سونىمەن قاتار، قۇزىرلى ورگانداردىڭ وكىلدەرى جيىنعا ونلاين رەجيمدە قاتىستى.
– ەلىمىزدە اۋرۋحاناسى جوق جالعىز اۋدان – سەلينوگراد. ازىرگە ستاسيونارلىق ەمحانانى عانا قاناعات تۇتىپ وتىرمىز. تۇرعىندارعا شامەمەن 250 توسەك-ورىندىق اۋرۋحانا قاجەت. اۋدان اكىمدىگى وعان ارناپ 7 گەكتار جەر ءبولدى. الايدا اۋرۋحانا تۇرعىزۋ جۇمىسى وسى جەر بولۋمەن عانا شەكتەلىپ قالدى، – دەدى سەلينوگراد اۋدانىنىڭ ءماسليحات دەپۋتاتى دينارا ءابدىراحمانوۆا.
سونىمەن قاتار، حالىق قالاۋلىسى اۋرۋحانادان بولەك، ءمايىتحانا سالۋ، سوت-مەديسينالىق ساراپتاما جۇرگىزەتىن ورىن اشۋ جۇمىسى دا كەزەك كۇتتىرمەيتىن ماسەلە ەكەنىن اتاپ ءوتتى.
– سەلينوگراد اۋدانىنا قاراستى اۋىلدىڭ ءبىرى – قاراوتكەل. ەلوردانىڭ ىرگەسىندە ورنالاسقان اۋىل تۇرعىندارى استاناداعى №12 ەمحاناعا بەكىتىلگەن ەدى. الايدا ءبىر جارىم جىلدان بەرى اۋىلداعى مەكتەپ مەديسيناسىنىڭ ماسەلەسى شەشىلمەي كەلەدى. ياعني، وقۋشىلار ءبىز ايتىپ وتكەن ەمحاناعا بەكىتىلگەن جوق. سونىڭ سالدارىنان، 1430 بالاعا جوسپارلى ەكپە ەگىلمەي جاتىر، – دەپ دابىل قاقتى دەپۋتات.
ءوز كەزەگىندە، اقمولا وبلىسىنىڭ دەنساۋلىق ساقتاۋ باسقارماسىنىڭ باسشىسى نۇرلان احيلبەكوۆ اۋىلدىڭ بارلىق تۇرعىنى بيىل قاڭتاردا باسقارما قاۋلىسىنا سايكەس №12 ەمحاناعا بەكىتۋگە بەرىلگەنىن اتاپ ءوتتى.
سونىڭ ىشىندە مەكتەپ مەديسيناسى دا بار. الايدا استانا قالاسىنىڭ دەنساۋلىق ساقتاۋ باسقارماسى ءتيىستى قۇجاتقا قول قويماعاندىقتان، ەكپە جۇمىسى ەكى ورتادا قالىپ وتىر.
ال اۋدانداعى اۋرۋحانا تاپشىلىعى ماسەلەسىن اقمولا وبلىسى اكىمىنىڭ ءبىرىنشى ورىنباسارى مالعاجدار تاتكەيەۆ بىلاي دەپ ءتۇسىندىردى:
– اۋدان اكىمدىگى اۋرۋحانا سالۋعا ارنالعان جەر ۋچاسكەسىن ءبولدى. بۇگىندە تەحنيكالىق-ەكونوميكالىق نەگىزدەمە ازىرلەنۋدە. سوعان قاراماستان، اۋرۋحانا سالۋعا قاجەت قاراجات ءالى قاراستىرىلعان جوق، – دەدى وبلىس اكىمىنىڭ ءبىرىنشى ورىنباسارى.
ءوز كەزەگىندە، «AMANAT»-تىڭ اتقارۋشى حاتشىسى پارتيا بۇل ماسەلەنى باقىلاۋدا ۇستايتىنىن جانە اماناتتىقتار اۋرۋحانا تۇرعىزۋعا، تۇرعىنداردىڭ ءومىر ءسۇرۋ جاعدايىن جاقسارتۋعا مۇددەلى ەكەنىن اتاپ ءوتتى. الايدا اۋدان حالقىن تولعاندىرعان ماسەلە مۇنىمەن شەكتەلگەن جوق.
– بۇگىندە سەلينوگراد اۋدانىنا قاراستى تالاپكەر جانە قاراوتكەل اۋىلدارىنىڭ عانا قاتتى تۇرمىستىق قالدىقتارى شىعارىلادى. اۋداننىڭ وزگە اۋلدارىنداعى تۇرمىستىق قالدىقتاردى ەشكىم الىپ كەتپەيدى. اۋدان اۋماعىندا قوقىس توگەتىن پوليگون، قاتتى تۇرمىستىق قالدىقتاردى جينايتىن، سۇرىپتايتىن ورىن قاجەت، – دەدى دينارا ءابدىراحمانوۆا.
حالىق قالاۋلىسىنىڭ ايتۋىنشا، سەلينوگراد اۋدانىنداعى ەندى ءبىر وزەكتى ماسەلە – ەلەكتر جەلىلەرى. بۇگىندە اۋدان اۋماعىنداعى ەلەكتر جەلىلەرىنىڭ باسىم كوپشىلىگى جەرگىلىكتى اتقارۋشى ورگاننىڭ تەڭگەرىمىندە تۇر. الايدا اكىمدىك اتالعان جەلدىلەرگە وزبەتىنشە قىزمەت كورسەتۋگە قاۋقارسىز. بۇعان قوسا، يەسىز جەلىلەر دە بار. قازىرگى تاڭدا ونىڭ ءبارىن ەلەكتر جەلىلەرىنە قىزمەت كورسەتەتىن «ارەك» اق كومپانياسىنا بەرۋ ماسەلەسى كوتەرەلىپ جاتىر. الايدا قانداي دا ءبىر ناقتى شەشىم قابىلدانباي وتىر. سونىڭ سالدارىنان حالىق قيىندىق كورۋدە.
رەسپۋبليكالىق قوعامدىق قابىلداۋ الاڭىندا قارالعان تاعى ءبىر ماسەلە – جەر داۋى. وسىندان ءۇش جىلعا جۋىق ۋاقىت بۇرىن ەرلى-زايىپتى نۇرعالي كوپبوسىنوۆ پەن مانشۇك سىزدىقوۆا تۇركىستان قالاسىنداعى جەر ۋچاسكەسىنەن ايىرىلىپ قالدى. ولاردىڭ سەنىمىنە كىرگەن ع.وسپانوۆ ەسىمدى ازامات سەنىمحات جازدىرىپ الىپ، اتالعان جەر ۋچاسكەسىن مەملەكەتتىڭ مۇقتاجى ءۇشىن تۇركىستان قالاسىنىڭ اكىمدىگىنە قوماقتى قاراجاتقا ساتىپ جىبەرىپتى. بىرنەشە جىلعا سوزىلعان داۋلى ماسەلەنىڭ كۇنى بۇگىنگە دەيىن نۇكتەسى قويىلعان جوق.
وسى كۇنى جەر ۋچاسكەسى ەرلى-زايىپتىلاردىڭ اتىندا. الايدا، وندا قالالىق اكىمدىك باستاپ كەتكەن قۇرىلىس جۇمىسى ءجۇرىپ جاتىر. ەلنۇر بەيسەنبايەۆ ونلاين رەجيمدە اكىمدىكتەگى جاۋاپتى تۇلعالارمەن اڭگىمەلەسىپ، جۋىق ارادا مالەنىڭ وڭ شەشىمىن تابۋ قاجەت ەكەنىن اتاپ ءوتتى. ءىس بارسىن اتقارۋشى حاتشى ءوز باقىلاۋىنا الدى.
سونداي-اق، قابىلداۋ بولىمىنە «تەمەكى تۇتىنىنەن ازات قازاقستان ءۇشىن» ۇلتتىق كواليسياسىنىڭ كوشباسشىسى ءجاميلا سادىقوۆا كەلىپ، ەلەكتروندى شىلىمنىڭ وتانداستارىمىزدىڭ، سونىڭ ىشىندە جاس ۇرپاقتىڭ دەنساۋلىعىنا قانشالىقتى ءقاۋىپتى ەكەنىن اتاپ ءوتتى.
كواليسيا كوشباسشىسى تەمەكى ءونىمىنىڭ بۇل ءتۇرىن شەكارادان كىرگىزۋگە زاڭ جۇزىندە تيىم سالۋ قاجەت ەكەنىن جەتكىزدى. ەلنۇر بەيسەنبايەۆ اتالعان ماسەلە ءماجىلىس قابىرعاسىندا كوتەرىلىپ جاتقانىن جانە دەپۋتاتتار تاراپىنان ءتيىستى جۇمىس جۇرگىزىلەتىنىن مالىمدەدى.
– بۇگىن كوتەرىلگەن بارلىق ماسەلەنى جەكە باقىلاۋىمدا ۇستايمىن. جوبالاۋ-سمەتالىق قۇجاتتاما دايىن بولعان كەزدە رەسپۋبليكالىق بيۋدجەتتەن اۋداندىق اۋرۋحانانىڭ قۇرىلىسىنا قاجەت قاراجات ءبولۋدى قولعا الامىز. بالالارعا ەكپە جاساۋ ماسەلەسى دە كوپ كەشىكپەي ءوز شەشىمىن تابادى. ال تۇرمىستىق قاتتى قالدىقتار پوليگونىن اشۋ ماسەلەسى بويىنشا استانا اگلومەراسياسىنا تۇزەتۋ ەنگىزۋگە اتسالىسامىز. اۋدانعا قاراستى بارلىق ەلدى مەكەندە قاتتى تۇرمىستىق قالدىقتاردى جيناۋعا بولاتىن رەزەرۆتىك اۋماقتار قاراستىرىلادى»، – دەپ تۇيىندەدى ەلنۇر بەيسەنبايەۆ.
