اتاپ ايتقاندا، بۇل شارا ق ر پرەزيدەنتىنىڭ ءماجىلىس دەپۋتاتتارىنىڭ مەرزىمىنەن بۇرىن سايلاۋىن وتكىزۋ تۋرالى شەشىمىنە وراي ۇيىمداستىرىلدى.
سەزد قاتىسۋشىلارى «اۋىل» حدپپ-نىڭ «اۋىل ءداستۇرىن جاڭعىرتامىز» اتتى سايلاۋالدى باعدارلاماسىن تانىستىرىپ، سونداي-اق ءماسليحات دەپۋتاتتارىنىڭ سايلاۋىنا قاتىسۋ باعىتىن تالقىلادى. دەلەگاتتار الەم عالامدىق ەكونوميكالىق قايتا قۇرۋدىڭ الدىندا تۇرعاندا، گەوساياسي جاعداي بارىنشا قىراعىلىقتى، جەدەل جاۋاپ قاتۋدى تالاپ ەتەتىنىن اتاپ ءوتتى.
«وسى باعىتتا ەلىمىز ءۇشىن تۇراقتىلىق پەن ەرتەڭگى كۇنگە دەگەن نىق سەنىم جانە ۇزدىكسىز جۇمىس ۇدەرىسى ماڭىزدى. ال سايلاۋشىلار زاڭنامالىق بيلىكتىڭ بار شەشىمى ءتيىمدى ورىندالارىنا سەنىمدى بولۋى كەرەك. سونىمەن قاتار، ەلىمىز سىرتقى فاكتورلارعا بايلانىستى تۋىنداعان ەكونوميكالىق داعدارىستى بارىنشا ءتيىمدى ەڭسەرۋى ماڭىزدى»،-دەيدى ولار.
«اۋىل» پارتياسىنىڭ مۇشەلەرى الداعى سايلاۋ ناۋقانى حالىقتى ۇيىمداستىراتىن، تۇراقتىلىق پەن كەلىسىمدى ساقتايتىن، سونىمەن قاتار ءپاتريوتيزمدى نىعايتاتىن ماڭىزدى قادام دەپ بىلەدى.
اتاپ ايتقاندا، دەلەگاتتار ق ر پارلامەنتى ءماجىلىسىنىڭ دەپۋتاتتارىن مەرزىمىنەن بۇرىن سايلاۋعا قاتىسۋ تۋرالى شەشىم قابىلدادى. وسىعان وراي، زاڭناما تالاپتارىنا ساي 19 ادامنان تۇراتىن ۇمىتكەرلەردىڭ پارتيالىق ءتىزىمىن بەكىتتى.
دەرەككوز: قازاقپارات
