بۇگىن ق ر مادەنيەت جانە اقپارات ءمينيسترى ايدا بالايەۆا ءوزىنىڭ فەيسبۋك پاراقشاسىندا «اۋىل كىتاپحانالارىنا 100 كىتاپ» اتتى اكسيانىڭ باستالعانىن جاريا ەتتى.
مەملەكەت باسشىسى ۇلتتىق قۇرىلتايدا كىتاپ ماسەلەسىنە ەرەكشە توقتالىپ وتكەنى بەلگىلى. پرەزيدەنت ءوز سوزىندە: «شىن مانىندە، كىتاپ وقيتىن ەل زيالى ۇلتقا اينالادى. ءبىز جاس ۇرپاقتىڭ كىتاپقا قۇشتارلىعىن وياتۋىمىز كەرەك» دەگەن بولاتىن. وسى ورايدا، «اۋىل كىتاپحانالارىنا 100 كىتاپ» اتتى اكسيا باستادىق.
مەن ءوزىم اباي قۇنانباي ۇلىنىڭ اۋىلى قاراۋىلعا جانە قانىش ساتبايەۆتىڭ اۋىلى باياناۋىلعا جانە ءوز تۋعان اۋىلىما الەم جانە قازاق ادەبيەتىنىڭ ۇزدىك شىعارمالارىن، تانىمدىق-اعارتۋشىلىق ادەبيەتتەردى تارتۋ ەتتىم.
بۇل اكسيانى وزگە دە ارىپەستەرىم، مينيسترلەر قولداپ، ءقازىردىڭ وزىندە بىرنەشە اۋىلعا كىتاپ جەتكىزىپ ۇلگەردى.
ماسەلەن، ىشكى ىستەر ءمينيسترى ەرجان ساپاربەك ۇلى، اۋىل شارۋاشىلىعى ءمينيسترى ايداربەك سەيپىل ۇلى، ەڭبەك جانە حالىقتى الەۋمەتتىك قورعاۋ ءمينيسترى سۆەتلانا قابىكەن قىزى، سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى بولعان باعدات باتىربەك ۇلى جەكە اتسالىسىپ، ەلىمىزدىڭ ءبىرقاتار وڭىرىندەگى اۋىل كىتاپحانالارىنا 100 كىتاپتان تابىس ەتۋدە.
باسقا دا ارىپتەستەرمىز تاياۋدا اكسياعا قولداۋ كورسەتۋگە نيەت ءبىلدىردى.
بۇل باستاما ارقىلى شالعايداعى اۋىل كىتاپحانالارىنا سوڭعى شىققان جاڭا تۋىندىلاردى جەتكىزىپ، وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋدى ماقسات ەتىپ وتىرمىز.
اكسياعا وزگە دە مەكەمەلەر مەن ۇيىمدار، جاناشىر ازاماتتار اتسالىسادى دەپ سەنەمىز.
