اۋعانستاننىڭ شىعىسىنداعى كۋنار پروۆينسياسىندا ماگنيتۋداسى 6 بالل بولاتىن جەر سىلكىنىسى تىركەلدى. الدىن الا مالىمەتتەرگە سايكەس، 600-دەن استام ادام قازا تاۋىپ، 1500-گە جۋىق ادام جارالاندى، دەپ حابارلايدى Dalanews.kz انادولى اگەنتتىگىنە سىلتەمە جاساپ.
جەرگىلىكتى بيلىك كۋنار پروۆينسياسىنىڭ بىرنەشە اۋدانى ەڭ كوپ زارداپ شەككەنىن مالىمدەدى. جولداردى كوشكىندەر باسىپ قالعاندىقتان، قۇتقارۋ جۇمىستارى تىكۇشاقتاردىڭ كومەگىمەن جۇرگىزىلۋدە. اۋعانستان اقپارات مينيسترلىگىنىڭ حابارلاۋىنشا، ورتالىق ۇكىمەت پەن كورشىلەس پروۆينسيالاردان قوسىمشا كوماندالار اپات ايماعىنا جىبەرىلگەن.
اۋعانستاننىڭ ۋاقىتشا ۇكىمەتىنىڭ باسپا ءسوز حاتشىسى زابيحۋللا مۋجاحيد (مۋدجاحيد) X الەۋمەتتىك جەلىسىندە جەر سىلكىنىسى سالدارىنان كوپتەگەن ادامنىڭ قازا تاپقانىن راستادى.
«وكىنىشكە قاراي، بۇگىنگى جەر سىلكىنىسى شىعىس پروۆينسيالارىندا ادام ولىمىنە جانە ماتەريالدىق زالالعا اكەلدى»، – دەپ جازدى ول.
جەرگىلىكتى شەنەۋنىكتەر بۇل وقيعانى ەل تاريحىنداعى ەڭ جويقىن ءزىلزالالاردىڭ ءبىرى دەپ باعالادى. ايماقتا ماگنيتۋداسى 5،2-گە جەتكەن ەكى قايتالاما ءدۇمپۋ تىركەلدى.
اقش گەولوگيالىق قىزمەتىنىڭ (USGS) دەرەگىنشە، جەر سىلكىنىسىنىڭ ەپيسەنترى دجەلالاباد قالاسىنان سولتۇستىك-شىعىسقا قاراي 27 شاقىرىم جەردە، پاكىستان شەكاراسىنا جاقىن، 8 شاقىرىم تەرەڭدىكتە ورنالاسقان.
