[caption id="attachment_8461" align="alignleft" width="333"]
جاتاقحانانىڭ اشىلۋ سالتاناتىنا الماتى قالاسى اكىمىنىڭ ورىنباسارى زاۋرەش امانجولوۆا قاتىستى.[/caption]
جاتاقحانانىڭ اشىلۋ سالتاناتىنا الماتى قالاسى اكىمىنىڭ ورىنباسارى زاۋرەش امانجولوۆا قاتىسىپ، ستۋدەنتتەر مەن وقىتۋشىلاردى تۇڭعىش پرەزيدەنت كۇنىمەن قۇتتىقتادى.
– وقۋ ورنىنىڭ تۇلەكتەرى – تەحنولوگتار ەلىمىز ءۇشىن ءاردايىم قاجەت ماماندار. سىزدەر ءۇشىن بۇگىن جاقسى جاعداي جاسالىپ وتىر، ەندى سىزدەر تەرەڭ ءبىلىم الىپ، تابىستى ەڭبەك ەتۋلەرىڭىز قاجەت. وقۋ ورنىنان كاسىبي تۇرعىدان شىڭدالىپ، ەلدىڭ پاتريوتى بولىڭىزدار، – دەدى قالا اكىمىنىڭ ورىنباسارى.
شاراعا قاتىسقان جوعارى وقۋ ورىندارى قاۋىمداستىعىنىڭ ءتوراعاسى، قالالىق ءماسليحات دەپۋتاتى راحمان الشانوۆ، قالالىق «پاراسات» كاسىپوداعىنىڭ ءتوراعاسى دانات جاناتايەۆ، الماتى تەحنولوگيالىق ۋنيۆەرسيتەتىنىڭ رەكتورى قۇرالبەك قۇلاجانوۆ ءسوز كەزەگىن الىپ، اشىلىپ وتىرعان جاتاقحانا ستۋدەنتتەردىڭ جايلى ۇيىنە اينالىپ، بۇل شاڭىراقتان ەلىمىزدىڭ دامۋىنا زور ۇلەس قوساتىن بىلىكتى مامانداردىڭ تۇلەۋىن تىلەدى.
جاڭا ستۋدەنتتىك جاتاقحانا قازىرگى زامانعى يندۋستريالدى ءۇي تۇرعىزۋ تەحنولوگياسىمەن سالىنعان. 1 جىل 2 اي ىشىندە سالىنعان جاتاقحانا قۇرىلىسىنا ۋنيۆەرسيتەت اكىمشىلىگى ءوز قاراجاتىنان 900 ملن. تەڭگە جۇمسادى. ۋنيۆەرسيتەتتىڭ ءبىرىنشى پرورەكتورى، پروفەسسور باۋىرجان نۇراحمەتوۆتىڭ ايتۋىنشا عيماراتتا قازىرگى زامانعى تەلەكوممۋنيكاسيا جەلىسى، اتاپ ايتقاندا جوعارى جىلدامدىقتاعى Wi-Fi جەلىسى وتكىزىلگەن، جاتاقحانادا ستۋدەنتتىك اسحانا، مەديسينالىق كابينەت، وقۋ زالدارى، دەمالىس بولمەلەرى بار.
«بۇگىندە ۋنيۆەرسيتەت اكىمشىلىگى ستۋدەنتتەردىڭ 92 پايىزىن جاتاقحانامەن قامتىپ وتىر. الايدا وقۋ ورداسى كەڭەيىپ كەلەدى، قازىرگى زامانعى زەرتتەۋ ۋنيۆەرسيتەتىنە اينالۋىن ماقسات تۇتادى. سوندىقتان ۋنيۆەرسيتەت جوسپارىندا 500-600 ورىندىق تاعى ءبىر جاتاقحانا سالۋ كوزدەلىپ وتىر»، - دەپ اتاپ ءوتتى ۋنيۆەرسيتەتتىڭ تاربيە ءىسى جونىندەگى پرورەكتورى قالتاي باتحولدين.
قازىرگى تاڭدا الماتى قالاسى بويىنشا 40 مىڭ ستۋدەنت جاتاقحاناعا مۇقتاج ەكەنىن ەسكەرسەك، جاڭا جاتاقحانانىڭ اشىلۋى الماتى جاستارى ءۇشىن ايتۋلى وقيعا بولدى.
اسحات ابىشە،
الماتى تەحنولوگيالىق ۋنيۆەرسيتەتىنىڭ
اقپاراتتىق قىزمەت جەتەكشىسى.
