سوڭعى ۋاقىتتارى شەنەۋنىكتەر اراسىندا ەسكەرتكىشتەردەن اقشا جەپ، جەمقورلىقتىڭ باتپاعىنا باتۋ ادەتكە اينالعانداي. وتكەن جىلدىڭ كۇزىندە اتىراۋ وبلىسىنىڭ اكىمىنىڭ ورىنباسارى باقىتگۇل حامەنوۆا اتىراۋدا ورناتىلۋى ءتيىس اباي ەسكەرتكىشىنە بولىنگەن قارجىعا قول سالىپ، ۇستالعان ەدى.  

بۇدان كەيىن پاۆلودار وبلىسى مادەنيەت، تىلدەردى دامىتۋ جانە مۇراعات ءىسى باسقارماسىنىڭ باسشىسى سامال بەگالينوۆا ءاليحان بوكەيحاننىڭ ءبيۋستىن دايىنداۋ جانە ونى كەدەرگىسىز قابىلداۋ تۋرالى شارت جاساسقانى ءۇشىن كاسىپكەردەن ميلليون تەڭگە پارا الىپ، تەمىر توردىڭ ار جاعىنان ءبىراق شىققان بولاتىن.

اباي ەسكەرتكىشىنەن حامەنوۆا 4،5 ملن تەڭگە الىپ قالعانى جايىنداعى اڭگىمە ءقازىر اقپارات قۇرالدارىندا جەلدەي ەسۋدە.

حامەنوۆاعا قاتىستى سوت ءىسى 12 شىلدەدە باستالۋى كەرەك ەدى. ءبىراق ول 3 تامىزعا شەگەرىلدى.

كەلىسىم-شارت بويىنشا اتىراۋ وبلىستىق اكىمدىگى اباي ەسكەرتكىشىن سالىپ جاتقان كومپانياعا 72،5 ملن تەڭگەسىن، ياعني، كەلىسىلگەن سومانىڭ جارتىسىن تولەپ قويعان.

جالپى اتىراۋ وبلىسى اكىمدىگى اباي ەسكەرتكىشىن تۇرعىزۋ ءۇشىن 145 ملن تەڭگە جۇمساۋدى جوسپارلاعان.

ءبىر قىزىعى ابايدىڭ ءدال وسىنداي اسكەرتكىشىن تۇرعىزۋ ءۇشىن پاۆلودار وبلىسى اكىمدىگى 55 ملن تەڭگە شىعىنداپتى. كەرەكۋدەگى اقىننىڭ ءمۇسىنى – قولادان، تۇعىرى گرانيتتەن جاسالعان، بيىكتىگى – 5،25 مەتر.

ال اتىراۋداعى تۇرعىزىلاتىن اباي ەسكەرتكىشى التىننان قۇيىلماعانى انىق. اتىراۋداعى اقىننىڭ ەسكەرتكىشى تۇعىرىمەن قوسا ەسەپتەگەندە بيىكتىگى 11 مەتر بولسا، ەسكەرتكىشتىڭ 5 مەتردى قۇراعان (پاۆلودارداعى ەسكەرتكىش 25 سم بيىك). ەسكەرتكىش پاۆلودارداعىداي قولا مەن گرانيت تاستان تۇرعىزىلعان.

باعانىڭ الا-قۇلا بولۋىنان ەسكەرتكىش ورناتۋ ىسىنەن جەمقورلىقتىڭ ءيىسى اڭقىيتىنى انىق.