اتىراۋ قالاسىندا سۋپەرماركەت جەلىسى يەسىن بوپسالادى جانە ۇرلىق جاسادى دەگەن ايىپپەن بلوگەر سوتقا تارتىلدى. سوتتا ايىپتالۋشى كىناسىن مويىنداماي، ءوزىن اقتاۋدى سۇرادى، دەپ حابارلايدى Dalanews.kz.
جەرگىلىكتى سۋپەرماركەتتە بولعان بلوگەر پوليسياعا ارىز جازعان. ويتكەنى دۇكەن سورەسىندەگى بەلگىلى ءبىر تاۋاردىڭ، بىرىنشىدەن، جارامدىلىق مەرزىمى وتكەن، ەكىنشىدەن، وندا مەملەكەتتىك تىلدە مالىمەتتەر بەرىلمەگەن. الايدا سوتتا قارسى تاراپ بلوگەر وسى ايىپپەن ءوزىن قورقىتىپ، 2 ملن تەڭگە تالاپ ەتكەنىن جەتكىزگەن.
"مۇنىمەن توقتاماعان بلوگەر ءوتىنىشتى قايتارىپ الۋ ءۇشىن دۇكەننەن 39 824 تەڭگەگە ازىق-تۇلىك العان. بىرنەشە كۇننەن كەيىن بلوگەر سوت پروسەسىنە قاتىسقان ارىپتەسىن قولداۋ ماقساتىندا اتىراۋ قالاسىنىڭ №2 سوتىنا كەلىپ، پروكۋرورلارعا ارنالعان بولمەگە كىرىپ، ىشىندە قىزمەتتىك كيىم تۇرعان شكافتى اشىپ، سونداعى كيىمدەردىڭ ءبىرىنىڭ قالتاسىنان 20 مىڭ تەڭگەنى جاسىرىن ۇرلاعان"، دەلىنگەن سوت حابارلاماسىندا.
سوتتالۋشى كىناسىن مويىنداماي، ءوزىن اقتاۋدى سۇرادى.
"سوتتالۋشىنىڭ كىناسى جابىرلەنۋشىلەردىڭ، كۋالاردىڭ ايعاقتارىمەن جانە تەرگەۋ ارەكەتتەرىنىڭ بەينەجازبالارىمەن ءوز دالەلىن تاپتى. سوت ۇكىمىمەن بلوگەر ق ر قك-نىڭ 194-بابىنىڭ 2-بولىگىنىڭ 3-تارماعى جانە 188-بابىنىڭ 3-بولىگىنىڭ 3-تارماعى بويىنشا كىنالى دەپ تانىلىپ، وعان ق ر قك-نىڭ 58-بابىنىڭ نەگىزىندە 3 جىل 1 اي مەرزىمگە باس بوستاندىعىنان ايىرۋ تۇرىندەگى جازا تاعايىندالدى"، - دەيدى وسى ءىستى قاراعان اتىراۋ قالاسى №2 سوتىنىڭ باسپا ءسوز قىزمەتى.
سوت ۇكىمى زاڭدى كۇشىنە ەنگەن جوق.
