اتىراۋداعى ورتالىق الاڭعا جۇرت تۇسكى ساعات 12 كەزىندە جينالا باستادى. ولار قازاقستان جەرىن «شەتەلدىكتەرگە جالعا بەرۋگە جانە ساتۋعا» قارسىلىعىن بىلدىرۋگە كەلگەندەرىن ايتادى.

وسى جەرگە كەلگەن قالا اكىمى نۇرلان وجايەۆ پەن وبلىس اكىمىنىڭ ورىنباسارى ءسالىمجان ناقپايەۆقا جينالعاندار ءوز تالاپتارىن جەتكىزدى. اكىم وجايەۆ «رۇقسات ەتىلمەگەن ميتينگ وتكىزۋ - زاڭسىز» بولاتىنىن ايتقانىمەن، جۇرتشىلىق بيلىككە تالاپتارىن ايتۋ ءۇشىن جينالعاندارىن ايتىپ، تاراۋدان باس تارتتى.

شەنەۋنىكتەر جۇرتقا «قازاقستاننىڭ جەرى مەن ەگەمەندىگىنە ەشكىم قول سۇعا المايتىنىن» تۇسىندىرۋگە تىرىستى. جينالعاندار ولارعا قازاقستان جەرىن شەتەل ازاماتىنا 25 جىلعا جالعا بەرۋ «ەل مەن جەر بولاشاعىنا قاتەر» دەپ سانايتىندارىن ايتتى. بۇدان سوڭ بيلىك وكىلدەرى الاڭنان كەتىپ قالدى. الاڭدا ميتينگ جالعاسىپ، كوپشىلىك الدىنا شىعىپ سويلەگەندەر «جەردى شەتەلدىكتەرگە ساتۋعا دا، جالعا بەرۋگە دە» قارسى ەكەندەرىن مالىمدەدى.

قوعامدىق بەلسەندىلەر جينالعان جۇرتتى «ارانداتۋدان ساق بولىپ، ءتارتىپ بۇزباۋعا» شاقىردى. يساتاي مەن ماحامبەت الاڭى ماڭىنا بۇگىن تاڭەرتەڭنەن جينالعان پوليسيا ميتينگتى سىرتتاي باقىلاپ تۇردى.

ارادا تاعى ءبىراز ۋاقىت وتكەندە نارازىلىق اكسياسى ءوتىپ جاتقان الاڭعا اتىراۋ وبلىسى اكىمى نۇرلان نوعايەۆ كەلدى. جينالعانداردىڭ «جەر-انانى ساتۋعا جانە جالعا بەرۋگە بولمايدى» دەگەن سوزدەرىن ول دا ەستىدى.

بۇگىن الاڭداعى جيىندا جۇرتشىلىق تاراپىنان وبلىس اكىمى نۇرلان نوعايەۆقا «پوليسيا مەن پروكۋراتۋرا بەلسەندىلەردى قۋدالاماسىن» دەگەن تالاپ ايتىلدى. اكىم بەلسەندىلەردى ەشكىم قۋدالاپ، جازالامايدى دەپ سەندىرۋگە تىرىستى. وبلىس باسشىسى الاڭداعى جۇرتتان تالاپتارىن قاعازعا ءتۇسىرىپ، وزىنە جازباشا تۇردە بەرۋدى سۇراپ، ونى اقورداعا جەتكىزەتىنىن ايتتى.

"ازاتتىق" سايتى