Búgin Atyraýdaǵy Isatai men Mahambet alanyńa júzdegen adam jinaldy. Olar «jerdi sheteldikterge jalǵa berýge jáne satýǵa» qarsylyǵyn bildirýge kelgenderin aitady. Bul týraly "Azattyq" saity habarlaidy
Atyraýdaǵy ortalyq alańǵa jurt túski saǵat 12 kezinde jinala bastady. Olar Qazaqstan jerin «sheteldikterge jalǵa berýge jáne satýǵa» qarsylyǵyn bildirýge kelgenderin aitady.
Osy jerge kelgen qala ákimi Nurlan Ojaev pen oblys ákiminiń orynbasary Sálimjan Naqpaevqa jinalǵandar óz talaptaryn jetkizdi. Ákim Ojaev «ruqsat etilmegen miting ótkizý - zańsyz» bolatynyn aitqanymen, jurtshylyq bilikke talaptaryn aitý úshin jinalǵandaryn aityp, taraýdan bas tartty.
Sheneýnikter jurtqa «Qazaqstannyń jeri men egemendigine eshkim qol suǵa almaitynyn» túsindirýge tyrysty. Jinalǵandar olarǵa Qazaqstan jerin shetel azamatyna 25 jylǵa jalǵa berý «el men jer bolashaǵyna qater» dep sanaityndaryn aitty. Budan soń bilik ókilderi alańnan ketip qaldy. Alańda miting jalǵasyp, kópshilik aldyna shyǵyp sóilegender «jerdi sheteldikterge satýǵa da, jalǵa berýge de» qarsy ekenderin málimdedi.
Qoǵamdyq belsendiler jinalǵan jurtty «arandatýdan saq bolyp, tártip buzbaýǵa» shaqyrdy. Isatai men Mahambet alańy mańyna búgin tańerteńnen jinalǵan politsiia mitingti syrttai baqylap turdy.
Arada taǵy biraz ýaqyt ótkende narazylyq aktsiiasy ótip jatqan alańǵa Atyraý oblysy ákimi Nurlan Noǵaev keldi. Jinalǵandardyń «Jer-Anany satýǵa jáne jalǵa berýge bolmaidy» degen sózderin ol da estidi.
Buǵan deiin jergilikti belsendiler Atyraýda 24 sáýirde miting ótkizý týraly qala ákimdigine ótinish bergenimen, bilik ruqsat bermegen. Atyraýda «jerdi jeke menshikke satýǵa» qarsy aktsiiaǵa shyqpaq bolǵan keibir azamattyq belsendiler jeksenbi kúni tergeýshi suraǵyna jaýap berýge shaqyrylǵandary týraly qaǵaz alǵan.
Búgin alańdaǵy jiynda jurtshylyq tarapynan oblys ákimi Nurlan Noǵaevqa «politsiia men prokýratýra belsendilerdi qýdalamasyn» degen talap aityldy. Ákim belsendilerdi eshkim qýdalap, jazalamaidy dep sendirýge tyrysty. Oblys basshysy alańdaǵy jurttan talaptaryn qaǵazǵa túsirip, ózine jazbasha túrde berýdi surap, ony Aqordaǵa jetkizetinin aitty.
Qazaqstan Jer kodeksine byltyr kúzde engizilgen ózgeristerge sáikes, biylǵy shilde aiynan aýylsharýashylyǵy maqsatyndaǵy jerdi el azamattaryna aýktsion arqyly jeke menshikke satý, sonymen birge sheteldikterge, azamattyǵy joq adamdarǵa ondai jerdi 25 jylǵa deiin jalǵa berý bastalmaq. Bul jańa ózgeris Qazaqstan qoǵamynda qyzý pikirtalas týdyrǵan.
"Azattyq" saity
