«ۋرال ويل ەند گاز» ءجشس-نىڭ باس ديرەكتورى بولىپ پرەزيدەنتتىڭ جاستار كادرلىق رەزەرۆىنىڭ مۇشەسى، اتىراۋ وبلىسىنىڭ بۇرىنعى اكىمى ماحامبەت دوسمۇحامبەتوۆتىڭ ۇلى بولات دوسمۇحامبەتوۆ تاعايىندالدى، دەپ حابارلايدى Dalanews.kz.

بولات دوسمۇحامبەتوۆ – ق.ي.ساتبايەۆ اتىنداعى قازۇتۋ-دىڭ «مۇناي جانە گاز گەولوگياسى» ماماندىعى بويىنشا تۇلەگى. فرانسياداعى لوتارينگيا ۇلتتىق پوليتەحنيكالىق ينستيتۋتىندا «گەولوگيا جانە كەن ورىندارىن يگەرۋ» ماماندىعى بويىنشا ماگيسترلىك ءبىلىم العان. سونىمەن قاتار، MBA دارەجەسىن KazGUU Business School جانە University of Business and International Studies وقۋ ورىندارىندا العان.

ول ءار جىلدارى Weatherford كومپانياسىندا ينجەنەر-گەوفيزيك، Total S.A. كومپانياسىنىڭ قۇرىلىمدىق گەولوگيا جانە شوگىندى جىنىستار بولىمىندە گەولوگ، KMG Kashagan B.V.-دە پەرسپەكتيۆالىق جوبالار دەپارتامەنتىنىڭ ديرەكتورى، CMOC B.V. كومپانياسىندا باس ديرەكتوردىڭ ورىنباسارى، «يساتاي وپەرەيتينگ» ءجشس-نىڭ باس ديرەكتورى قىزمەتتەرىن اتقارعان.

«قازمۇنايگاز» باسپا ءسوز قىزمەتىنىڭ حابارلاۋىنشا، «ۋرال ويل ەند گاز» ج ش س باتىس قازاقستان وبلىسىنداعى فەدوروۆ بلوگىندا جۇمىس جۇرگىزىپ جاتىر. جوبا اكسيونەرلەرى: «قازمۇنايگاز» ۇك» اق، MOL Group جانە First International Oil Corporation Limited (Sinopec ەنشىلەس كومپانياسى).

بولات دوسمۇحامبەتوۆ – 2019 جىلى اتىراۋ وبلىسىنىڭ اكىمى بولىپ تاعايىندالعان 61 جاستاعى ماحامبەت دوسمۇحامبەتوۆتىڭ ۇلى. ول اكىمدىككە «جەكە ويىنشى» رەتىندە كەلدى، الايدا ءبىر جىل ىشىندە ءوز كومانداسىن جاساقتاۋعا تىرىستى. الايدا ساراپشىلار دا، جەرگىلىكتى حالىق تا ونىڭ كومانداسىن باسقارۋشىلىق قابىلەتى تومەن، ءالسىز قۇرام دەپ باعالاعان.