اتىراۋ وبلىسىندا قىزىلقوعا اۋدانىنىڭ جانگەلدين اۋىلىندا جوعالعان وتباسىنى ىزدەۋ جۇمىستارى جالعاسىپ جاتىر، دەپ حابارلايدى Dalanews.kz "اق جايىققا" سىلتەپ.

جانگەلدين اۋىلىنىڭ اكىمى قانات عايسا وتباسى مەن ىزدەۋ بارىسى تۋرالى ايتتى.

اكىمنىڭ ايتۋىنشا، ءتورت ادامنان تۇراتىن وتباسى بۇرىن ەشقانداي كۇدىك تۋدىرماعان جانە ەرەكشە مىنەز-قۇلىق كورسەتپەگەن.

"ولار اكىمدىكتەن كومەك سۇراماعان، سەبەبى تۇراقتى تابىستارى بولدى. وتباسىندا ەكى زەينەتكەر جانە مۇمكىندىگى شەكتەۋلى ەكى ادام بىرگە تۇرعان. جيىرما شاقتى قويى مەن وننان استام ءىرى قاراسى بار ەدى، سول ارقىلى كۇن كورگەن"، - دەدى اكىم.

ىزدەۋ جۇمىستارىنا توتەنشە جاعدايلار دەپارتامەنتىنىڭ قىزمەتكەرلەرى مەن اۋىل تۇرعىندارى قاتىسىپ جاتىر. ازىرگە ناتيجە جوق.

اكىمنىڭ سوزىنشە، وتباسى اۋىلدان قالاعا قاتىنايتىن تاكسي قىزمەتىن پايدالانباعان. 

"اۋىلىمىز شاعىن، بوتەن كولىك كەلسە نەمەسە بىرەۋ كەتسە، بىردەن بايقالار ەدى"، – دەپ اتاپ ءوتتى ول.

سونداي-اق، اكىمنىڭ سوزىنشە، وتباسى مەملەكەتتىك مەكەمەلەرگە سيرەك بارعان. سوڭعى رەت 28 قازاندا ايەل قان قىسىمى جوعارىلاۋىنا بايلانىستى دارىگەرگە جۇگىنگەن.

ەسكە سالايىق، بۇعان دەيىن اتىراۋ وبلىسىندا ءبىر وتباسى ىزدەستىرىلىپ جاتقانى حابارلاندى. پوليسياعا ارىز 25 جەلتوقساندا تۇسكەن.