اتىراۋ وبلىسى ماقات اۋدانىنىڭ بۇرىنعى اكىمى رينات يبراگيموۆقا شىققان سوت ۇكىمى وزگەردى، - دەپ حابارلايدى Dalanews.kz.
اپەللياسيالىق ساتىداعى سوت يبراگيموۆقا قاتىستى ءبىرىنشى ساتىداعى سوت ۇكىمىن وزگەرتتى. بۇعان دەيىن اتىراۋ قالاسىنىڭ №2 سوتى يبراگيموۆتى ماتەريالدىق تاۋەلدىلىكتە بولعان ادامعا قاتىستى دەنساۋلىققا قاساقانا اۋىرلىعى ورتاشا زيان كەلتىرگەنى ءۇشىن كىنالى دەپ تانىپ، 2 جىل مەرزىمگە باس بوستاندىعىن شەكتەگەن بولاتىن.
جابىرلەنۋشىنىڭ مورالدىق شىعىن ءوندىرۋ تۋرالى ازاماتتىق تالاپ قويۋى ءىشىنارا قاناعاتتاندىرىلدى: سوتتالۋشىدان 2 ميلليون تەڭگە مورالدىق زيان ءوندىرىلدى.
ءىس اپەللياسيالىق القاعا جابىرلەنۋشى جانە قورعاۋ تارابىنىڭ شاعىمدارى، پروكۋروردىڭ ءوتىنىش-حاتى بويىنشا ءتۇستى. سوت القاسى ءىس ماتەريالدارىن زەردەلەپ، يبراگيموۆتىڭ قىلمىس جاساۋداعى كىناسى جابىرلەنۋشىنىڭ جاۋاپتارىمەن، سوت-دارىگەرلىك ساراپتاما قورىتىندىسىمەن دالەلدەندى دەگەن تۇجىرىمعا كەلدى.
"القا "كىنالى ادامعا كورىنەۋ بەلگىلى ماتەريالدىق جاعىنان تاۋەلدى ادامعا قاتىستى" سارالاۋ بەلگىسى دۇرىس تاعىلماعان دەپ شەشتى. جابىرلەنۋشىنىڭ سوتتالعان ادامعا ماتەريالدىق تاۋەلدىلىگى تۋرالى دالەل ۇسىنىلمادى. جابىرلەنۋشى كاسىپكەرلىك قىزمەتتى جۇزەگە اسىرعانى، ونىڭ شوتىنا اقشا تۇسكەنى تۋرالى قۇجاتتار ۇسىنىلدى.
وسىعان بايلانىستى يبراگيموۆتىڭ ارەكەتى قىلمىستىق كودەكستىڭ 107-بابىنىڭ 1-بولىگىنە قايتا سارالاندى. وعان 700 ايلىق ەسەپتىك كورسەتكىش مولشەرىندە ايىپپۇل جازاسى تاعايىندالدى (2 415 000 تەڭگە)"، - دەپ جازىلعان اتىراۋ وبلىستىق سوتىنىڭ باسپا ءسوز قىزمەتى حابارلاماسىندا.
ايتا كەتەيىك، بۇعان دەيىن اتىراۋ قالاسىنىڭ تۇرعىنى اقمارال ۇمبەتقالييەۆا بۇرىنعى كۇيەۋى، وعان قوسا سول كەزدە اتىراۋ وبلىسى ماقات اۋدانىنىڭ اكىمى قىزمەتىن اتقارعان رينات يبراگيموۆقا قاتىستى مالىمدەمە جاسادى. ونىڭ سوزىنشە، بۇرىنعى كۇيەۋى 11 جىل بويى ۇرىپ-سوققان، بالالارىن تارتىپ العان.
