Atyraý oblysy Maqat aýdanynyń burynǵy ákimi Rinat Ibragimovqa shyqqan sot úkimi ózgerdi, - dep habarlaidy Dalanews.kz.
Apelliatsiialyq satydaǵy sot Ibragimovqa qatysty birinshi satydaǵy sot úkimin ózgertti. Buǵan deiin Atyraý qalasynyń №2 soty Ibragimovti materialdyq táýeldilikte bolǵan adamǵa qatysty densaýlyqqa qasaqana aýyrlyǵy ortasha ziian keltirgeni úshin kináli dep tanyp, 2 jyl merzimge bas bostandyǵyn shektegen bolatyn.
Jábirlenýshiniń moraldyq shyǵyn óndirý týraly azamattyq talap qoiýy ishinara qanaǵattandyryldy: sottalýshydan 2 million teńge moraldyq ziian óndirildi.
Is apelliatsiialyq alqaǵa jábirlenýshi jáne qorǵaý tarabynyń shaǵymdary, prokýrordyń ótinish-haty boiynsha tústi. Sot alqasy is materialdaryn zerdelep, Ibragimovtiń qylmys jasaýdaǵy kinási jábirlenýshiniń jaýaptarymen, sot-dárigerlik saraptama qorytyndysymen dáleldendi degen tujyrymǵa keldi.
"Alqa "kináli adamǵa kórineý belgili materialdyq jaǵynan táýeldi adamǵa qatysty" saralaý belgisi durys taǵylmaǵan dep sheshti. Jábirlenýshiniń sottalǵan adamǵa materialdyq táýeldiligi týraly dálel usynylmady. Jábirlenýshi kásipkerlik qyzmetti júzege asyrǵany, onyń shotyna aqsha túskeni týraly qujattar usynyldy.
Osyǵan bailanysty Ibragimovtiń áreketi Qylmystyq kodekstiń 107-babynyń 1-bóligine qaita saralandy. Oǵan 700 ailyq eseptik kórsetkish mólsherinde aiyppul jazasy taǵaiyndaldy (2 415 000 teńge)", - dep jazylǵan Atyraý oblystyq sotynyń baspasóz qyzmeti habarlamasynda.
Aita keteiik, buǵan deiin Atyraý qalasynyń turǵyny Aqmaral Úmbetqalieva burynǵy kúieýi, oǵan qosa sol kezde Atyraý oblysy Maqat aýdanynyń ákimi qyzmetin atqarǵan Rinat Ibragimovqa qatysty málimdeme jasady. Onyń sózinshe, burynǵy kúieýi 11 jyl boiy uryp-soqqan, balalaryn tartyp alǵan.
