1 قازانداعى جاعداي بويىنشا 274 مىڭنان اسا ادامعا اتاۋلى الەۋمەتتىك كومەك كورسەتىلدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى، دەپ حابارلايدى Dalanews.kz.
ااك-نىڭ نەگىزگى ماقساتى – اقشالاي تولەم تۇرىندە قولداۋ جانە وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن قيىن ومىرلىك جاعدايدان شىعارۋ.
ااك مىنالاردى كوزدەيدى:
- تابىسى كەدەيلىك شەگىنەن اسپايتىن ازاماتتارعا توقسان سايىن الەۋمەتتىك كومەك تاعايىنداۋ؛
- تابىسى از وتباسىلارداعى 1 جاس پەن 6 جاس ارالىعىنداعى ءار بالاعا 1،5 اەك مولشەرىندە اي سايىنعى قوسىمشا تولەم بەرۋ. 1 قازانداعى جاعداي بويىنشا ااك الۋشىلار قاتارىنان مەكتەپ جاسىنا دەيىنگى 84،6 مىڭ بالاعا 3،2 ملرد تەڭگە سوماسىنا قوسىمشا تولەم تاعايىندالعان؛
- جۇمىسقا ورنالاستىرۋ، ءوز ءىسىن اشۋعا نيەتتى وتباسىلارعا گرانتتار بەرۋ، بىلىكتىلىكتى ارتتىرۋ كۋرستارىنا جىبەرۋ (قاجەت بولعان جاعدايدا) ارقىلى جۇمىسپەن قامتۋعا جاردەمدەسۋ.
ايتا كەتەيىك، قازاقستاندىقتار ااك تاعايىنداۋعا ءوتىنىشتى تۇرعىلىقتى جەرى بويىنشا مانساپ ورتالىعىندا، اۋىل وكرۋگىنىڭ اكىمىنە، سونداي-اق، ەلەكترون ۇكىمەت پورتالى (egov.kz) ارقىلى بەرە الادى.
