ونىڭ ايتۋىنشا، اتامبايەۆتى 26 قازاندا ۇقمك-نىڭ تەرگەۋ اباقتىسىنان بۇرىنعى ءولىم جازاسىنا كەسىلگەن تۇتقىنداردى قامايتىن جەرتولەدەگى كامەراعا اۋىستىرعان. بۇعان قارسىلىق رەتىندە المازبەك اتامبايەۆ اشتىق جاريالاعان. ءقازىر ونىڭ جاعدايى ناشار دەيدى ادۆوكاتى.
اقپاراتقا قاراعاندا، بۇرىنعى پرەزيدەنت وتىرعان جەرتولەدە كوپتەن بەرى ەشكىم بولماعاندىقتان، جىلۋدى ەندى عانا بەرگەن. كامەرا ەسىگى اشىق، كاناليزاسياسى جۇمىس ىستەمەيدى.
بۇل مالىمەتتى رەسمي انىقتاۋ ءۇشىن ازاتتىقتىڭ قىرعىز قىزمەتى جازانى اتقارۋ بويىنشا مەملەكەتتىك قىزمەتكە قايرىلدى. مەكەمەنىڭ باسپا ءسوز قىزمەتى بۇل تۋرالى حابارى جوق ەكەنىن، اقپاراتتى انىقتاپ جاتقانىن جەتكىزدى.
اتامبايەۆ قىلمىس الەمىنىڭ دوكەيى ازيز باتۋكايەۆتىڭ تۇرمەدەن زاڭسىز بوساتىلۋىنا بايلانىستى 11 جىلعا باس بوستاندىعىنان ايىرىلعان. بۇدان بولەك ول كوي-تاش وقيعاسى بويىنشا سوتتالعان.
بيىل 6 قازانعا قاراعان ءتۇنى اتامبايەۆتى جاقتاستارى تۇرمەدەن بوساتىپ الدى. ءبىراق ارنايى قىزمەت 9 قازاندا بىشكەكتە وتكەن ميتينگ كەزىندە ونى قايتا ۇستاپ اكەتتى.
